„Енвидија“ го претстави наследникот на чипот што направи бум во ВИ

Главниот извршен директор на корпорацијата „Енвидија“ (Nvidia), Џенсен Хуанг, ги покажа новите чипови насочени кон проширување на доминацијата на неговата компанија во битката за вештачка интелигенција, позиција што веќе ја направи компанијата трет највреден бизнис во светот.

Новиот дизајн на процесорот наречен Блеквел (Blackwell) е повеќекратно побрз во управувањето со моделите што ја поткрепуваат вештачката интелигенција, посочи компанијата на својата конференција ГТЦ (GTC) во Сан Хозе, Калифорнија. Тоа го вклучува и процесот на развивање на технологијата - фаза позната како обука - како и нејзиното спроведување.

Чиповите Блеквел, кои се составени од 208 милијарди транзистори, ќе бидат основата на новите компјутери и други производи што ќе ги користат најголемите светски центри за податоци - список што вклучува компании како „Амазон“ (Amazon.com Inc.), „Мајкрософт“ (Microsoft Corp.), „Алфабет“ (Alphabet Inc) и „Оркл“ (Oracle Corp). Производи базирани на чиповите Блеквел ќе бидат достапни подоцна годинава, соопшти „Енвидија“.

Чипот е именуван по Дејвид Блеквел, првиот црн научник примен во Националната академија на науките, но треба да се покаже како достоен за својот претходник. Тоа беше Хопер, кој поттикна експлозивни продажби за „Енвидија“ поставувајќи ги основите на полето за забрзан развој на вештачката интелигенција. Водечкиот производ од таа линија, H100, стана еден од најценетите производи во технолошкиот свет - достигнувајќи цена и од десетици илјади долари по чип.

Растот ја зголеми и вредноста на „Енвидија“. Тоа е првиот производител на чипови што има пазарна капитализација од повеќе од 2 трилиона долари и во поширока смисла ги следи само „Мајкрософт“ и „Епл“ (Apple).

Најавата за нови чипови беше широко очекувана, а акциите на „Енвидија“ се зголемија за 79 отсто годинава до затворањето во понеделникот. Тоа им отежна на презентерите да ги импресионираат инвеститорите, кои ги намалија акциите за околу 1 отсто во продолженото тргување.

Хуанг, соосновачот на „Енвидија“, рече дека вештачката интелигенција е движечка сила на фундаментална промена во економијата и дека чиповите Блеквел се „мотор за напојување на оваа нова индустриска револуција“.

„Енвидија“ „соработува со најдинамичните компании во светот, ќе го реализираме ветувањето за вештачка интелигенција за секоја индустрија“, рече тој на конференцијата во понеделникот, првиот настан на компанијата по пандемијата.

Новиот дизајн на чипот има еден куп транзистори - мали прекинувачи што им даваат на полупроводниците способност да складираат и обработуваат информации - што е премногу голем број за конвенционалните техники на производство. Тоа се всушност два чипа што се споени еден со друг преку врска што гарантира дека ќе дејствуваат беспрекорно како еден, велат од компанијата. Производствениот партнер на „Енвидија“, ТСМЦ (Taiwan Semiconductor Manufacturing Co.), ќе ја користи својата техника 4НП (4NP) за производство на продуктот.

Блеквел исто така ќе има подобрена способност за поврзување со други чипови и нов начин на собирање податоци поврзани со вештачката интелигенција што го забрзува процесот. Тоа е дел од следната верзија на линијата суперчипови на компанијата, што значи дека е комбинирана со централната процесорска единица на „Енвидија“ наречена Грејс. Корисниците ќе имаат избор да ги спојат тие производи со нови мрежни чипови - еден што користи комерцијален стандард „инфинити бенд“ (InfiniBand) и друг што се потпира на потрадиционалниот етернет-протокол. „Енвидија“ исто така ги ажурира своите сервери HGX со новиот чип.

 

За повеќе информации прочитајте го текстот на „Блумберг“.

Во моментов нема коментари за веста. Биди прв да коментира...

Остави коментар