За 100 долари инвестирани во „Енвидија“, денес на сметка би имале 2.800

Доколку пред пет години сте вложеле 100 долари во акции на „Енвидија“ (Nvidia) - за што сте можеле да купите околу 19 акции на компанијата во тоа време - денес тие би вределе 2.827 долари. Иако пресметувањето на имагинарната заработка по вртоглавиот раст на акциите нема многу корист, се поставува прашањето уште колку има простор за раст, дали тој воопшто е одржлив и дали вреди да се насочи вниманието кон вештачката интелигенција (ВИ).

Компанијата, која во среда ги објавува своите деловни резултати по затворањето на американските берзи, односно по 22 часот по наше време, последните години е вистинска берзанска ѕвезда. Акциите на производителот на чипови, кои моментално се тргуваат по цена од 147 долари, пораснаа за 196 проценти само годинава. За споредба, биткоинот, кој важи за една од најпрофитабилните инвестиции во последните години, скокна за 103 проценти (во моментот на пишувањето на овој текст вреди речиси 93 илјади долари). „Енвидија“ е исто така победник во долгорочната трка. На пример, во период од пет години акцијата порасна за 2.600 проценти, додека споменатата криптовалута напредуваше 1.092 проценти.

Џенсен Хуанг Bloomberg

Вештачката интелигенција (ВИ) е она што ги вивна акциите на компанијата до небото, исто како и нејзиниот основач Џенсен Хуанг. Американецот со тајванско потекло го зазеде 11-то место на листата на милијардери на „Блумберг“, со имот вреден 124 милијарди долари. Само годинава неговото богатство се зголеми дури за 84 милијарди долари.

Волстрит ќе ги следи маржите на „Енвидија“, вели аналитичарот и макростратег Михаило Ѓурѓевиќ од „Сензал капитал“ (Senzal Capital). Но клучното прашање е дали таквиот раст е можен на долг рок.

„Со оглед на експлозивниот раст што компанијата го постигна досега, во смисла на остварени приходи и перформанси на берзата, се очекува растот да забави од тековните неодржливо високи нивоа“, тврди Ѓурѓевиќ. Истовремено, тој ги наведува процените на 56 аналитичари од Волстрит, кои очекуваат 125,9 милијарди долари приходи во 2025 година или 107,2 проценти раст во однос на претходната година, додека за 2026 година предвидуваат 184,54 милијарди долари приходи (раст од 46,2 проценти) и очекуваат 211,35 милијарди долари приходи до 2027 година. „Важно е да се додаде дека овие проекции се менуваат веднаш по објавувањето на резултатите“, додава тој.

Не смееме да го заборавиме ниту новоизбраниот претседател на САД, Доналд Трамп. „Долгорочно е важно да се следи царинската политика на Трамп, која може да има негативно влијание врз маржите, а со тоа и врз работењето на компанијата“, истакнува Ѓурѓевиќ. Важно е да се запамети и основното правило на инвестирање - досегашните резултати не се гаранција дека ќе биде така и во иднина.

„Навикнати сме на резултати подобри од очекуваните“

Очите на инвеститорите желни за профит не се насочени само кон деловните резултати на „Енвидија“ туку особено на прогнозите на самата компанија - тоа ќе го диктира темпото на понатамошната заработка. Се очекува компанијата да оствари 32,9 милијарди долари приходи (за 82 процента повеќе во однос на минатогодишниот квартал) и 0,74 долари заработка по акција, што е зголемување од 85 проценти во однос на истиот период минатата година, вели аналитичарот Никола Маљковиќ од платформата за тргување „Оптимтрејдер“ (Optimtrader).

Пазарот веќе се навикна компанијата да најавува подобри деловни резултати од прогнозите на аналитичарите, а веројатно и овој пат ќе биде така - очекувањата на аналитичарите со кои разговараше „Блумберг Адрија“ се доста усогласени.

„Енвидија“ ќе објави резултати на горната граница на прогнозата или малку над неа, смета Алеш Грбиќ, менаџер на имот во осигурителната компанија „Сава инфонд“ (Sava Infond).

Блеквел - продажен хит

Резултатите од третиот квартал ќе бидат добри, главно поради големата побарувачка за графички процесори Хопер (Hopper) и Блеквел (Blackwell), смета Маљковиќ. Сите чипови Блеквел, чија продукција е планирана за следната година, веќе се распродадени, а големите играчи како што се „Мајкрософт“, „Гугл“, „Мета“ и „Амазон“ се натпреваруваат за што побрзи испораки.

„Блеквел станува основа на инфраструктурата на вештачката интелигенција, бидејќи инженерската извонредност на ’Енвидија’ обезбедува енергетска ефикасност и флексибилност. Се очекува овие графички процесорски единици (англ. GPU) да го подобрат сегментот на центрите за податоци на ’Енвидија’“, објаснува Маљковиќ

Bloomberg

Но не е сè розово ниту во тој рај. „Енвидија“ е целосно ограничена во понудата на нови производи, што би можело да го ограничи и потенцијалниот раст во тековниот квартал и идните прогнози, додава Маљковиќ. Грбиќ, пак, очекува позитивно изненадување: „’Енвидија’ ќе има забрзување на работењето поради продажбата на новиот чип Блеквел, што значително ќе ја зголеми маржата. Со зголемување на капацитетот, ’Енвидија’ ќе може да задоволи поголем капацитет на понуда отколку што беше во состојба во последниот квартал“.

Живо на пазарот на опции

Како што беше кажано на почетокот, очите на аналитичарите се првенствено насочени кон прогнозите. Тоа ќе покаже дали побарувачката за ВИ-производи забавува или не, смета Маљковиќ. Останува и прашањето колку прогнозите беа успешни во претходните квартали.

Во последните 20 квартали компанијата секогаш ги надминувала очекувањата на аналитичарите по приходи, а во 18 од 20 случаи и по добивка, истакнува тој. Инвеститорите исто така веќе се во низок старт. Пазарите на опции очекуваат поместување од 10 проценти, по објавувањето на резултатите, што не е малку за компанија вредна 3,61 билиони долари, велат аналитичарите.

На пример, по последното објавување на резултатите цената на акцијата падна за 6,4 проценти, иако компанијата оствари профит за шест проценти подобар од очекуваниот и за пет проценти подобар приход. „Тоа сугерира дека веќе три месеци очекувањата се доста високи“, напоменува Маљковиќ.

Дали „Енвидија“ стигна до врвот?

Не толку мал број фактори од сегментот на ВИ укажуваат на тоа дека сè уште не е достигнат врвот во работењето на снабдувачите на инфраструктура за ВИ и полупроводници/софтвер потребен за работа и обука на модели на вештачка интелигенција, смета Грбиќ.

Побарувачката во сегментот на инфраструктурата за вештачка интелигенција (ВИ) сè уште далеку ја надминува понудата. Всушност, тоа го потврдуваат и деловните резултати на клучните купувачи на „Енвидија“ во третиот квартал од годинава. Повеќето од нив пријавија висока стапка на раст на приходите од услуги во облак, истакнува Грбиќ и наведува примери: „Гугл“ годинава забрза од 29 проценти раст во вториот квартал на 35 проценти во третиот; „Мајкрософт ажур“ имаше мал пад, од 35 проценти на 34 проценти (без влијание на валутите); „Амазон АВС“ (AWS) задржа стабилен раст од 19 проценти во однос на претходната година.

Depositphotos

Споменатото трио истакнува дека клучниот фактор што го кочи нивниот раст е недоволното снабдување со чипови. Инаку, „Мајкрософт“ веќе најави дека очекува забрзување на Ажур во првата половина од следната година, бидејќи тогаш ќе има доволно понуда, додава Грбиќ. Тој исто така наведува дека конкурентите и партнерите на „Енвидија“ пријавиле силна побарувачка на пазарот на инфраструктура за вештачка интелигенција.

Инвеститори, внимавајте да не паднете во замка

Прогнозите на аналитичарите на терминалот на „Блумберг“ покажуваат дека просечната дванаесетмесечна целна цена е поставена на 158 долари по акција. Новите прогнози објавени во ноември одат уште повисоко, од 160 до 200 долари по акција. Речиси 90 проценти од аналитичарите сметаат дека акциите сè уште се интересна купувачка, но на берзата нема гаранции.

„Треба да се биде внимателен при инвестирање во овој сегмент“, предупредува Грбиќ. „Јасно е дека инвестициите во ВИ-инфраструктура не можат бесконечно да растат по толку високи стапки“.

Значи, забавувањето на растот или падот може да биде замка. „Тоа би се случило во ситуација на ограничено воведување на ВИ или низок принос на вложениот капитал во овие инвестиции. Како резултат на тоа, би се намалиле инвестициите во инфраструктура за вештачка интелигенција, што би имало негативно влијание врз приходите и маржите на ’Енвидија’ и другите компании во овој сегмент“, заклучува Грбиќ за „Блумберг Адрија“.