„Енвидија“ постави нов рекорд и стана највредна компанија во светот

Акциите на компанијата „Енвидија“ (Nvidia) достигнаа рекордна вредност во средата, со што лидерот во чипови за вештачка интелигенција дополнително ја зацврсти својата позиција како една од највредните компании во светот.

Акцијата порасна за 4,3 проценти, на 154,31 долари, надминувајќи го претходниот рекорд од јануари. Оваа нова пресвртница доаѓа по растот од 63 проценти од април, со што пазарната капитализација на „Енвидија“ се зголеми за речиси 1,5 трилион долари.

Со оваа добивка компанијата го надмина „Мајкрософт“ и сега е највредна компанија во светот, со пазарна вредност од околу 3,77 трилиони долари, во споредба со 3,66 трилиони долари колку што вреди „Мајкрософт“.

Последниот квартален извештај на „Енвидија“ го поттикна оптимизмот кај инвеститорите, покажувајќи силен раст и навестување на дополнително забрзување, и покрај американските ограничувања за извоз на напредни чипови во Кина. Истовремените извештаи на „Мајкрософт“, „Мета“, „Алфабет“ и „Амазон“ - кои заедно сочинуваат над 40 проценти од приходите на „Енвидија“, според податоците од синџирот на снабдување собрани од „Блумберг“ - дополнително потврдија дека најголемите клиенти и понатаму интензивно инвестираат во инфраструктура за вештачка интелигенција (ВИ).

„Мојата доверба во растот на ’Енвидија’ сега е поголема отколку пред неколку месеци. Се чини дека трката за опремување со ВИ ќе трае низ 2025-та и веројатно 2026 година“, рече Мајкл Смит, коменаџер на портфолио во АГИ (Allspring Global Investments). „Импулсот повторно е воспоставен, а заштитниот ров на компанијата дополнително се продлабочи, што значи дека нејзината позиција е уште посилна“.

Bloomberg

На состанокот со акционерите во средата, извршниот директор Џенсен Хуанг им порача на инвеститорите дека побарувачката останува силна, повторувајќи го ставот дека компјутерството е дури на почетокот на големата ВИ-транзиција.

Од компанија за која пред неколку години ретко се слушаше, „Енвидија“ стана симбол на ВИ-ерата и веројатно најважната акција на Волстрит. Годинешниот раст од 15 проценти доаѓа по скокот од над 170 проценти во 2024 година, кој следуваше по растот од речиси 240 проценти во 2023 година.

И покрај силниот раст, според некои показатели за вреднување, акциите сè уште изгледаат привлечно. „Енвидија“ моментално се тргува со мултипликатор од 31,5 по очекуваната заработка во наредната година, што е под нејзиниот десетгодишен просек и блиску до мултипликаторот на индексот Nasdaq 100 (27), иако се прогнозира дека ќе расте побрзо од остатокот на технолошкиот сектор. Нејзината PEG вредност, односно односот меѓу вреднување и раст, изнесува околу 0,9 - најниска меѓу т.н. величествената седумка (Magnificent Seven).

Токму таа комбинација од силен раст и разумна вредност е главната причина поради која Волстрит останува оптимистичен. Речиси 90 проценти од аналитичарите што ги следи „Блумберг“ препорачуваат купување на акцијата, а моменталната цена е 12 проценти под просечната целна вредност, што укажува на очекувања дека нагорниот тренд ќе продолжи.

И покрај сè, акциите на „Енвидија“ сè уште се помалку застапени кај институционалните инвеститори во споредба со другите технолошки гиганти, што укажува на дополнителен простор за потенцијални купувања. Според податоците на Банката на Америка, „Енвидја“ ја држат во портфолијата 74 проценти од фондовите со долгорочна стратегија, додека „Мајкрософт“, најзастапениот меѓу нив, има покриеност од 91 процент.

„Оптимист сум за оваа и наредната година, но, како и сите, не знаеме што ќе биде потоа“, вели Смит. „Акцијата не изгледа прескапо, но сепак станува збор за една од најголемите компании во светот - можноста за дополнителен раст има свои граници. Траењето на растот на ’Енвидија’ ќе зависи од тоа колку долго нејзините клиенти ќе продолжат да ги зголемуваат инвестициите во вештачка интелигенција. Ако забават, нема да треба многу за волатилноста нагло да се зголеми“.