ВИ-стартапот „Митик“ собра 125 милиони долари за да ѝ конкурира на „Енвидија“

Стартапот за чипови „Митик“ (Mythic Inc.) собра 125 милиони долари во нова рунда на финансирање, пари што ќе помогнат во обидот на оваа компанија да ја предизвика „Енвидија“ (Nvidia Corp.) на профитабилниот пазар за процесори за вештачка интелигенција (ВИ).

Стартапот „Митик“, кој минатата година го ангажира ветеранот на „Енвидија“ Танер Озчелик за свој извршен директор, ги собра парите од група предводена од компанијата за ризичен капитал ДЦВЦ (DCVC), според соопштението објавено денеска. Меѓу инвеститорите се и „Њу ентерпрајз асошиејтс“ (New Enterprise Associates), „Атрејдс менаџмент“ (Atreides Management), „Софтбанк груп“ (SoftBank Group Corp.), „Хонда мотор“ (Honda Motor Co.) и „Локид Мартин“ (Lockheed Martin Corp).

Компанијата има нов пристап кон обработка на големи количества податоци потребни за работа на софтверите за вештачка интелигенција. Нејзината технологија се потпира на аналогни чипови, кои користат многу помалку енергија од дигиталните компоненти, кои обично служат како мозок на компјутерите.

„Митик“ е дел од групата компании за чипови што се борат да освојат дел од пазарот на инфраструктура за ВИ. Експлозивниот раст на таа индустрија ја поттикна продажбата на „Енвидија“ и ја претвори во највредна компанија во светот. Но, на конкурентите не им е лесно да го достигнат тој успех, па „Енвидија“ останува доминантна кај ВИ-процесорите.

Озчелик, кој помина една деценија во „Енвидија“, верува дека технологијата на „Митик“ има способност да ја искористи слабоста на сегашните системи - тие трошат премногу енергија.

Ако компанијата може успешно да понуди и испорача алтернатива што бара многу помалку електрична енергија, операторите на центри за податоци би требало да го прифатат пристапот, рече тој во едно интервју. На крајот на краиштата, наоѓањето доволно енергија стана клучен предизвик за компаниите што го зголемуваат компјутерскиот капацитет за ВИ.

„Митик“ го нуди тоа што се нарекува аналогни процесорски единици. Овој тип на чип користи многу поедноставни аранжмани за ракување со информации и отстранува елемент што обично ја зголемува потрошувачката на енергија, рече Озчелик.

Дигиталните чипови трошат многу време и енергија менувајќи информации меѓу процесорскиот и меморискиот склоп. Ако обработката може да се изврши во рамките на меморијата, тогаш тоа време и енергија повеќе нема да се трошат, рече тој.

Зацврстувањето на пазарот ќе значи директно соочување со „Енвидија“. Озчелик, чија кариера ја обликуваше коосновачот и извршен директор на „Енвидија“, Јенсен Хуанг, рече дека ја почитува визијата на својот ментор, но исто така го поздравува предизвикот.

„Јасно ставаме до знаење“, рече тој. „Ќе ја нападнеме ‘Енвидија’“.