Голем раст на продажбата на „Тему“ и на „Шејн“ пред оцаринувањето на малите пакети во САД

Гигантите за онлајн тргување „Тему“ (Temu) и „Шејн“ (Shein) забележаа раст на нивната продажба во март и април бидејќи американските купувачи складираа резерви од производи, како четки за шминка и домашни апарати, пред да почнат тарифните зголемувања на цените.

„Шејн“ забележа многу добар перформанс со едно од најдобрите зголемувања на продажбата во САД во изминатите 12 месеци бидејќи приходите скокнаа за 29 отсто во март во споредба со истиот месец претходната година, а потоа дополнително се забрзаа до 38 отсто во првите 11 дена од април, најновиот датум за кој се достапни податоци. Во меѓувреме, „Тему“ на „ПДД холдингс“ (PDD Holdings Inc.) забележа раст од 46 и 60 проценти во истите периоди, според „Блумберг секонд мејжр“ (Bloomberg Second Measure), кој ги анализира податоците за кредитните и дебитните картички. Забрзаниот раст за двете платформи дојде по забавувањето во февруари, кога и двете компании забележаа најбавен раст во изминатата година.

Bloomberg Mercury

 

Продажбата во март беше отпорна бидејќи зголемените царини на претседателот Доналд Трамп испратија силен сигнал до потрошувачите дека цените веројатно ќе се зголемуваат, изјавија за „Блумберг њуз“ (Bloomberg News) четворица трговци што продаваат на „Тему“ и на „Шејн“. Одлуката на американската влада од следниот месец да ги укине ослободувањата „де минимис“ за малите пакети во вредност до 800 долари, го прави уште поверојатно дополнителното зголемување на цените.

Закрепнувањето на бројките на раст на „Тему“ и „Шејн“ одразува како американските потрошувачи складираат сè, од автомобили, преку маслиново масло, па дури до ајфони (iPhone), во очекување вртоглаво покачување на цените по воспоставените царини. Трговецот на мало со електроника „Бест бај“ (Best Buy Co.) ги забележа своите најдобри месечни перформанси од 2021 година, а пораснаа и посетите на застапниците на „Тојота“ (Toyota Motor Corp) и на „Хјундаи“ (Hyundai Motor Co).

„Имавме добра распродажба од март, а во последните недели видовме акумулација на продукти, како на пример клиенти што купуваа 15 комплети од истите производи за шминка одеднаш. Не сум го видел тоа досега“, рече Сун Јанг, кој има продавница на „Тему“ во која се продаваат производи за боење лице и тело, како што се четки и палети на бои. „Мислам дека тоа е паметно бидејќи наскоро, кога ќе се распродаде нашата стара резерва, ќе мора да ги зголемиме цените“.

Сан рече дека ќе треба во наредните недели да ги зголеми цените за 20-30 проценти за да ги покрие царините и логистичките трошоци за испорака на стоки до магацините со седиште во САД.

За некои кинески доставувачи главен приоритет е обезбедување нови производствени локации надвор од Кина што е можно поскоро бидејќи краткорочниот бум на нарачките веројатно нема да го надомести очекуваниот пад на продажбата во САД откако ќе бидат принудени да ги зголемат цените. Одлуката на Трамп на 90 дена да ги паузира повисоките царини за десетици трговски партнери, а во исто време да ги зголеми давачките за стоките произведени во Кина на 145 проценти само ја зајакна потребата од набавка на нивните производи од друго место.

Френк Денг, менаџер за продажба на еден извозник на апарати за домаќинство со седиште во Шангај, кој продава во САД преку интернет, вели дека неговата компанија обично има резерви за период од три месеци.

„Кога ќе се распродадат резервите со ниски цени, тогаш започнува вистинската битка“, рече тој, додавајќи дека компанијата првично сметала дека може да толерира повисоки царини додека Трамп драстично не ги зголеми многу над 100 отсто. Тие сега ја трошат секоја минута во потрага по нови производствени локации во Виетнам.

„Имаме само три месеци да го направиме тоа или играта е завршена“, рече тој.