„Амазон“, „Алиекспрес“ и „Тему“ ја живнаа курирската услуга во Македонија

Прометот со услуги во третото тримесечје годинава бележи раст од 1,4 проценти споредено со истиот период лани, покажуваат податоците од Државниот завод за статистика. Притоа, најзначаен е растот на поштенските и курирските дејности, каде што прометот пораснал за 20,5 проценти. Голем скок бележи и прометот со услуги во дејностите за вработување, каде што растот е 18,9 проценти.

 

Другите сектори што бележат раст на прометот на услуги имаат многу помала позитива. На пример, услугите поврзани со трговија и поправка на моторни возила имаат раст од 7,6 проценти, складишните услуги и помошни дејности во превозот се зголемиле за 5,4 отсто, услугите за одржување згради и животната средина за 11,5 проценти, канцелариско-административните дејности пораснале за 7,8 проценти, услугите за изнајмување и закуп пораснале за 8,6 проценти, архитектонски дејности и инженерство 6,8 проценти, правни и сметководствени дејности 8,2 проценти и дејностите со недвижен имот се зголемиле за 6,9 проценти.

 

Помал е бројот на сектори каде што прометот со услуги опаднал на годишно ниво. Конкретно, најголем пад на прометот во третиот квартал годинава споредено со истиот период лани има кај филмската дејност, продукцијата на видео и ТВ-програма и дејности на снимање звучни записи и музичко издаваштво. Во овој сектор намалувањето е дури 11,5 проценти. Помал пад има и во неколку други дејности, како услуги од туристички агенции и туроператори, каде што падот е 5,5 проценти, заштитни и истражни дејности со пад од 5,1 проценти, минусот во маркетинг-индустријата е 4,7 проценти, а во издавачката дејност пет проценти.

Растот на е-трговијата ја живна курирската услуга во Македонија

Интернет-пазарењето е сѐ поактуелно меѓу потрошувачите, особено тие што не сакаат да се туркаат меѓу полиците во продавниците или да чекаат ред пред гардеробите во бутиците. Дополнително, голем замав земаат светските гиганти во онлајн трговијата што нудат производи по значително пониски цени од тие што се продаваат во продажните салони. „Амазон“ и „Алиекспрес“ се меѓу најпопуларните за Македонците што сакаат да купуваат преку интернет, а треската со „Тему“ допрва се засилува.

Податоците од „Евростат“ покажуваат дека иако трендот е растечки, сепак само половина од граѓаните на Македонија што имаат интернет-пристап купуваат нешто преку интернет. Поточно, процентот изнесува 53,5 според последните податоци од европската официјална статистика, кои се однесуваат за 2023 година. Притоа, две третини од нив, или 67,6 проценти во тримесечен период купуваат од три до пет пати нешто од онлајн продавниците. Од еднаш до двапати онлајн нарачки прават 27,6 отсто, а само 3,23 проценти од вкупниот број уживаат во е-купување и на квартално ниво прават од шест до десет нарачки.

 

 

Што се купува најмногу преку интернет?

Податоците од „Евростат“ покажуваат дека најмногубројни се нарачките за облека и обувки. Важно е да се напомене дека анализите ги земаат предвид само тие што во период од три месеци нарачале барем еднаш нешто преку интернет. Според тоа, дури 72,06 проценти од Македонците купиле облека, вклучувајќи и спортска облека, обувки и модни додатоци. Потоа, 23,1 отсто од нив нарачале спортски производи што не вклучуваат спортска облека. Следуваат интернет-нарачките за козметика и производи за убавина и здравје, мебел и додатоци за домот и градината, потоа нарачките за храна и кетеринг, како и играчки и други производи за деца.

Најмалобројни се нарачките зa апарати за домаќинство и електроника (7,8 проценти), 6,2 отсто од потрошувачите нарачале компјутери, таблети, мобилни телефони и додатоци, а 5,7 проценти од нив нарачале и печатени книги, магазини или списанија.

Во моментов нема коментари за веста. Биди прв да коментира...

Остави коментар