Вештачката интелигенција ја направи „Алибаба“ најпопуларна кинеска технолошка акција

Сѐ поголемиот интерес за плановите на компанијата „Алибаба“ (Alibaba Group Holding Ltd.) во областа на вештачката интелигенција (ВИ) повторно ја направи најпопуларна технолошка акција во Кина, додека инвеститорите се враќаат кај интернет-гигантот вреден 420 милијарди долари.

Акциите на компанијата, листирани во Хонгконг, пораснаа за 52 отсто во септември, што постави најдобар резултат во рамките на индексот Hang Seng Tech. Ова претставува пресврт по месеци на забавување предизвикано од загриженоста на инвеститорите за разорувачкиот ценовен конфликт на кинескиот пазар за испорака на храна.

Објавите во средата за планираното зголемување на инвестициите во ВИ и новото партнерство со „Енвидија“ (Nvidia Corp.) беа последните придвижувачи на растот на акциите и донесоа поттик и за конкурентите и за доставувачите. Податоците за опциите покажуваат сѐ поголеми облози за натамошен раст на акциите на „Алибаба“, кои засега остануваат евтини во споредба со светските конкуренти.

„Беше очигледно дека процените за вредноста на ‘Алибаба’ беа ниски во периодот 2022-2023, но инвеститорите имаа потреба од катализатор за да ги купат, а тој катализатор се појави – нејзиниот потенцијал во ВИ“, рече Џијан Шји Кортеси, менаџер на фонд во ГАМ (GAM Investment Management) во Цирих. „Сега ‘Алибаба’ сѐ повеќе се гледа како играч во областа на ВИ/облак-инфраструктурата, а не исклучиво во сегментот на е-трговија.“

Акциите на „Алибаба“ скокнаа поради ентузијазмот за вештачката интелигенција Bloomberg

Во новата ситуација плановите за огромни вложувања ја креваат вредноста на акциите на компаниите, додека инвеститорите се обидуваат да погодат кој ќе доминира во идниот пејзаж на ВИ. Фокусот во Кина сѐ повеќе паѓа на „Алибаба“, која на почетокот на годинава се појави како клучен шампион на националниот потфат за развој на домашна технологија за ВИ.

Кинеските инвеститори  купиле акции на „Алибаба“ во вкупна вредност од 61 милијарда хонгконшки долари (7,8 милијарди американски долари), на нето-основа, преку трговски врски помеѓу континенталниот дел на Кина и Хонгконг во септември. Тоа е најмногу за кој било месец годинава.

Кинеските инвеститори масовно купуваа акции од „Алибаба“ во септември Bloomberg

„Алибаба“ е „најдобриот аниматор на развојот на ВИ во Кина“, напишаа аналитичарите на „Морган Стенли“ (Morgan Stanley) во белешката во средата, откако присуствувале на ВИ-конференцијата на компанијата во Хангџоу. Нивниот водечки модел Квен (Qwen3-Max) наводно ги надминува ГТП-5 (GPT-5) и Клод опус 4 (Claude Opus 4), рангирајќи се „меѓу првите три глобално“, наведуваат аналитичарите.

Трговците со опции ја засилуваат биковската позиција, при што цената на договорите за акции листирани во Хонгконг достигна највисоко ниво од 2022 година во споредба со индексот Hang Seng Tech. Сепак, се појавува и одредена претпазливост, бидејќи бројот на инвеститори што се обложуваат на пад на акциите на „Алибаба“ во САД неделава порасна на 6,8 отсто од вкупните издадени акции, што е најмногу во последните пет години, според податоците на „Ес енд Пи глобал“ (S&P Global).

Процените за вредноста дополнително ги привлекуваат инвеститорите. Акциите на „Алибаба“ сѐ уште се тргуваат по цена што е околу 20 пати поголема од очекуваната заработка на компанијата, додека овој сооднос кај „Амазон“ (Amazon.com Inc.) е речиси 25 пати, а кај „Мајкрософт“ (Microsoft Corp.) повеќе од 30 пати.

„Не би рекол дека постои ‘најдобра ВИ-акција’, но ‘Алибаба’ е најдобрата паралела на американските хиперкомпании“, рече Џин Јао Нг, менаџер на фонд во АИ (Aberdeen Investments). „Меѓу големите облак-играчи во Кина, тие се и најагресивни“, надминувајќи го нивото на инвестиции на компаниите „Тенсент“ (Tencent Holdings Ltd.) и „Баиду“ (Baidu Inc).