Трамп предупреди дека договорот меѓу „Нетфликс“ и „Ворнер“ може да биде антимонополски проблем

Претседателот на САД, Доналд Трамп, изрази загриженост за потенцијален антимонополски проблем во врска со планираното преземање на „Ворнер брос дискавери“ (Warner Bros. Discovery Inc.) од страна на „Нетфликс“ (Netflix Inc.) за 72 милијарди долари. Тој истакна дека пазарниот удел на комбинираниот ентитет може да претставува проблем.

Коментарите на Трамп, дадени кога пристигна во центарот Кенеди на настан во неделата, може да предизвикаат загриженост дека регулаторите ќе се спротивстават на спојувањето на доминантната светска стриминг услуга со холивудската икона. Компанијата инаку се соочува со долга ревизија на договорот од страна на Министерството за правда, а одобрувањето на спојувањето би ја преобликувало индустријата за забава.

„Па, тоа мора да помине низ процес и ќе видиме што ќе се случи“, рече Трамп кога беше прашан за договорот, потврдувајќи дека неодамна се сретнал со коизвршниот директор на „Нетфликс“, Тед Сарандос. „Но, тоа е голем пазарен удел. Може да биде проблем.“

Облозите на пазарот за предвидувања „Полимаркет“ (Polymarket) покажаа 23 проценти шанса „Нетфликс“ да го затвори преземањето до крајот на 2026 година, што е драстично намалување од околу 60 отсто непосредно пред коментарите на Трамп. Акциите на „Ворнер брос“ пораснаа за еден отсто во раното тргување на платформата за тргување „Блу оушн“ (Blue Ocean), додека акциите на „Нетфликс“ паднаа за 1,4 отсто.

Трансакцијата би го споила водечкиот стриминг играч во светот со „Ејџ-би-о макс“ (HBO Max). Антимонополскиот оддел на Министерството за правда, кој ќе ја разгледува трансакцијата во САД, би можел да тврди дека договорот е нелегален бидејќи комбинираниот пазарен удел би го поставил „Нетфликс“ далеку над прагот од 30 проценти.

„’Нетфликс’ има многу голем пазарен удел, а кога би го имале и ‘Ворнер’, знаете, тој удел многу се зголемува“, рече претседателот, додавајќи дека лично ќе биде вклучен во процесот на донесување одлуки.

Bloomberg Mercury

 

Се очекува „Нетфликс“ да сепотпре на тоа дека и други услуги како што се Јутјуб (YouTube) на „Алфабет“ (Alphabet Inc.) и Тикток (TikTok) на „Бајтденс“ (ByteDance Ltd.) треба да бидат вклучени во секоја анализа на пазарот, што драматично би ја намалило перцепираната доминација на платформата на пазарот.

Сарандос од „Нетфликс“ неодамна се сретна со Трамп во Белата куќа за да лобира за аквизицијата, објави претходно „Блумберг“. „Нетфликс“ не е никаков семоќен монопол, тврдеше извршниот директор во тоа време, а претрпе и загуба на претплатници неколку години претходно, според луѓе запознаени со ова прашање.

Со изборот на „Нетфликс“, „Ворнер брос“ всушност се откажа од „Парамаунт скајденс“ (Paramount Skydance Corp.), потег што ризикува да предизвика политичка битка во Вашингтон. „Парамаунт“ е поддржан од вториот најбогат човек во светот, Лари Елисон, и ги промовираше долгогодишните врски со Трамп. Аквизицијата на „Парамаунт“, која беше завршена во август, доби јавна пофалба од претседателот.

Американските пратеници од двете партии, вклучувајќи го републиканскиот претставник Дарел Иса и демократската сенаторка Елизабет Ворен, веќе ја критикуваа трансакцијата која би создала глобален стриминг гигант со 450 милиони корисници и ја дефинираа како штетна за потрошувачите.

„Не мислам дека тоа навистина создава монополска ситуација“, изјави ветеранот од Волстрит, Ед Јардени, од „Јардени рисрч“ (Yardeni Research) за ТВ „Блумберг“. „Технолошките монополи не траат многу долго затоа што некој ќе сфати како да се натпреварува против нив, а сигурно постојат многу други стриминг услуги.“

И регулаторите на Европската Унија веројатно ќе спроведат интензивна ревизија на предлогот на „Нетфликс“. Во Велика Британија договорот веќе беше предмет на критика и се разгледува како трансакцијата би влијаела на конкуренцијата и потрошувачките цени.

Дури и ако антимонополските ревизии се фокусираат само на стримингот, „Нетфликс“ верува дека на крајот ќе победи, посочувајќи ги „Прајм“ (Prime) на „Амазон“ (Amazon.com Inc.) и „Волт Дизни“ (Walt Disney Co.) како други големи конкуренти, посочуваат луѓе запознаени со размислувањето на компанијата.

Се очекува „Нетфликс“ да тврди дека повеќе од 75 проценти од претплатниците на „Ејџ-би-о макс“ (HBO Max) веќе се претплатени и на „Нетфликс“, што ги прави комплементарни понуди, а не конкуренти, велат луѓе запознаени со ова прашање, кои побараа да не бидат именувани бидејќи споделуваат доверливи размислувања. Се очекува компанијата да го изнесе и тврдењето дека намалувањето на трошоците за содржина преку поседување на „Ворнер брос“, елиминирањето на непотребната „back-end“ технологија и здружувањето на „Нетфликс“ со „Макс“ ќе донесе пониски цени.