Високообразованите ќе бидат најголеми жртви на вештачката интелигенција

Глобалниот бум на вештачката интелигенција ќе донесе период на зголемена продуктивност и поголем просперитет за некои, но исто така и големи шокови за други, главно високообразовани работници, се вели во новиот извештај на консултантската фирма „МекКинси“ (McKinsey & Co).

Цели деловни сектори, од продажба и маркетинг до операции со клиентите, ќе станат сè позависни од софтверот - со потенцијални економски придобивки од дури 4,4 илјади милијарди долари, што е околу 4,4 проценти од светската економија - истакнува одделот за истражување на „МекКинси“.

Вештачката интелигенција ќе им даде на луѓето нова „супермоќ“, а на економијата многу потребната инјекција на продуктивност, рече Лареина Ји, постар партнер во фирмата и претседател на „МекКинси Технолоџи“ (McKinsey Technology).

Bloomberg

Во истражувањетто се опфатени 63 примери на примена на генеративна вештачка интелигенција, односно алатки кои можат да креираат содржини како текст или слики по барање, за околу 850 занимања. Во зависност од тоа како технологијата се усвојува и применува, придобивките од продуктивноста во следните 20 години би можеле да се движат помеѓу 0,1 и 0,6 проценти, покажа студијата.

„Бизнис-лидерите треба да разберат кои активности можат да се променат и како сакаат да ги преиспитаат“, рече Ји. „Тоа е лидерски избор, но и прашање на изведба“.

Трансформацијата ќе изврши притисок врз работната сила, особено врз работниците со високи плати чии активности „претходно се сметаа за релативно отпорни на автоматизација“, се вели во извештајот.

Пред неколку години, „МекКинси“ процени дека приближно половина од работните часови ширум светот се трошат на задачи што можат да се автоматизираат. Сега таа бројка се искачува на 60-70 проценти. Вработените може да откријат дека нивните часови се менуваат или нивните работни места исчезнуваат. „На работниците ќе им треба поддршка при стекнување нови вештини“, се наведува во извештајот. „Некои ќе сменат професии“.

Брза промена

Околу 75 проценти од потенцијалната вредност на применетата генеративна вештачка интелигенција доаѓа во четири деловни функции: операции со клиенти, маркетинг и продажба, софтверско инженерство и истражување и развој.

Само банките би можеле да остварат дополнителни 200 до 340 милијарди долари зголемена продуктивност, се тврди во извештајот, бидејќи новата технологија го подобрува задоволството на клиентите, го помага донесувањето одлуки и ја намалува можноста за измама преку подобар надзор. Ова би значело скок на оперативната добивка некаде помеѓу 9 и 15 проценти.

Истражувањето и развојот на производството би можеле да добијат зголемување на продуктивноста од 10 до 15 проценти,велат од „МекКинси“. Беше споменат примерот на индустријата за животни науки и хемиската индустрија, каде што вештачката интелигенција може побрзо да генерира потенцијални молекули, забрзувајќи го процесот на развој на нови лекови и материјали. Ова може да донесе до 25 отсто повеќе профит на компаниите за фармацевтски и медицински производи.

Bloomberg

И сето ова брзо се развива. Претходното истражување на компанијата покажа дека 2027 година ќе биде првата година кога технологијата на вештачка интелигенција ќе може да ги достигне перформансите на типичен човек во задачите што вклучуваат „разбирање природен јазик“. Сега „МекКинси“ верува дека тоа ќе се случи оваа година.

Усвојувањето на автоматизацијата ќе биде побрзо во развиените економии, каде што повисоките плати ќе овозможат тоа да се случи порано, отколку во посиромашните земји - и ќе влијае на квалификуваната работна сила повеќе отколку на физичките работници.

Во овој поглед, тој е во спротивност со претходните големи технолошки надградби кои често доаѓаа на сметка на занимањата каде работниците имаа помалку образовни квалификации и беа помалку платени. Многумина извршуваа физички задачи - како што се британските текстилни работници кои ги уништија новите машини за ткаење, движење кое стана познато како „Лудити“.

Спротивно на тоа, новата смена „ќе ја доведе во прашање вредноста на дипломите и годините на образование“, се вели во извештајот.

Проекциите на „МекКинси“ за составот на работната сила се усогласуваат со работен документ на Националното биро за економски истражувања објавен овој месец.

Таа студија предвидува и значителна реорганизација на работата. „Инвестициите во вештачката интелигенција се поврзани со намалување на хиерархиската структура во компаниите, значително зголемување на уделот на работниците на помладото ниво и намалување на уделот на работниците на средно раководство и повисоки позиции“, се заклучува во студијата.

Во моментов нема коментари за веста. Биди прв да коментира...

Остави коментар