text size
Американскиот технолошки гигант „Амазон“ (Amazon.com Inc.) најави дека ќе отпушти околу 14.000 работници во голема реорганизација на компанијата. Оваа одлука, која е дел од поопширните напори за намалување на бирократијата и оптимизирање на организацијата, беше потврдена во денешна објава од Бет Галети, потпретседателка за луѓе и технологија во „Амазон“.
„Отпуштањата што ги објавуваме денес се продолжение на нашите напори да станеме посилни, преку понатамошно намалување на слоевите и преместување на ресурсите за да осигуриме дека ќе инвестираме во најголемите заложби на компанијата и во потребите на нашите клиенти, како сегашни така и идни“, напиша Галети.
Иако официјалните бројки говорат за кратење на 14.000 работни места, според неофицијални извори, бројката на отпуштени лица може да достигне и 30.000, како што пренесе „Ројтерс“ во понеделникот. Оваа реорганизација се случува во време кога компанијата, која во 2023 година имаше 1,55 милион вработени, се подготвува за објавување на финансиските резултати за кварталот што заврши на 30 септември.
Отпуштањата и реорганизацијата не се новина за „Амазон“. Откога е на чело на компанијата, извршниот директор Енди Џаси иницираше серија на намалувања на работни места, кои започнаа во крајот на 2022 година и продолжија во 2023 година. Претходно беа елиминирани околу 27.000 корпоративни работни места, а Џаси продолжува да инсистира на зголемување на автоматизацијата, како дел од стратегијата за намалување на зависноста од човечки работници.
Експертите сметаат дека ваквите потези на „Амазон“ се последица на сè поприсутната употреба на вештачка интелигенција во компанијата, која ја заменува потребата од човечки работници во дел од операциите. Џаси веќе сигнализираше дека за компанијата е неопходно намалување на бројот на вработените, особено по бумот на вработувања што следуваше по пандемијата.
Како резултат на оваа реорганизација, „Амазон“ продолжува да се фокусира на своите најважни стратегии и инвестиции, со цел да остане конкурентна на глобалниот пазар и да се приспособи на новите технологии што ја обликуваат иднината на работењето.
.webp){kind=icon}
