„Енвидија“ (Nvidia Corp.) објави изненадувачки силна прогноза за приходите и го отфрли тврдењето дека индустријата за ВИ е во балон, ублажувајќи ги стравувањата што се проширија низ технолошкиот сектор. Највредната компанија во светот очекува продажба од околу 65 милијарди долари во јануарскиот квартал – за околу 3 милијарди повеќе од прогнозите на аналитичарите. „Енвидија“ исто така соопшти дека приходниот бум од половина билион долари, кој се очекува во наредните квартали, може да биде уште поголем од предвиденото.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Што планираат македонските компании котирани на Берзата?
Компаниите чии акции се најтргувани на Македонската берза ги објавија своите деветмесечни финансиски резултати според коишто се гледа дека не се премногу засегнати од глобалните случувања, геополитичките тензии и трговската војна и имаат потенцијал 2025 да ја завршат со голем успех.
Седум од десет компании што се дел од домашниот берзански индекс МБИ10 имаат раст на добивката заклучно со третиот квартал споредено со истиот период лани, а кај трите преостанати намалувањето на профитот е незначително и тоа тие три се банки – “Комерцијална“, „НЛБ“ и „ТТК Банка“. Трите најголеми банки во Македонија, „Комерцијална“, „НЛБ“ и „Стопанска банка – Скопје“, заедно имаат профит од преку 156,4 милиони евра, што е 65 отсто или речиси две третини од прометот на сите МБИ10 членки заедно.
Во свет на иновации, што ја кочи македонската стартап сцена - претставници на јуникорни во Скопје
Недостигот на законска рамка што опширно го регулира стартап-екосистемот, како и надоволна институционална и финансиска поддршка од државата се едни од клучните пречки за развојот на македонските стартапи. А, тоа не е ништо ново. Со години се зборува за тие проблеми и впечатокот на инволвираните е дека има напредок, но е бавен наспроти брзите иноватори и безмилосната глобалната конкурентност во борбата за инвеститори и лансирање на иновативни производи.
Еден од суштинските проблеми на стартап заедницата е недостигот од информации, па тие самите го прават неопходното: фокус на нивно обезбедување, како во однос на следењето и евидентирањето на сите чинители, така и во однос на самото структурирање на стартап-екосистемот и динамиката со која треба да се пристапува при мапирањето.
Криптопазарот избриша 1 билион долари, биткоинот повторно тоне
Големиот пад на криптото од 2025 година влезе во нова фаза во средата, откако биткоинот падна на најниското ниво во последниве седум месеци, со што избриша повеќе од 1 билион долари низ светот на дигиталните средства. Најголемата криптовалута се спушти до 88.522 долари, при што најновиот пад ги погоди и големите и малите инвеститори — од малопродажни купувачи „на дип“ до трезорски фирми за дигитални средства, чија акциска премија исчезнува.
Цените на токените делумно закрепнаа откако „Енвидија“ објави силна прогноза за приходите, што помогна да се ублажат стравувањата дека глобалниот бран на трошоци за ВИ може да почне да се гаси. Биткоинот порасна до 2,5 отсто во четвртокот наутро за време на тргувањето во Азија.
Двајца српски бизнисмени ја преземаат сопственоста врз „Имлек“
Компанијата „Имлек“, која важи за еден од водечките производител на млечни производи на Балканот и во чии рамки работи македонската „Бимилк“ добива нови сопственици. Досегашниот сопственик - фондот „МидЕуропа“ веќе ја договорил купопродажбата со семејниот инвестициски холдинг на Андреј Јовановиќ (AJFH) како водечки инвеститор и Бојан Радун, долгогодишен генерален директор на „Имплек“, кој ќе продолжи да ја води компанијата и во новата структура. Договорот предвидува завршување на трансакцијата во првиот квартал од 2026 година, како и „Бимилк“ да остане составен дел од „Имлек“.
Освен „Бимилк“ под капата на „Бимилк“ функционираат и два производствени погони во Србија, како и „Млијекопродукт“ од Босна и Херцеговина. Компанијата годишно преработува околу 350–400 милиони литри сурово млеко и соработува со повеќе од 3.500 фармери во регионот. Српските бизнисмени Јовановиќ и Радун истакнаа дека во „Имлек“ гледаат огромен потенцијал за натамошен раст и развој преку засилени инвестиции, унапредување на оперативната ефикасност и континуирани иновации во производството и портфолиото.
Француската спортска машина: Како државата произведува шампиони наместо да ги чека
Франција не е само спортска сила, туку лабораторија која со децении произведува шампиони. Од фудбалери кои ги полнат европските лиги, преку кошаркари кои ја преплавуваат НБА, до „Ле експертс“ (Les Experts) во ракометот кои редовно стојат на подиумот. Шемата е јасна. Франција, како и другите, не чека талент. Таа го произведува.
Според фудбалската ЦИЕС опсерваторија (CIES Football Observatory), земјата е најголемиот извозник на фудбалери во Европа, со повеќе од 940 активни играчи во странски лиги. Во кошарката приказната е слична, со повеќе од 20 француски играчи кои моментално играат во НБА, а тројца од нив беа избрани меѓу првите 10 на драфтот во 2024 година (Ризашер, Сар, Салаун). Во ракометот Франција освои шест светски титули и три златни олимписки медали, најмногу во историјата.
.webp){kind=icon}
