Среброто се повлекува од рекордното ниво поради загриженост од прегревање

Среброто ги задржа загубите откако се повлече од рекордно високото ниво, а клучниот технички индикатор покажува дека шестдневниот раст го довел во област на преголемо купување. Златото малку падна.

Белиот метал се тргува за речиси два долара под рекордното ниво, откако претходно во текот на сесијата падна дури за 2,4 проценти. Трговците се обложуваа на континуирана стеснетост на понудата и очекувања за уште едно намалување на каматните стапки во САД, што е силен поттик за благородните метали што не даваат принос.

 

Меѓутоа, 14-дневниот индекс на релативната сила покажа дека оваа неодамнешна шпекулативна возбуда можеби пребрзо стигнала предалеку. 

На пошироките пазари, азиските акции пораснаа откако побарувачката на последната аукција на 10-годишни јапонски обврзници оваа година беше посилна од 12-месечниот просек.

Bloomberg Mercury

 

Тоа доведе до закрепнување на расположението за ризик, што ги стабилизираше пазарите и предизвика одредена реализација на профит, рече Оле Хансен, раководител на одделот за стратегија за стоки во „Саксо банк“ (Saxo Bank). Тој додаде дека среброто доживува „природно повлекување“, но поширокиот тренд на раст останува недопрен сè додека цените се држат над 54,5 до 55 долари за унца.

Растот на цената на среброто за повеќе од осум проценти во текот на претходните две сесии беше поттикнат од облозите за долготрајно ограничување на понудата. Откако рекордните количества метал влегоа во Лондон за да се ублажи историскиот притисок во октомври, другите трговски центри се најдоа под притисок. Резервите поврзани со магацините на Шангајската берза за термински договори исто така неодамна го достигнаа најниското ниво во една деценија.

„Сега го преминавме рационалниот замав“, рече Даниел Гали, виш стратег за стоки во „ТД секјуритис“ (TD Securities). „Очекувањата за побарувачката се намалија во сите категории, оставајќи ја инвестициската побарувачка како главен двигател денес“, рече тој, спомнувајќи го слабото физичко тргување на лондонскиот пазар преку шалтер.

Односот злато-сребро, кој покажува колку унци сребро се потребни за да се купи една унца злато, исто така падна на најниско ниво за повеќе од една година. Трговците понекогаш ги гледаат ваквите екстреми како пресвртни точки.

Bloomberg Mercury

 

Цената на златото е поддржана и од зголемените очекувања дека американските Федералните резерви (Фед) ќе донесат уште едно намалување на каматните стапки следната недела. Пазарите веќе пресметаа речиси сигурно намалување за четвртина процентен поен на последниот состанок на Фед за оваа година.

Во рамките на утринското тргување во Сингапур цената на среброто падна за 1,2 отсто, на 57,2887 долари за унца. Златото се намали за 0,4 проценти, на 4.216,46 долари. Индексот за вредноста на доларот на „Блумберг“ остана непроменет. Платината падна, додека цената на паладиумот малку се искачи.