„Алибаба“ сака дел од брендовите од „Амазон“ да донесе на „Али експрес“

„Алибаба груп холдинг“ (Alibaba Group Holding Ltd.) се обидува да привлече познати брендови од „Амазон“ (Amazon.com Inc.) на својата глобална е-трговска платформа „Али експрес“ (AliExpress), засилувајќи ги напорите за проширување на своето присуство на американскиот пазар.

Според добро упатени извори, „Али експрес“, онлајн порталот на „Алибаба“ за пазари надвор од Кина, се обидува да додаде уште повеќе големи брендови со тоа што ветува пониски трошоци за испорака и прифаќа да зема помал процент од продажбата отколку што прави „Амазон“.

„Али експрес“ ја воведува новата иницијатива со надеж дека ќе привлече повеќе купувачи и ќе ги зголеми продажбите на клучни пазари, меѓу кои Европа и Латинска Америка, додаваат истите извори, кои побарале анонимност поради доверливоста на информациите.

Кинеската платформа исто така ќе се насочи кон големата база брендови што веќе се присутни на домашната е-трговска платформа на „Алибаба“ – „Ти-мол“ (T-Mall), велат тие, но сепак не посочуваат детали за тоа колку средства или ресурси вложува „Алибаба“  во кампањата.

Одделот за прекугранична е-трговија на „Алибаба“ засега не одговори на барањето за коментар. „Али експрес“ веќе нуди некои од најголемите кинески брендови, меѓу кои производителот на паметни телефони „Шаоми“ (Xiaomi Corp.) и компанијата за популарни играчки „Поп Март интернешнл груп“ (Pop Mart International Group Ltd.), која стои зад популарните кукли „Лабубу“ (Labubu).

„Алибаба“ првпат се обиде да навлезе на американскиот пазар пред околу една деценија, но проектот никогаш не заживеа и компанијата брзо ја продаде платформата во САД на конкурентска компанија. Сепак, стабилниот раст на нејзиниот меѓународен бизнис и успехот на „ПДД холдингс“ (PDD Holdings Inc.) со „Тему“ (Temu) и на „Шејн груп“ (Shein Group Ltd.) можеби ја охрабруваат кинеската компанија повторно да бара начини за проширување на своето присуство на пазари како што се САД и Европа, каде што „Али експрес“ работи со години, но без поголем пробив во конкуренцијата со „Амазон“.

Надвор од „Али експрес“, странското присуство на кинескиот е-трговски гигант е главно ограничено на регионално фокусирани бизниси, вклучувајќи ги „Лазада“ (Lazada) во Југоисточна Азија и „Трендиол“ (Trendyol) во Турција.

Иако „Алибаба“ годинава порача дека развојот на вештачка интелигенција е нејзина примарна цел, е-трговијата останува основа на бизнисот. Толку е значајна што основачот Џек Ма одигра клучна улога во одлуката на компанијата од Хангжу да потроши дури 50 милијарди јуани (7 милијарди долари) за субвенции со цел да му се спротивстави на конкурентот „Џеј-ди“ (JD.com Inc.).

Меѓународниот е-трговски оддел на „Алибаба“ оствари раст на приходите од 19 отсто и намалување на загубите во изминатиот квартал, но сè уште не остварува профит.

Новата офанзива на компанијата за проширување на своето присуство во САД доаѓа во геополитички напнат момент, бидејќи американскиот претседател Доналд Трамп ги стави на удар кинеските трговци со зголемување на царините за малите пратки од Кина. Како последица на тоа, „Тему“ реши да нуди големи попусти за да остане конкурентен на американскиот пазар.

Во моментов нема коментари за веста. Биди прв да коментира...

Остави коментар