Исклучителна недела за „Енвидија“ - пазарната вредност се зголеми за 400 милијарди долари

Дури и за Џенсен Хуанг, неделата беше исклучителна.

Извршниот директор на „Енвидија“ ја предводеше првата конференција за девелопери на неговата компанија во Вашингтон во вторникот, а неделата ја заврши во Јужна Кореја, каде што вечераше пржено пилешко со пиво заедно со раководителите на „Самсунг електроникс“ и „Хјундаи моторс“. Во меѓувреме, склучи бројни договори со компании како „Нокиа“, „Убер технолоџис“ и „Ели Лили“.

Во последните пет дена, „Енвидија“ додаде речиси 400 милијарди долари на својата пазарна вредност и не на пат да стане првата компанија во историјата со вредност од 5 билиони долари. Сам Хуанг додаде повеќе од 9 милијарди долари на своето лично богатство, кое сега изнесува речиси 176 милијарди долари, според Bloomberg Billionaires Index.

Bloomberg

Извршниот директор на „Енвидија“, Џенсен Хуанг, и извршниот директор на „Нокиа“, Џастин Хотард, разговараа за плановите на „Енвидија“ да инвестира 1 милијарда долари во „Нокиа“ и за иднината на вештачката интелигенција на конференцијата на производителот на чипови во Вашингтон, во разговор со Ед Ладлоу од „Блумберг“.

62-годишниот основач на „Енвидија“ е на мисија да го забрза глобалното прифаќање на вештачката интелигенција и да ја донесе технологијата на „Енвидија“ во секој агол од економијата. Хуанг исто така се обидува да ги убеди скептиците од Волстрит, кои предупредуваат на „балон“, дека билионските инвестиции во инфраструктура — вклучувајќи ги и неговите вредни чипови — наскоро ќе се исплатат.

„’Енвидија‘ навистина вложува таму каде што најавува“, рече Џоан Фини, партнер и портфолио менаџер во „Едвајсорс капитал менаџмент“, која има удели во компанијата. „Тие се обидуваат да дадат конкретни примери за употреба на ВИ и вредноста што ја гледаат како се монетизира.“

Низата инвестиции и партнерства објавени во последниве денови ветуваат поврзување на ВИ чиповите и софтверот на „Енвидија“ со поширок спектар индустрии — од телекомуникации до транспорт и здравство. Тоа ќе помогне да се намали зависноста од продажбата на технолошки гиганти како „Мајкрософт“ и „Мета“, чии дата-центри сочинуваат околу половина од приходите на „Енвидија“ и чие трошење ги поттикна стравувањата од ВИ балон.

Како и т.н. „хиперскејлери“ кои ги купуваат нејзините чипови за дата-центри, „Енвидија“ има милијарди долари во готовина на својата билансна состојба кои може да ги искористи за овие трансакции. „Сите тие компании имаат висок паричен тек за да ги финансираат овие активности“, рече Марџи Пател, виш портфолио менаџер во „Олспринг глобал“, во интервју за ТВ Блумберг. „Нема знаци дека го губат ентузијазмот за инвестирање за да останат во водство.“

Bloomberg

Со наоѓање примена за своите производи во автономни такси, фармацевтски лаборатории, мобилни мрежи и дури и во непотврдениот сектор на квантно компјутерство, „Енвидија“ од Санта Клара, Калифорнија, поставува основа за идната генерација на клиенти. Таа исто така останува пред своите конкуренти

„Можеме да видиме дека стратегијата на Џенсен е едноставно – максимизирај присуство“, рече Владимир Галабов, виш истражувачки директор во „Омдија“, во интервју за ТВ Блумберг. „Во суштина, Џенсен им вели на својата армија девелопери: ’Сакам да помогнете на оваа индустрија, и на оваа, и на оваа.‘“

Облечен во својата препознатлива црна кожна јакна, Хуанг најави широк спектар нови партнерства на настанот на „Енвидија“ во Вашингтон во вторникот пред илјадници хардверски и софтверски развивачи. Најзначајни беа инвестицијата од 1 милијарда долари во мрежниот гигант „Нокиа“, плановите за опремување на 100.000 возила на „Убер“ со технологија на „Енвидија“ …

„Сега стигнавме до нашата пресвртна точка и тоа е навистина извонредно“, рече Џенсен Хуанг пред преполната сала за конвенции, неколку блокови од Белата куќа. „Сега, за првпат, вештачката интелигенција ќе се вклучи во таа глобална економија од 100 билиони долари“, рече тој, „и ќе ја направи попродуктивна, ќе ја забрза и ќе ја прошири.“

На големата конференција во вторникот, Хуанг беше присутен насекаде — како домаќин, водител, почесен гостин, па дури и како келнер — кога лично им подаде шишиња вода на четворица изненадени директори, чија панел-дебата во живо ја прекина еден час пред своето главно обраќање.

„Еднаш келнер, секогаш келнер“, се пошегува тој, алудирајќи на основањето на „Енвидија“ во 1993 година во ресторан на каде што работел како келнер додека бил средношколец.

Чимек (пилешко и пиво)

Од Вашингтон, Хуанг отпатува во Јужна Кореја, каде што продолжија трансакциите. Во петокот, тој објави планови за испорака на над 260.000 ВИ чипови за „Самсунг“, „Хјундаи“, „Ск груп“ и владата, прославувајќи ги договорите со пилешко и пиво во Сеул. Овие договори се надоврзуваат на брзорастечката листа на ВИ и дата-центарски проекти на „Енвидија“ во странство, започнати оваа година во Обединетото Кралство, Саудиска Арабија и Обединетите Арапски Емирати.

Голем дел од активностите на компанијата оваа недела беа внимателно координирани за да се усогласат со економската политика „Америка на прво место“ на претседателот Доналд Трамп, која се фокусира на зголемување на домашните инвестиции — особено во напредни фабрики — и извоз на американска технологија кон сојузници и трговски партнери. Хуанг јавно ја пофали економската агенда на Трамп и ја истакна посветеноста на „Енвидија“ да произведува чипови со најновиот „блеквел“ дизајн во САД, во фабрика управувана од долгогодишниот партнер „Тајван семикондактор“

„Првото нешто што претседателот Трамп ми го побара беше да го вратиме производството, бидејќи е неопходно за националната безбедност“, рече Хуанг, кој се обврза да инвестира 500 милијарди долари во наредните години за изградба на ВИ инфраструктура во САД. „Девет месеци подоцна, веќе сме во целосно производство во Аризона.“

По реизборот на Трамп, „Енвидија“ ги зголеми трошоците за лобирање на околу 3,5 милиони долари во првите девет месеци од оваа година, во споредба со 640.000 долари за целата 2024 година. Компанијата исто така донираше 1 милион долари за инаугурацијата на Трамп. Хуанг му се придружи на претседателот при објавувањето на владината ВИ акциска програма и учествуваше на официјални патувања во Обединетото Кралство и Блискиот Исток за промоција на нови договори за чипови. Двајцата изградиле блиска врска, при што Трамп го пофали Хуанг оваа недела како „неверојатен, брилијантен човек.“

Иако Хуанг доби одредено олеснување од рестриктивните мерки на администрацијата на Бајден, „Енвидија“ сè уште има забрана за продажба на ВИ чипови кои би донеле големи приходи во Кина — најголемиот пазар за полуспроводници во светот. Трговскиот договор меѓу САД и Кина објавен во четврток не вклучува одобрување за продажба на „блеквел“ чипови на кинески клиенти, а претставници од администрацијата на Трамп дадоа до знаење дека таков потег засега не е во план.

Ако „Енвидија“ добие дозвола да испорачува понапредни производи во Кина, би можела да искористи пазарна можност вредна 50 милијарди долари, рече Хуанг во август. Огромната побарувачка за ВИ системи во Кина значи дека тој пазар расте со 50 отсто годишно, додаде тој.

Овој застој со Кина го забави растот на акциите на компанијата и ги засили стравувањата кај некои инвеститори од Волстрит дека се формира ВИ балон. Тие се плашат дека вештачката интелигенција можеби нема да ги исполни очекувањата за нови извори на приходи кои би ги оправдале стотиците милијарди долари вложени во дата-центри и чипови на „Енвидија“.

Џеј Голдберг, виш аналитичар во „Сипорт глобал“, предупреди дека постојат фундаментални прашања околу глобалната изградба на дата-центри и примената на ВИ во економијата. Од 80 аналитичари од Волстрит кои ја следат „Енвидија“, според „Блумберг“, Голдберг е единствениот со препорака за продажба.

„Ниту една технологија од ваков обем не е прифатена по праволиниски пат, и ќе има болни моменти, ќе има застои, ќе има повлекувања“, рече Голдберг во интервју за Тв Блумберг. „Ќе ни требаат уште неколку години за да сфатиме за што ВИ навистина служи, во што е добра и кои се одржливите деловни модели.“