Роботите во македонските компании и домови - пет вести на денот

Зголемувањето на приносите од обврзниците ќе го забави економскиот раст и ќе го ограничи ефектот од зголемените трошоци за енергија врз инфлацијата, изјави претседателката на Европската централна банка (ЕЦБ), Кристин Лагард.

„Иако растот е жилав, од нашиот последен состанок долгорочните каматни стапки значително се зголемија, што ќе го забави растот и ќе го намали ефектот за повеќе од проектираното во нашата септемвриска анализа“, изјави Лагард во понеделник.

Со оглед на тоа што досега не се забележани ефекти од втора рунда, тоа значи дека ЕЦБ треба да усвои „одмерен одговор како што е соодветно за да ја држи инфлацијата под контрола“, им рече таа на европските пратеници во Брисел.

Добро утро, ви пишува Игор Петровски од дигиталната редакција на Блумберг Адрија, ова се петте вести за почеток на денот:

 

Што кога роботите ќе влезат во македонските болници, домови, улици?

Роботите повеќе не се само механички раце затворени зад заштитните огради во фабриките. Денешните хуманоидни машини трчаат, носат товар, сортираат производи, учат движења од луѓето и работат покрај нив. Други влегуваат во болници и домови за стари лица, разговараат со луѓето, ги потсетуваат да земат лекови, реагираат на нивното движење и се обидуваат да им прават друштво.

За тоа како роботиката сѐ побрзо ја напушта строго контролираната фабричка средина и се приближува до човекот - прво до неговото работно место, а потоа до болницата, домот и секојдневните навики, „Блумберг Адрија“ разговараше со професор Петре Ламески, декан на Факултетот за информатички науки и компјутерско инженерство (ФИНКИ), и со доцент д-р Симона Домазетовска Марковска од Машинскиот факултет во Скопје.

 

Што ги чека македонските компании: Колкав поврат има инвестицијата во вештачка интелигенција

Само 20 отсто од сите компании вклучени во ова истражување остваруваат дури 74 отсто од приносите што се поттикнати од вештачката интелигенција. Која е причината за ваквата доминација? Во истражувањето се наведува дека подобрата подготвеност за ВИ подобрува широк спектар на посредни резултати во работењето, кои потоа влијаат врз финансиските резултати.

Компаниите лидери во употреба на вештачката интелигенција пријавуваат дека употребата на ВИ-алатки го забрзува лансирањето нови производи и услуги. Тие исто така велат дека ВИ помага во трансформирањето на нивните деловни и оперативни модели, го подобрува квалитетот на носењето одлуки и ги унапредува корисничкото искуство и довербата.

 

Големите технолошки компании сè повеќе се задолжуваат поради ВИ: Дали долгот станува проблем?

Технолошките гиганти започнаа еден од најголемите инвестициски циклуси во својата историја во време кога парите со кои го финансираат повторно поскапуваат. Компаниите што се занимаваат со ВИ вложуваат стотици милијарди долари во центри за податоци, чипови и друга инфраструктура, а дел од тие пари сè почесто ги обезбедуваат на пазарот на долг.

Тоа само по себе не мора да претставува проблем, со оглед на тоа што најголемите технолошки компании и понатаму имаат некои од најстабилните бизниси во светот, остваруваат десетици милијарди долари слободен паричен тек и, во повеќето случаи, имаат доволно силни биланси за да поднесат значително повисоки каматни стапки од просечна компанија во фаза на раст.

 

Од Лондон во Атина – нова дестинација за хеџ-фондовите

Сè уште е рано и податоците се нецелосни, но официјалните бројки покажуваат дека бројот на Грци кои се вратиле во земјата во 2023 година го надминал бројот на оние кои заминале. Ова би било незамисливо само до пред десетина години, период кога половина милион млади луѓе ја напуштија земјата која често се опишуваше како неефикасна, корумпирана и оптоварена со бирократија.

Не е тешко да се разбере зошто се промени ставот кон Грција. Пандемијата покажа дека одредена група мобилни професионалци можат да работат каде што сакаат, па сонцето и морето станаа сериозна предност. Грција, под прилично технократско водство, ги комбинираше даночните олеснувања со новостекнатата стабилност, што е сè поретко во дестинации како Дубаи кои се блиску до области зафатени со конфликти.

 

Јужна Африка бара Старлинк од Маск. „Илон, се надеваме дека слушаш“

Илон Маск треба да соработува со Јужна Африка и таму да ја лансира својата сателитска интернет-услуга „Старлинк“ (Starlink), изјави во понеделникот заменик-министерот за комуникации на земјата.

Услугата сè уште не е достапна во најразвиената економија на континентот, при што Маск ги критикуваше како расистички законите што бараат телекомуникациските компании да бидат во 30-процентна сопственост на црнечките граѓани.

„Можете ли да најдете заеднички јазик со нас? Да соработувате со нас на ова патување кон намалување на нееднаквоста?“, праша заменик-министерот за комуникации и технологија, Мондли Гунгубеле, на настан организиран од „Блумберг“ во близина на Кејптаун во понеделникот.