Сè што треба да знаете за чипот што предизвика бум на вештачката интелигенција

Ретко се случува компјутерската компонента да предизвика бранувања надвор од технолошката индустрија. Но, кога „Енвидија“ (Nvidia Corp.) во мај објави експлозивна прогноза за продажбите, која ја одведе нејзината пазарна вредност над билион долари, ѕвезда на шоуто беше најновата компонента за графичка обработка, Х100 (H100). Новиот чип им покажува на инвеститорите дека вревата околу генеративната вештачка интелигенција  - системи што можат да извршуваат широк опсег на задачи со супермоќна брзина  - се претвора во реален приход, барем за „Енвидија“. Побарувачката за Х100 е толку голема што некои клиенти треба да чекаат дури шест месеци за да го добијат.

1. Што е Х100?

Х100, чие име е во чест на пионерот на компјутерската наука Грејс Хопер, е графички процесор. Тоа е тип на чип што вообичаено се вградува во компјутерите и им овозможува на гејмерите да добијат најреално визуелно искуство. Сепак, за разлика од неговите стандардни конкуренти, чипот располага со 80 милијарди транзистори распоредени во јадра што се нагодени да обработуваат податоци со голема брзина, а не да генерираат слики. „Енвидија“, основана во 1993 година, беше пионер на овој пазар со инвестиции во технологијата речиси две децении, кога се обложи дека способноста за обработка на податоци еден ден ќе ги направи нејзините чипови важни и за апликации надвор од игрите.

2. Зошто Х100 е толку посебен?

Платформите со генеративна вештачка интелигенција учат да завршуваат задачи како што се преведување текст, сумирање извештаи и пишување компјутерски кодови откако ќе бидат обучени за таквите процеси со огромни количества на постоен материјал. Колку повеќе следат и „учат“, толку подобри стануваат во работи како што се препознавање човечки говор или пишување мотивациски писма за работа. Тие се развиваат по пат на обиди и грешки, правејќи милијарди обиди за да дојдат до саканото знаење, при што трошат огромни количества компјутерска моќ во процесот. „Енвидија“ вели дека Х100 е четири пати побрз од претходникот A100 при обуката со овие таканаречени големи јазични модели (LLM) и е 30 пати побрз кога одговара на барањата на корисниците. За компаниите што се тркаат да ги обучат своите јазични модели за извршување нови задачи, таа предност во перформансите може да биде клучна.

3. Како „Енвидија“ ја доби водечката позиција?

Компанијата е светски лидер во таканаречените графички процесорски единици  - деловите на компјутерот што ги генерираат сликите што ги гледаме на екранот. Најмоќните графички процесори, кои можат да создадат пејзажи со реален изглед во видеоигрите, имаат повеќе процесорски јадра што вршат неколку истовремени пресметки. Инженерите на „Енвидија“ во раните 2000-ти сфатија дека графичките процесори може да се преработат за да станат таканаречени забрзувачи за други апликации така што ќе ги поделат задачите на помали сегменти и потоа ќе работат на нив во исто време. Пред нешто повеќе од една деценија, истражувачите на вештачката интелигенција открија дека нивната работа конечно може да се направи практична со користење на овој тип чипови.

Bloomberg

4. Каква е состојбата во трката?

„Енвидија“ контролира околу 80 отсто од пазарот за акцелератори во центрите за податоци за вештачка интелигенција управувани од АВС (AWS) на „Амазон“ (Amazon.com Inc.), „Гугл клауд“ (Google Cloud) на „Алфабет“ (Alphabet Inc.) и „Азур“ (Azure) на „Мајкрософт“ (Microsoft Corp). Внатрешните напори на овие компании да конструираат вакви чипови и конкурентските производи од производителите на чипови како АМД (Advanced Micro Devices Inc.) и „Интел“ (Intel Corp.), досега не оставија голем впечаток на пазарот на акцелератори.

5. Зошто е тоа така?

„Енвидија“ брзо ги ажурираше своите понуди, вклучувајќи и софтвер за поддршка на хардверот, со темпо што не можеше да го постигне ниту еден конкурент досега. Чиповите како процесорите „ксеон“ (Xeon) на „Интел“ имаат помалку процесорски јадра. Иако тие се способни за посложени податоци, многу се побавни во работата низ куповите информации што обично се користат за обука на софтверот за вештачка интелигенција. Одделот за центри за податоци на „Енвидија“ забележа зголемување на приходите од 41 отсто, до 15 милијарди долари во 2022 година.

6. Дали другите стигнуваат?

АМД, вториот по големина производител на компјутерски графички чипови, во јуни ја претстави верзијата на својата линија „инстинкт“ (Instinct), наменета за пазарот на кој доминираат производите на „Енвидија“. Чипот, наречен МИ300X (MI300X), има повеќе меморија за справување со оптоварувањата од генеративната вештачка интелигенција, изјави извршната директорка на АМД, Лиза Су, пред публиката на настанот во Сан Франциско. „Сè уште сме многу, многу рано во животниот циклус на вештачката интелигенција“, рече таа. „Интел“ на пазарот воведува специфични чипови за задачите на вештачката интелигенција, но призна дека засега побарувачката за графички чипови за центри за податоци расте побрзо отколку за централните процесорски единици што традиционално беа силата на компанијата. Предноста на„Енвидија“ не е само во перформансите на нејзиниот хардвер. Компанијата измисли нешто наречено ЦУДА (CUDA), јазик за своите графички чипови што им овозможува да се програмираат за типот на работа што ги поттикнува програмите за вештачка интелигенција.

Во моментов нема коментари за веста. Биди прв да коментира...

Остави коментар