ВИ нема да донесе драматични промени во финансиската индустрија, вели познат милијардер

Вештачката интелигенција (ВИ) може да ја подобри продуктивноста, но нема да донесе големи и значајни промени во индустријата, тврди милијардерот Кен Грифин, основач на хеџ-фондот „Ситадел“. Тој изрази сомнеж во тоа дека генеративната ВИ ќе има големо влијание во создавањето поголеми финансиски добивки или таканаречениот алфа-профит што го надминува пазарот.

Грифин, кој ја изгради својата компанија во глобален хеџ-фонд од 69 милијарди долари, истакна дека и покрај тоа што ВИ може да помогне во подобрување на продуктивноста и да го зголеми технолошкиот напредок, во моментот не ја заменува длабоката истражувачка работа што се прави во „Ситадел“.

„Генеративната ВИ може да има некаков ефект, но не очекувам дека ќе предизвика радикални промени, барем не во скоро време“, изјави Грифин на настанот на инвеститорската конференција на „ЏП Морган“ и „Робин Худ“ во Њујорк. Тој додава дека оваа технологија ќе има поголемо влијание на некои сектори, но нема да предизвика драматични промени во финансиската индустрија.

Ова не е првпат Грифин да изрази ваков став – и претходно ја нарекуваше вештачката интелигенција ограничена алатка кога станува збор за инвестициите. Тој е убеден дека, иако ВИ е корисна во подобрување на работните процеси, не е способна да го замени човечкиот труд во создавањето и анализата на инвестициите.

Според Грифин, технологијата на ВИ предизвикува поголем интерес во корпоративна Америка, која сега започнува да вложува повеќе во напредокот на технологијата и да ги поддржува технолошките тимови во своите компании. Но, како што вели тој, ваквите подобрувања требало да се случат уште пред 25 години.

Иако ВИ не донесува револуција во хеџ-фондовите, во иднина ќе продолжи да има влијание, но не на начинот на кој многумина очекуваат, смета тој.