Никој не е искрен за шокот од вештачката интелигенција, вели директор од финтек-индустријата

Од технолошките компании до преведувачите, светот сè уште не е целосно свесен за последиците од вештачката интелигенција, која ќе уништи многу работни места, според еден од најголемите поддржувачи на вештачката интелигенција во финансиската индустрија.

„Мислам дека многу мои пријатели од сферата на технологијата не се доволно директни на оваа тема. Верувам дека доаѓа огромна промена во односот знаење-работа. И не станува збор само за банкарството туку за општеството во целина“, изјави извршниот директор на „Кларна“ (Klarna Group Plc), Себастијан Семијатковски, во интервју за телевизијата „Блумберг“.

„Општеството ќе мора да најде решение за тоа што ќе правиме, зашто навистина ќе се создадат нови работни места, но како тоа ќе му помогне на краток рок на некој преведувач од Брисел? Тој не може да стане влијателен јутјубер прекуноќ“, додаде тој.

„Кларна“, најпозната по својот продукт „купи сега, плати подоцна“, инвестираше значително во вештачката интелигенција, а Семијатковски во 2023 година изјави дека сака да биде „омилен соработник“ на „Опен еј-ај“ (OpenAI). Тој ентузијазам делумно беше поттикнат од потребата на „Кларна“ да ги намали трошоците по крајот на финансискиот бум во финтек-индустријата.

Додека овој пристап ѝ овозможи на „Кларна“ да престане да вработува повеќе од една година и да го намали бројот на вработени од 7.400 на околу 3.000, кога ги зголеми платите, компанијата откри дека алатките имаат некои ограничувања. Во текот на оваа година вработи повеќе персонал за корисничка поддршка за да се осигури дека корисниците секогаш можат да разговараат со човек, а Семијатковски рече дека „Кларна“ во моментов не користи многу ВИ за одлуки за осигурување.

Но шведскиот извршен директор сè уште верува дека ВИ може да изврши еднаква или дури и подобра работа во справувањето со проблемите на корисниците. „Можете да стекнете голема доверба ако ВИ извршува одредени типови задачи, пред сè поради нејзината конзистентност и квалитетот“, рече тој.

„Кларна“, која беше котирана на берзата во Њујорк во септември, порасна на повеќе од 114 милиони корисници – повеќе од многу традиционални банки. „Очигледно тие корисници не се целосно банкарски префрлени кај нас засега, но тоа мора да биде нашата амбиција“, изјави Семијатковски. Компанијата годинава доби електронска финансиска лиценца во Британија, што ѝ овозможува да понуди повеќе финансиски услуги и да конкурира со компании како што е „Револут“ (Revolut Ltd).

Извршниот директор го гледа бумот на ВИ како крај на она што го нарекува „екстра-профит“ во банкарската и софтверската индустрија, бидејќи големите компании ќе бидат надминати од конкуренти што се развиваат побрзо.

„Повеќето традиционални банки веројатно ќе станат чисто билансни листи, каде што всушност имате голема билансна листа и ја оптимизирате за поврат на капиталот и тоа е тоа“, рече тој.