Директорот на „Енвидија“ предвидува државни системи за вештачка интелигенција

Главниот извршен директор на „Енвидија“ (Nvidia Corp.), Џенсен Хуанг, вели дека земјите низ светот што имаат цел да конструираат и да управуваат со сопствена инфраструктура за вештачка интелигенција ќе ја зголемат побарувачката за производите на неговата компанија.

Државите, вклучувајќи ги Индија, Јапонија, Франција и Канада, зборуваат за важноста од инвестирањето во „самостојни способности за вештачка интелигенција“, рече Хуанг во четвртокот во интервју за телевизијата „Блумберг“. „Нивниот природен ресурс – податоците – треба да се рафинира и произведе за нивната земја. Признавањето на самостојните способности за вештачка интелигенција е глобално“.

За време на интервјуто, Хуанг беше во Канада, која сама по себе е дом на голем број академски институции што значително придонесоа за откритија во сферата на системите за генеративна вештачка интелигенција што се користат во алатките како што е популарниот ЧетГПТ (ChatGPT) на „Опен еј-ај“. „Земјата сега има зголемена потреба од суперкомпјутери неопходни за материјализирање на работата на нејзините академици“, рече тој.

Хуанг, кој е соосновач на дизајнерот на чипови „Енвидија“, со месеци зборува за потребата на земјите и нивните компании да ги чуваат важните податоци и интелигенцијата што може да се обучи со нив на локално ниво. Ваквиот национален пристап кон бумот на вештачката интелигенција ќе поттикне проширување на центрите за податоци на кои ќе им требаат знаење и хардвер од „Енвидија“.

Џенсен Хуанг Bloomberg

Се проценува дека највредниот производител на чипови во светот ја удвоил својата продажба во фискалната година, поттикнат од трошењата за вештачка интелигенција на неговите најголеми клиенти, како што се „Мајкрософт“, „Мета“, „Амазон“ и „Алфабет“. Хуанг сега сака да ја прошири својата база на клиенти така што ќе ги убеди корпорациите и владините агенции да изградат сопствена инфраструктура.

„Поголемиот дел од компјутерскиот пазар е во САД, а во многу помал степен во Кина“, рече тој. „За првпат, поради компјутерската технологија за генеративна вештачка интелигенција, ќе има влијание буквално во секоја земја. Така, некои од пазарите ќе бидат доста големи и глобални“.

„Енвидија“, која стана омилен облог на Волстрит кога станува збор за вештачката интелигенција, успеа да ги надмине очекувањата на аналитичарите во однос на заработката за изминатите неколку квартали и можеби ќе треба да најде нови пазари за да ја задржи таквата низа. Други технолошки компании што беа поврзани со бумот на вештачката интелигенција во текот на изминатата година, како што е конкурентот за производство на чипови АМД (Advanced Micro Device Inc.), објавија заработка и изгледи за овој квартал што ги разочараа инвеститорите.

„Енвидија“ може да го докаже спротивното. Тоа е веројатно единствената технолошка компанија што покажа значителен раст на приходите од вештачката интелигенција, која веќе го трансформира снабдувачот на чипови од просечен играч во најголем профитер од бумот на вештачката интелигенција. Аналитичарите предвидуваат дека порастот на побарувачката за производите на „Енвидија“ ќе ја претвори во најголема компанија според приходите во индустријата за чипови веќе во 2025 година.

Во моментов нема коментари за веста. Биди прв да коментира...

Остави коментар