„Тему“ го напушта кинескиот модел на увоз за да ги избегне царините на Трамп

„Тему“ (Temu) го напушта моделот фокусиран на евтиниот кинески увоз што ја катапултира кон голем успех во САД, со цел на американските потрошувачи во скоро време да им продава само стоки од локалните трговци.

Феноменот за онлајн малопродажба на „ПДД холдингс“ (PDD Holdings Inc.), кој слично како „Шејн“ (Shein Group Ltd.) се појави на сцената пред само неколку години со производи со намалени цени, од фустани до кујнски крпи, има намера да се префрли на она што го нарекува модел на „локално исполнување на нарачките“. Компанијата преку електронска пошта соопшти дека активно регрутира американски трговци и ќе продава само своја локална стока. Се очекува дека тоа ќе ѝ овозможи на „Тему“, компанија во кинеска сопственост, да ги избегне царините, а соопшти и дека има намера да ги задржи цените за Американците непроменети.

Промената на „Тему“ доаѓа во време кога трговците на мало од „Шејн“ до „Алибаба“ (Alibaba Group Holding Ltd.) се борат не само со зголемените даноци за увоз туку и со укинувањето на т.н. ослободување од царина „де минимис“ (de minimis) за мали пратки. Пред овој потег, гигантите за е-трговија како „Тему“ и „Шејн“ ги зголемија цените во САД. Претседателот Доналд Трамп воведе давачки за да се обиде да го принуди Пекинг да бара трговски договор што ќе го намали билатералниот трговски дефицит и рече дека очекува Кина да ги „изеде“ царините.

„Овој потег е наменет да им помогне на локалните трговци да стигнат до повеќе клиенти и да го развијат својот бизнис“, велат од „Тему“. Тоа е исто така „дел од тековните приспособувања на ‘Тему’ за подобрување на нивото на услуги“.

Се чини дека „ПДД холдингс“ од минатата недела ги пренесе речиси сите нови увозни даноци наметнати од Доналд Трамп на американските потрошувачи, со додавање јасно означен износ за доплата за купувачите оттаму при наплатата. И гигантот за евтина облека „Шејн“ ги зголеми цените на своите производи во САД, со поскапување за дури 300 проценти на одредени артикли.

„Тему“ побара од кинеските фабрики да ги испорачуваат своите стоки на големо до американските магацини уште во февруари преку тоа што се нарекува рамка на „половично чување“. Но, како што со текот на времето се намалуваат резервите во САД, цените на крајот сепак би можеле да се зголемат кога фабриките ќе ги дополнуваат резервите (ако царините за кинески увоз останат на високото ниво од 145 проценти).

Гигантите меѓу американските трговци на мало сè уште не ги зголемиле цените на стоките на полиците. Но тие се заглавени во тешка ситуација бидејќи кинеските доставувачи одбиваат да ги апсорбираат царините и се зголемува неизвесноста околу тоа колку долго ќе бидат во сила дополнителните давачки.

Компании како „Волмарт“ (Walmart Inc.) и „Таргет“ (Target Corp.) би можеле да се соочат со политички притисок да апсорбираат дел - ако не и сѐ - од зголемувањето на трошоците, што би можело да помогне во ублажување на директното влијание врз купувачите.

Примерот на „Амазон“ (Amazon.com Inc.) – компанијата што во вторникот изјави дека нема да ја прикажува цената на американските царини за производите откако Белата куќа го критикуваше таквиот потег, а Трамп му се пожали на Џеф Безос - ја нагласува тешката позиција во која се наоѓаат американските трговци на мало. Ако не ги пренесат зголемувањата на трошоците, маржите на профит ќе се намалат и ќе станат товар за цената на нивните акции.

 

Во моментов нема коментари за веста. Биди прв да коментира...

Остави коментар