Еден оброк на Џенсен Хуанг ја раздвижи берзата во Јужна Кореја

Фотографии и видеа од извршниот директор на „Енвидија“ (Nvidia), Џенсен Хуанг, кој во Сеул уживаше во пиво и пржено пилешко со челниците на „Самсунг електроникс“ (Samsung Electronics Co.) и „Хјундаи мотор“ (Hyundai Motor Co.), предизвикаа еуфорија на берзата.

Иако ресторанот „Канбу чикен“ (Kkanbu Chicken) не е на берзата, акциите на конкурентниот „Кјочон еф енд би“ (Kyochon F&B Co.) скокнаа за 20 отсто, а на „Черибро“ (Cherrybro Co.), производител на живина, достигнаа дневен лимит од 30 отсто, со тргување дури 200 пати над просекот. Компанијата „Неуромека“ (Neuromeka Co.), која произведува роботи за пржење пилешко, исто така забележа раст.

Настанот повторно покажа како виралните објави и мем-културата влијаат на јужнокорејскиот пазар на акции, каде што трговците бркаат брзи добивки врз основа на медиумски моменти, често без оглед на економски основи.

Хуанг наедно го користи престојот за продлабочување на присуството на „Енвидија“ во еден од клучните пазари, во време кога компанијата се соочува со сѐ построги ограничувања во Кина.

Во август сличен феномен беше забележан кога акциите на производителот на пенкала „Монами“ (MonAmi Co.) нагло пораснаа откако Доналд Трамп го пофали пенкалото на јужнокорејскиот претседател за време на нивната прва средба во Белата куќа.

Хуанг, кој неделава престојува во Јужна Кореја по повод самитот на извршни директори во рамките на АПЕК, беше забележан како им дели парчиња пилешко на полицаец и на случајни минувачи што се собраа пред ресторанот за да го видат.

„Ова е многу добро за здравјето, нели? Јас обожавам пржено пилешко и пиво, особено во друштво со пријателите“, им изјави Хуанг на новинарите собрани пред ресторанот во јужниот дел на Сеул.

Комбинацијата од пржено пилешко и пиво е исклучително популарна во Јужна Кореја и претставува неформален начин на дружење меѓу пријатели и колеги. Но вакво појавување на шефови на големите семејни корпорации, меѓу кои освен Хуанг беше и Џеј Ј. Ли, претседателот на „Самсунг електроникс“, е речиси невидено, особено во опуштена атмосфера, што ја направи средбата уште позабележителна.

Сепак, собирот беше повеќе од симболична сцена за медиумите. „Самсунг електроникс“ активно работи да ѝ ги испорача на „Енвидија“ своите најнапредни чипови со висока пропустливост на меморијата, а американската компанија има големи амбиции и во автомобилскиот сектор.

Хуанг го искористи престојот во Сеул за да објави нови договори за снабдување со ВИ-чипови за неколку големи јужнокорејски компании, меѓу кои „Самсунг електроникс“ и „Хјундаи мотор“, зделки што ќе ѝ овозможат на „Енвидија“ да го прошири своето присуство во земјата.

Bloomberg

За јужнокорејските конгломерати, поблиските врски со „Енвидија“ значат посигурно снабдување со графички процесори, клучни за обучување и работа на моделите на вештачка интелигенција.

„Имам многу партнери тука и многу објави што треба да ги направиме“, изјави Хуанг.

Ова не е првпат Хуанг да влијае на пазарот на акции. Во 2024 година неколку компании поврзани со ВИ забележаа силен раст на своите акции откако тој ги спомена во своја презентација – демонстрирајќи дека неговото влијание се простира далеку надвор од границите на „Енвидија“.