„Парамаунт“ се спогоди - конечно може да го преземе „Ворнер Брос“ за 110 милијарди долари

 „Парамаунт“ (Paramount Skydance Corp.) постигна спогодба во врска со тужбите поднесени од јавните обвинители на 12 американски сојузни држави и синдикатот на филмските работници „Writers Guild“; овој потег ќе ѝ овозможи на компанијата да ја финализира историската аквизиција на „Ворнер Брос“ (Warner Bros. Discovery Inc.) вредна 110 милијарди долари.

Засегнатите страни работеа и за време на викендот за да го постигнат договорот, кој вклучува заштитни мерки наменети за ограничување на пазарната моќ и обезбедување на уредувачката независност на медиумскиот гигант. Оваа компанија ќе управува со две од најголемите холивудски студија, два големи стриминг-сервиси со претплата и десетици ТВ-канали, од „Си-би-ес“ (CBS) до „Ејџ-би-о“ (HBO).

„Парамаунт“ вети дека ќе реализира по 30 филмови годишно преку своите здружени студија – потег наменет да ги смири сопствениците на кина и холивудските креативци кои стравуваа дека спојувањето ќе го намали обемот на филмска продукција.

Во обид да ги смири политичарите и синдикатите кои се плашеа дека „Парамаунт“ би можел да го премести своето значајно присуство од Калифорнија, компанијата се согласи да ги задржи своите операции во Лос Анџелес, да не ги продава своите големи студиски комплекси и да инвестира 1,5 милијарди долари во домашна филмска и ТВ-продукција.

„Повеќе продукции значат повеќе работа овде, дома, и повеќе филмови за прикажување во кината, што носи поголем бизнис“, изјави во понеделникот јавниот обвинител на Калифорнија, Роб Бонта.

Акциите на „Парамаунт“ и на „Ворнер Брос.“ пораснаа во понеделникот откако „Блумберг Њуз“ прв објави дека е постигната спогодба, при што акциите на „Ворнер“ сега се тргуваат многу блиску до цената на аквизицијата од 31 долар по акција.

„Условите на спогодбата се многу разумни“, изјави во интервју Дејвид Џојс, виш аналитичар во  „Сипорт Рисрч Партнерс“ (Seaport Research Partners). Договорот вклучува „поцврсти механизми“ за спроведување на условите поврзани со гаранциите за дистрибуција на филмови.

Заканата на „Парамаунт“ дека ќе се исели од Калифорнија веројатно претставуваше силен поттик за постигнување на договорот.

„Тоа ќе беше навистина катастрофално за индустријата во Калифорнија и за сите придружни дејности поврзани со неа, така што сметам дека ова е дефинитивно најдоброто можно сценарио за сите вклучени страни“, рече Џојс.

Јавните обвинители од 12 сојузни држави – сите под контрола на демократите– и синдикатот сценаристите  поднесоа тужби за да ја блокираат аквизицијата на „Ворнер Брос.“ од страна на „Парамаунт“ вредна 110 милијарди долари, тврдејќи дека тоа би ѝ обезбедило на компанијата прекумерен удел во филмската индустрија и во секторот за кабелска телевизија.

Тужбата ја предводеше Бонта, кој со недели заземаше остар став во јавните настапи, изјавувајќи дека се противи на решенија што нема да донесат структурни промени кај споените компании. Бонта се најде во сè поголема изолираност откако потенцијалните противници на спојувањето – вклучително и големи ланци на кина и некои од најистакнатите политичари во неговата држава – се чинеше дека го поддржуваат договорот и го повикуваа да прифати спогодба.

Четири сојузни држави – Масачусетс, Њујорк, Конектикат и Минесота – долго време се противеа на евентуална спогодба, но на крајот заклучија дека трошоците за правната битка не се оправдани без Калифорнија на чело на процесот, изјави изворот.

Државите што најдолго се противеа сепак успеаја, во текот на изминатата недела, како дел од договорот да обезбедат формирање независен уредувачки одбор за „Си-би-ес“ и „Си-ен-ен“, рече изворот. Зајакнувањето на независноста на одборот беше една од причините поради кои овие држави на крајот се согласија на договорот, додаде изворот. Одборот ќе биде составен исклучиво од новинари, без учество на раководители или акционери, а ќе биде задолжително да се одржува политичка рамнотежа во неговиот состав.

Регулаторните тела во речиси 70 јурисдикции веќе го одобрија спојувањето, а Федералната комисија за комуникации и други федерални агенции дадоа зелено светло за исклучително високо ниво на странско финансирање, што укажува на тоа дека аквизицијата веројатно наскоро ќе биде финализирана.

„Парамаунт“  планираше финализирање на процесот во третиот квартал и вети исплата на пенали во висина од 7 милиони долари дневно кон „Ворнер Брос“ доколку спојувањето не се реализира до крајот на овој месец. „Парамаунт“ исто така се согласи да плати отштета од 7 милијарди долари во случај спојувањето да не биде одобрено – услови што компанијата ги понуди во февруари за да го преземе договорот со „Ворнер Брос“ од претходно склучениот договор за продажба со „Нетфликс“ (Netflix Inc.).