Изминатава недела започна со драматично заострување на односите меѓу Вашингтон и Техеран. Американскиот претседател Доналд Трамп го обвини Иран за соборување на хеликоптер, по што следуваа нови американски напади и најави за уште поостри воени дејствија. Развојот на настаните предизвика загриженост на финансиските пазари поради стравувањата дека евентуалното проширување на конфликтот би можело да влијае врз глобалното снабдување со енергенти и врз цените на нафтата.
Геополитичката неизвесност се совпадна со нови загрижувачки податоци за инфлацијата во најголемата светска економија. Според најновите показатели, инфлацијата во САД достигна највисоко ниво во последните три години, отворајќи нови дилеми околу идните потези на Федералните резерви. Пазарите сè повеќе проценуваат дека периодот на високи каматни стапки би можел да потрае подолго од очекувањата.
Со слични предизвици се соочува и Европа. Европската централна банка за првпат од 2023 година повторно ги зголеми каматните стапки, испраќајќи сигнал дека инфлацијата останува закана и покрај претходните мерки за стабилизација. Одлуката има пошироки импликации и за земјите од регионот бидејќи влијае врз цената на задолжувањето, кредитната активност и инвестициските текови.
Прочитајте повеќе:
Македонските инвеститори се вртат кон странските берзи: Вложиле 110 милиони евра во 2025.
Пад на добивката на Македонската берза, МБИ10 сигнализира неизвесна 2026.
Инфлацијата забрза и во Македонија. Според најновите податоци, трошоците на животот во мај биле за 4,8 проценти повисоки во споредба со истиот период лани. Иако стапката е далеку под нивото од кризата во 2022 година, трендот повторно ги отвори прашањата за куповната моќ на домаќинствата и можните мерки за ограничување на ценовните притисоци.
Во текот на неделата Меѓународниот монетарен фонд во нов извештај оцени дека на Македонија ѝ се потребни подлабоки даночни реформи со цел обезбедување поодржливи јавни финансии и поголем простор за развојни политики во иднина. Прашањето за фискалната стабилност станува сè поважно во услови кога глобалната економија повторно се соочува со инфлаторни ризици.
Најважно случување на меѓународниот пазар на капитал изминативе денови беше иницијалната јавна понуда (ИПО) на „Спејс екс“. Компанијата на Илон Маск привлече огромно внимание од инвеститорската јавност уште со најавата за новата понуда на акции и со собрани 75 милијарди долари стана највредното ИПО во историјата. Сепак, македонските фондови останаа внимателни во однос на ИПО-то на „Спејс екс“.
На страна од геополитичките тензии и економските текови, фокусот на светската јавност беше наосечн кон Светското првенство во фудбал. Аналитичарите проценуваат дека станува збор за најскапиот мундијал досега, со рекордни инвестиции и големи очекувања за потрошувачката поврзана со спортскиот спектакл. Пазарите веќе се обидуваат да ги идентификуваат компаниите кои би можеле најмногу да профитираат од настанот.
.webp){kind=icon}
