Акциите на „Алибаба“ скокнаа по рекордната инвестиција во АИ од над 50 милијарди долари

Акциите на „Алибаба груп холдинг“ (Alibaba Group Holding Ltd.) скокнаа на највисокото ниво во речиси четири години, откако компанијата објави планови за зголемување на вложувањата во вештачка интелигенција (АИ) над првично најавените 50 милијарди долари. Со тоа „Алибаба“ им се приклучи на технолошките гиганти што издвојуваат сè поголеми суми во глобалната трка за технолошки пробив.

Главниот извршен директор Еди Ву очекува вкупните инвестиции во вештачка интелигенција во светски рамки да достигнат околу 4 трилиони долари во следните пет години – и „Алибаба“ мора да држи чекор со тој тренд. Тој најави дека компанијата наскоро ќе ја дополни програмата претставена во февруари, според која за три години ќе се издвојат повеќе од 380 милијарди јуани (53 милијарди долари) за развој на АИ-модели и инфраструктура.

Ву ги соопшти овие прогнози при претставувањето на плановите за ширење на моделите Qwen и „фул-стек“ АИ-технологија, што ја отсликува растечката амбиција на „Алибаба“ не само да нуди услуги туку и да ја развива инфраструктурата, како што се чиповите, кои се неопходни за оваа технологија.

Акциите на „Алибаба“ во Хонгконг пораснаа за 7,2 отсто, што помогна и во растот на кинеските производители на чипови: „АЦМ рисрч“ (ACM Research (Shanghai) Inc.), со скок до 15 отсто, и „Наура технолоџи груп“ (NAURA Technology Group Co.), со 10 отсто.

„Развојот на индустријата се одвива многу побрзо од очекуваното, а побарувачката за АИ-инфраструктура исто така далеку ги надмина нашите предвидувања“, изјави Еди Ву на конференција за развивачи во Хангџоу.

„Активно ја реализираме инвестицијата од 380 милијарди јуани во АИ-инфраструктура и планираме дополнително зголемување.“

Од „Хуавеи технолџис“ (Huawei Technologies Co.) до „Тенсент холдингс“ (Tencent Holdings Ltd.), најголемите кинески компании издвојуваат невидени суми за развој на вештачка интелигенција. Со тоа, тие му се приклучуваат на бранoт на вложувања од американските конкуренти, како „Опен еј-ај“ (OpenAI) и „Мета платформс“ (Meta Platforms Inc.), кои се натпреваруваат да ја изградат и да ја наметнат технологијата што има потенцијал да ги трансформира економиите и дури да ја промени геополитичката рамнотежа во светот.

Bloomberg

Вкупните капитални вложувања во инфраструктура и услуги за вештачка интелигенција на „Алибаба“, „Тенсент“, „Бајду“ (Baidu Inc.) и „Џеј Ди“ (JD.com Inc.) би можеле да надминат 32 милијарди долари само во 2025 година, покажуваат процените на „Блумберг интелиџенс“ (Bloomberg Intelligence). Тоа е голем скок во однос на нешто помалку од 13 милијарди во 2023 година.

Сите водечки кинески интернет-компании развиваат АИ-модели и услуги со голема брзина, меѓу кои се и „Хунијан“ (Hunyuan) на „Тенсент“ и „Ерни“ (Ernie) на „Бајду“. „Алибаба“ денеска го претстави својот нов голем јазичен модел Qwen3-Max, како и серија други подобрувања во пакетот на АИ-услуги. Пренасочувањето на бизнисот кон вештачка интелигенција веќе носи резултати за Ву и „Алибаба“.

Во најновиот квартал, компанијата со седиште во Хангџоу објави троцифрен раст на приходите од производи поврзани со ВИ. Нејзиниот облак-сектор исто така оствари скок на продажбата од 26 отсто, над очекувањата, што го направи најбрзорастечки оддел во групацијата. Акциите на компанијата годинава пораснаа повеќе од двојно.

„Компаниите стекнуваат доверба да инвестираат повеќе тогаш кога се зголемува јасноста за приносите“, изјави Веј-Серн Линг, управен директор во „Унион банкер приве“ (Union Bancaire Privee).

„Затоа кога велат дека ги зголемуваат вложувањата во АИ, тоа е знак за силна побарувачка од клиентите и добра исплатливост.“

Како и другите кинески компании, „Алибаба“ се соочува со дилема за пристапот до чиповите за вештачка интелигенција на „Енвидија“ (Nvidia Corp.), кои се неопходни за развивање напредни модели.

Пекинг ги охрабрува домашните фирми да ја намалат зависноста од чиповите на „Енвидија“, од кои речиси сите се блокирани поради американските извозни контроли. Владата неодамна ги повика компаниите да не ја користат RTX Pro 6000D – графичка картичка за работни станици што може да се пренамени за АИ-апликации. Тоа ја засили итноста меѓу кинеските технолошки лидери да изградат сопствена индустрија за полупроводници.

„Алибаба“ со години работи на развој на полупроводнички хардвер за да ја намали кинеската зависност од американски доставувачи. Таа во 2018 година ја купи компанијата за дизајн на чипови „Хангџоу Си-скај мајкросистемс“ (Hangzhou C-Sky Microsystems Co.) и ја основа својата полупроводничка единица „Ти-хед“ (T-Head).

Извршниот директор Еди Ву зборуваше и за хардверските иновации на кои работи „Алибаба“, вклучувајќи чипови, побрзи компјутери и мрежни решенија – клучни компоненти на дата-центрите. Минатата недела компанијата обезбеди и престижен клиент за своите АИ-чипови: според кинеските државни медиуми, вториот по големина мобилен оператор во земјата, „Чајна јуником“ (China Unicom), ќе ги користи АИ-акцелераторите „Пингтоуге“ или „Tи-хед“.

„Хуавеј“ (Huawei), водечкиот кинески дизајнер на чипови, минатата недела ја претстави својата тригодишна стратегија за надминување на доминацијата на „Енвидија“.

Ротирачкиот претседател Ерик Сју ја презентираше следната генерација АИ-чипови на компанијата, заедно со унапредените суперкомпјутерски (SuperPod) дизајни, термин позајмен од речникот на „Енвидија“ што се однесува на платформа за дата-центри што ги опфаќа компјутерските ресурси, складирањето, мрежните технологии, софтверот и управувањето со инфраструктурата.

Останува да се види дали тврдењата на „Хуавеј“ ќе издржат со текот на времето – и дали нејзините дизајни ќе можат да се произведуваат во поголем обем. „Хуавеј“ го изненади технолошкиот свет во 2023 година со воведување на 7-нанометарски чип за напојување на паметниот телефон „мејт 60 про“ (Mate 60 Pro), но оттогаш не успеа да напредува над тоа ниво. Освен тоа, Сју не изнесе детали за тоа како компанијата ќе ги произведува новите чипови.