„Адвент“ и „Страјп“ се откажаа од обидот за преземање на „Пејпал“ за 50 милијарди долари

Конзорциумот на инвестициската компанија „Адвент“ (Advent) и компанијата за обработка на плаќања „Страјп“ (Stripe) одлучи да се откаже од обидот за преземање на пионерот во финансиската технологија „Пејпал“ (PayPal Holdings Inc.), потенцијална зделка што ќе беше меѓу најголемите преземања со задолжување досега, изјавија луѓе запознаени со случајот.

Групацијата повеќе не преговара за зделка со „Пејпал“, рекоа изворите, барајќи да не бидат именувани бидејќи информациите се доверливи. Претходно таа понудила повеќе од 50 милијарди долари за компанијата, изјавија луѓе запознаени со случајот.

Акциите на „Пејпал“ паднаа за дури 14 отсто во продолженото тргување во петокот на алтернативната платформа „Блу оушн“ (Blue Ocean). Претставниците на „Адвент“, „Пејпал“ и „Страјп“ одбија да коментираат.

Основан кон крајот на 1990-тите години, „Пејпал“ беше меѓу првите компании во дигиталното плаќање. Оттогаш компанијата има тешкотии со модернизирањето на своите технологии за плаќање, бидејќи конкурентите како „Епл“ (Apple Inc.) и „Алфабет“ (Alphabet Inc.) освоија дел од пазарот.

„Блумберг њуз“ (Bloomberg News) прв објави во февруари дека „Страјп“ размислува за преземање делови од „Пејпал“ или на целата компанија, откако падот на акциите избриша дел од нејзината вредност.

Интересот за преземање, заедно со резултатите за вториот квартал што ги надминаа процените на аналитичарите, ѝ помогна на компанијата да закрепне. Акциите на „Пејпал“ скокнаа за повеќе од 40 отсто овој квартал, со што пазарната вредност на компанијата достигна околу 52,6 милијарди долари.

Bloomberg

 

„Пејпал“, со седиште во Сан Хозе, Калифорнија, претходно оваа година го смени поранешниот главен извршен директор Алекс Крис, а на негово место дојде Енрике Лорес, кој ја презеде функцијата во март. Лорес рече дека ќе постави конкретни финансиски цели за „Пејпал“, ќе го промени начинот на кој компанијата за плаќања ги објавува резултатите и на секоја деловна линија ќе ѝ определи конкретна цел за приходите, за инвеститорите да добијат појасна претстава за нивниот потенцијал.

„Волстрит џурнал“ овој месец објави дека „Пејпал“ ја оценил првичната понуда на „Адвент“ и „Страјп“ како недоволна и дека двете страни преговарале за потенцијално повисока цена.

„Адвент“ и „Страјп“ секогаш може да одлучат повторно да се вклучат подоцна ако ситуацијата се промени.

Од друга страна, „Страјп“ сè подлабоко навлегува во инфраструктурата што го поддржува подемот на вештачката интелигенција. Претходно овој месец компанијата се согласи да го купи „Опенрутер“ (OpenRouter Inc.), брзорастечки портал што овозможува пристап до стотици модели на ВИ.