Величествените седум се минато, доаѓаат нови лидери во вештачката интелигенција

Минаа речиси три години откако ЧетГПТ (ChatGPT) на „Опен еј-ај“ (OpenAI) ја стави вештачката интелигенција (ВИ) во фокусот на глобалната економија, а во тој период на берзата во САД доминираше едно име: Величествените седум (англ. Magnificent Seven). Оваа група на компании ги вклучува „Енвидија“ (Nvidia), „Мајкрософт“ (Microsoft), „Епл“ (Apple), „Алфабет“ (Alphabet), „Амазон“ (Amazon), „Мета“ (Meta) и „Тесла“ (Tesla), кои се сметаше дека се најдобро позиционирани за да профитираат од најголемата технолошка трансформација по појавата на интернетот.

Но, со развојот на ВИ, трговијата со акции се проширува и нови компании се етаблираат како важни играчи. Иако величествените седум и понатаму имаат силно присуство, инвеститорите почнуваат да ги прифаќаат новите имиња што исто така имаат потенцијал да извлечат корист од ВИ, како „Бродком“ (Broadcom), „Оракл“ (Oracle) и „Палантир“ (Palantir). Овие компании брзо напредуваат и често се сметаат за следните големи победници во индустријата.

„Само затоа што величествените седум беа успешни во минатите технолошки циклуси, не значи дека така ќе биде и во овој“, вели Крис Смит, портфолио-менаџер во „Артизан партнерс“ (Artisan Partners). „Следни победници ќе бидат оние компании што ќе можат да се адаптираат на големите и неограничени пазари што ги нуди ВИ“, додава тој.

Величествените седум и понатаму имаат огромен удел во пазарот, но не сите компании од оваа група се на исто ниво. „Енвидија“, „Мајкрософт“, „Алфабет“ и „Мета“ се сметаат за најдобро позиционирани да профитираат од ВИ, а нивните акции годинава пораснаа помеѓу 21 и 33 отсто. Меѓутоа, „Епл“, „Амазон“ и „Тесла“ се соочуваат со проблеми и не успеваат да го постигнат истиот раст.

Во обид да ја опфатат новата генерација предводници, на Волстрит се појавуваат различни предлози за варијации на величествените седум. ЦГМ (Cboe Global Markets Inc.) лансира фјучерси и опции засновани на индексот што го нарекуваат Cboe Magnificent 10, кој ги вклучува оригиналните седум компании, заедно со „Бродком“, „Палантир“ и АМД (Advanced Micro Devices Inc.), многу помалиот ривал на „Енвидија“ во производството на чипови.

Експртите предлагаат голем број кандидати за новата генерација на важни компании, но некои се особено често спомнувани во интервјуата. ТСМ (Taiwan Semiconductor Manufacturing Co.) исто така се смета за клучен дел од екосистемот на ВИ, заедно со „Оракл“ и „Бродком“. „Палантир“, пак, се смета за еден од ретките победници во софтверот за ВИ во време кога старите лидери како „Сејлсфорс“ (Salesforce Inc.) и „Адоби“ (Adobe Inc.) се борат со перцепцијата дека остануваат зад технолошкиот напредок.

„Разговорот треба да се прошири надвор од величествените седум“, смета Ник Шомер, портфолио-менаџер во ЏХ (Janus Henderson). „‘Оракл’ и ‘Бродком’ сигурно треба да се земат предвид во оваа нова ера“.

Некои стари гиганти како „Епл“ и „Тесла“ веќе не се сметаат за водечки во ВИ. „Епл“ не успева да го генерира истиот раст како другите компании, додека „Тесла“ има проблеми со продажбата на електрични возила и се соочува со конкуренција.

Како што продолжува да се развива ВИ, претставниците на индустријата се менуваат. Прво се појавуваат компании што ја овозможуваат технологијата, потоа следуваат оние што развиваат специфични производи и услуги за ВИ, а на крајот компании што ќе ја користат технологијата за подобрување на својата ефикасност. Токму тоа ќе ги одреди идните лидери на пазарот.

„Како што ќе продолжи да се развива ВИ, водечките компании можеби ќе станат поскапи и нивниот раст и профит може да престанат да изгледаат толку примамливо. Пазарот може да се промени, а лидерите да бидат заменети“, вели Јуриен Тимер од ФИ (Fidelity Investments).