„Мета“ ќе го купи стартапот „Манус“ со влог од 2 милијарди долари во ВИ агенти

„Мета платформс“ (Meta Platforms Inc.) се согласи да го купи сингапурскиот стартап „Манус“ (Manus), со што компанијата додава уште еден популарен агент за вештачка интелигенција во своите напори да изгради бизнис околу својата огромна инвестиција во вештачка интелигенција (ВИ).

Договорот го проценува „Манус“ на повеќе од две милијарди американски долари, информираат луѓе запознаени со ова прашање. Договорот бил склучен за околу 10 дена, рекоа луѓето, барајќи да не бидат именувани бидејќи деталите не се јавни.

 

„Мета“ има намера да ја продолжи работата и продажбата на услугите на „Манус“, а истовремено ќе ги интегрира и во своите производи, се вели во соопштението. Поддржан од некои од најголемите кинески имиња како што се „Тенсент холдингс“ (Tencent Holdings Ltd.), „Женфанд“ (ZhenFund) и ХСГ (HSG), „Манус“ се стекна со популарност на почетокот на оваа година, не долго по дебито на „Дипсик“ (DeepSeek).

Главниот извршен директор на „Мета“, Марк Закерберг, ја направи вештачката интелигенција главен приоритет на својата компанија и троши милијарди за вработување истражувачи, изградба на центри за податоци и развој на нови модели. „Манус“ оваа година оствари приходи од околу 125 милиони долари од продажбата на својот ВИ агент на бизниси преку претплати, што би можело да ѝ даде на „Мета“ побрз поврат на дел од нејзините трошоци за ВИ.

Агентот за ВИ на „Манус“ може да заврши неколку општи задачи, како што се проверка на биографии, креирање патни планови и анализа на акции како одговор на основните инструкции. Матичната компанија зад „Манус“, „Батерфлај ефект“ (Butterfly Effect Pte), која беше основана во Кина пред да се пресели во Сингапур, претходно собра пари со проценка од близу 500 милиони долари во инвестициска рунда предводена од американската фирма за ризичен капитал „Бенчмарк“ (Benchmark).

ВИ агентите се алатки на кои не им е потребен човечки надзор за извршување на специфични дигитални задачи. Компаниите за корпоративен софтвер како што се „Сејлсфорс“ (Salesforce Inc.) и „Сервис нау“ (ServiceNow Inc.) интензивно ги промовираа своите верзии на агенти како најефикасен начин бизнисите да ја користат новата технологија, наместо генеративните функции на ВИ како што се четботовите, кои бараат кориснички инструкции и интеракција.

„Мета“, покрај своите ВИ очила, веќе има четбот за вештачка интелигенција, „Мета еј-ај“ (Meta AI), кој е достапен преку социјалните медиуми и платформите за пораки на компанијата - Фејсбук, Инстаграм и Вацап.

Американската компанија ја презема технолошката и лидерската група од „Манус“, иако во соопштението не се наведува каде ќе биде сместен новиот тим во организацијата. Главниот директор за ВИ на компанијата, Александар Ванг, се приклучи на „Мета“ ова лето како дел од значајна инвестиција во неговиот стартап, „Скејл еј-ај“ (Scale AI).

По објавата, Ванг на мрежата „Х“ објави порака за добредојде на тимот на „Манус“ во „Мета“, а во својот пост коосновачот и извршен директор на „Манус“, Сјао Хонг, рече дека договорот ќе ѝ помогне на неговата компанија да го прошири досегот на своите агенти. „Ерата на вештачката интелигенција која не само што зборува, туку дејствува, создава и испорачува, само што започнува“, напиша тој. „А сега можеме да ја изградиме во обем што никогаш не можевме да го замислиме.“

Агресивното вложување на „Мета“ за да се натпреварува во трката со ВИ им парира на конкурентите како „Опен еј-ај“ (OpenAI), „Гугл“ (Google) на „Алфабет“ (Alphabet Inc.) и „Мајкрософт“ (Microsoft Corp). Закерберг вети дека ќе потроши 600 милијарди долари за инфраструктурни проекти во САД во текот на следните три години, од кои многу се очекува да бидат поврзани со ВИ. Компанијата ангажираше скап тим истражувачи за да развие нов најсовремен модел на ВИ, чие деби го планира за следната пролет, и се соочи со одреден скептицизам од инвеститорите кои се загрижени дека големите трошоци нема да резултираат со значајни приходи во скоро време.

Фирмата за ризичен капитал „Бенчмарк“ претходно беше критикувана од пратениците и другите инвеститори за ризичен капитал заради поддршката на компанија за ВИ која што е поврзана со Кина. „Кој мисли дека е добра идеја американските инвеститори да го субвенционираат нашиот најголем противник во ВИ, само за КПК (KPK) да ја користи таа технологија за да нè предизвика економски и воено? Јас не.“, напиша американскиот сенатор Џон Корнин, републиканец од Тексас, во објава на мрежата X во мај. „Бенчмарк“ не одговори веднаш на барањето за коментар за договорот со „Мета“.