Новата ВИ-апликација на „Алибаба“ бележи силен старт во трката со ЧетГПТ

Апликацијата Квен (Qwen) на „Алибаба“ (Alibaba Group Holding Ltd.) забележа повеќе од 10 милиони преземања во неделата по нејзиното повторно лансирање, што е добар сигнал за долгорочната амбиција да се изгради конкурент на „Опен еј-ај“ (OpenAI) и неговиот ЧетГПТ (ChatGPT).

Акциите на кинескиот гигант за електронска трговија пораснаа за повеќе од 5 отсто во понеделникот во Хонгконг, откако „Алибаба“ го објави податокот на својот блог на „Вичет“ (WeChat). Тој брз раст следуваше по одлуката овој месец да се преименуваат и освежат постојните апликации на „Иос“ (iOS) и „Андроид“ (Android), обединувајќи ги услугите под името Квен.

Лансирањето на Квен покажува дека апликациите базирани на вештачка интелигенција поставуваат нови рекорди во брзината на усвојување во последниве години, почнувајќи од ЧетГПТ на „Опен еј-ај“, кој пред три години стана најбрз растечки сервис со 100 милиони корисници. Исклучувајќи ја апликацијата Тредс (Threads) на „Мета“ (Meta Platforms Inc.), која имаше корист од огромната мрежа на својата матична компанија, Квен е меѓу најбрзорастечките апликации, особено во Кина, каде што ЧетГПТ не е достапен.

„Дали ќе успеат да ја искористат апликацијата Квен за да го поттикнат својот директен бизнис со потрошувачите ќе биде важен фактор што ќе влијае врз идната вредност на компанијата“, изјави стратегот Кени Нг од ЦЕСИ (China Everbright Securities International Co.).

„Пазарот го гледа овој потег и како клучен чекор за споредување на нејзината вредност со онаа на ‘Опен еј-ај’.“

Bloomberg

Првите податоци за корисниците на Квен следуваа по сличната изјава викендов од финтек-компанијата на „Алибаба“, „Ант груп“ (Ant Group Co.), која минатата недела го претстави својот мултимодален ВИ-асистент Линггуанг (LingGuang). Линггуанг е преземен повеќе од еден милион пати во првите четири дена од неговото лансирање.

„Алибаба“ во наредните месеци постепено ќе додава агентни ВИ-функции за поддршка на онлајн купувањето, опфаќајќи платформи меѓу кои е и нејзиниот главен маркет „Таобао“, со цел Квен да стане целосно функционален ВИ-агент. Под водство на главниот извршен директор Еди Ву, компанијата се ребрендира како бизнис што е ориентиран првенствено кон вештачката интелигенција, стратегија што ќе биде повторно оценета кога „Алибаба“ ќе одговара на прашања од инвеститорите по објавата на кварталните резултати во вторник.

„‘Алибаба’ планира длабоко да ги интегрира клучните услуги за животен стил и продуктивност, вклучувајќи дигитални мапи, достава на храна, резервации за патувања, канцелариски алатки, е-трговија, образование и здравствени насоки, директно во апликацијата Квен“, соопшти компанијата.