Канцелариските работници се најголеми губитници од развојот на ВИ

Глобалниот бум на генеративната вештачка интелигенција ќе донесе ера на забрзана продуктивност и поголем просперитет за некои, но и големи проблеми за други, првенствено најобразованите и најплатените работници на знаење, се вели во новиот извештај на консултантската фирма „Мекинзи“ (McKinsey & Co).

Цела низа деловни активности, од продажба и маркетинг до услуги за клиентите, најверојатно ќе почнат да се потпираат повеќе на софтвер - со потенцијални економски придобивки од дури 4,4 билиони долари, или околу 4,4 проценти од глобалното економско производство - според студијата на истражувачкиот сектор на фирмата.

Генеративната вештачка интелигенција ќе им даде на луѓето нова „супермоќ“, а на економијата добредојдена инјекција на продуктивност, посочува во извештајот Лареина Ји, постара партнерка во фирмата и претседателка на „Мекинзи технолоџи“.

Истражувањето испитувало 63 случаи на употреба на генеративна вештачка интелигенција, тип на алатка што може да генерира содржина како текст или слики врз основа на прашања, во околу 850 занимања. Во зависност од тоа како ќе се усвои и имплементира технологијата, придобивките од продуктивноста би можеле да се движат помеѓу 0,1 и 0,6 проценти во следните 20 години, покажа студијата.

„Бизнис-лидерите треба да разберат кои активности може да се променат и како сакаат да му пристапат на тоа“, вели Ји. „Тоа е избор на раководството и бара извршување“.

ВИ ќе донесе поголема продуктивност и профит Bloomberg

Трансформацијата ќе изврши притисок врз работната сила, особено врз високоплатените работници со знаење чии активности „претходно се сметаше дека се релативно имуни на автоматизацијата“, се наведува во извештајот.

Пред неколку години, „Мекинзи“ процени дека околу половина од работните часови низ светот се потрошени на задачи што може да се автоматизираат. Сега таа процена е зголемена дури на 60-70 проценти. Вработените може да се соочат со тоа нивното време да биде прераспределено - или дека нивните работни места едноставно исчезнуваат. „На работниците ќе им биде потребна поддршка во учењето на нови вештини“, се наведува во извештајот. „Некои ќе ги сменат професиите“.

Брзи промени

Околу 75 отсто од потенцијалната вредност од применетата генеративна вештачка интелигенција ќе дојде во четири деловни функции: услуги за клиентите, маркетинг и продажба, софтверско инженерство и истражување и развој.

Само банките би можеле да генерираат дополнителни 200-340 милијарди долари од зголемена продуктивност, се наведува во извештајот, бидејќи новата технологија го подобрува задоволството на клиентите, го помага донесувањето одлуки и ја намалува измамата преку подобар надзор. Тоа би било еднакво на скок на оперативниот профит од некаде меѓу 9 и 15 проценти.

Во истражувањето и развојот на производи, технологијата би можела да ја зголеми продуктивноста за 10-15 проценти, истакнува „Мекинзи“. Се наведува пример од фармацевтската и хемиската индустрија, каде што вештачката интелигенција може побрзо да генерира потенцијални молекули, забрзувајќи го процесот на развој на нови лекови и материјали. Тоа може да донесе дури 25 отсто повеќе профит за производителите на медицински производи.

И сè се развива брзо. Претходното истражување на компанијата сугерираше дека 2027 година ќе биде првата година кога технологијата на вештачка интелигенција ќе може да одговара на перформансите на типичен човек во задачите што вклучуваат „разбирање природен јазик“. Сега, „Мекинзи“ смета дека тоа ќе се случи оваа година.

Усвојувањето на автоматизацијата ќе биде побрзо во развиените економии, каде што повисоките плати ќе го направат тоа остварливо побрзо, отколку во посиромашните - и ќе влијае на канцелариската работа многу повеќе отколку на физичките задачи.

ВИ ги зголемува ризиците за најобразованите работници Bloomberg

Во овој поглед, ова е спротивно на големите технолошки надградби од минатото, кои често доаѓаа на сметка на занимањата во кои работниците имаа пониски образовни квалификации и беа помалку платени. Многумина извршуваа физички задачи - како британските текстилни работници, кои ја уништија новата текстилна машинерија за заштеда на трошоци, движење што стана познато како „Лудити“.

Наспроти тоа, новата промена „ќе го оспори стекнувањето повеќегодишни дипломи“, според  „Мекинзи“.

Проекциите на „Мекинзи“ за составот на работната сила се во согласност со работниот документ на Националното биро за економски истражувања објавен овој месец од експерти од бизнис-школата „Колумбија“, Универзитетот во Мериленд, Универзитетот  во Беркли и „Еј-ај фор гуд“ (AI for Good).

Таа студија предвидува и значајна реорганизација на работата. „Инвестициите во вештачката интелигенција се поврзани со израмнување на хиерархиската структура на фирмите, со значително зголемување на уделот на работниците на пониско ниво и намалување на уделот на работници на средни и повисоки позиции“, се наведува во студијата.

Во моментов нема коментари за веста. Биди прв да коментира...

Остави коментар