„Амазон“ (Amazon), „Алиекспрес“ (Aliexpress) и АСОС (ASOS) им се омилени е-продавници за пазарење на Македонците. За купување производи и услуги кон странски е-трговци, Македонците лани потрошиле 156,2 милиони евра. Анализираме што се купува најмногу на интернет, од каде се купува и колку се користи онлајн трговијата во земјава.
Пазариме во просек двапати во три месеци
Просечната вредност на пазарењето онлајн на Македонците чини 3.000 денари. Ако се има предвид дека европското седиште на „Амазон“ и на „Алиекспрес“ е регистрирано во Луксембург, кон оваа земја има речиси 900.000 трансакции, но со многу помала вредност за разлика од Обединетото Кралство, каде што се наоѓа е-продавницата за облека АСОС и, секако, „Амазон“. Во просек Македонците трошат по 688 денари по трансакција во Луксембург, додека најмногу пари се трошат во Унгарија и Холандија, каде што се наоѓаат компаниите на „Визер“ и на пример „Букинг“ (Booking.com), каде што во просек се трошат 8.733 денари.
Облека, чевли, накит, чанти и спортска опрема се најчесто купуваните производи што се нарачуваат онлајн, додека медицински препарати и додатоци за исхрана, како на пример витамини, се на листата производи што најмалку се купуваат онлајн.
Најмогу користиме интернет за социјални мрежи, а најмалку за е-трговија
Ако се земе предвид дека 85 отсто од населението користи интернет, само половина од нив или 44 отсто се онлајн купувачи. Споредено со регионот Адрија, Македонија е претпоследна земја во онлајн трансакции, додека Словенија е лидер, каде што 90 отсто од популацијата користи интернет, а само 16 отсто од нив не пазарат онлајн.
„Да го видам производот каков е, па да го купам“ - ова е најголемата бариера зошто нема толку е-купувачи во земјава. Стекнатата навика за пазарење физички во продавница тешко се заменува со интернет-просторот. Според анализата на „Евростат“, голем број потрошувачи се изјасниле дека немаат никаква потреба да купуваат онлајн додека најмала пречка за пазарење на интернет им бил трошокот за достава.
Од регионот Адрија, Македонците најголем број онлајн нарачки направиле од Хрватска, додека најмалку во Босна и Херцеговина. Сепак, вредноста што Македонците ја потрошиле е највисока во е-продавниците од Србија, каде што се потрошиле 183 милиони денари.
Она што може да се забележи е дека расте вредноста на трансакциите што се прават во последните три години. Во првите три месеци од годинава во споредба со 2021 година може да се забележи дека граѓаните речиси двојно повеќе пари потрошиле за купување од некои е-продавници во странство, но и дома.
.webp){kind=icon}
