„Енвидија“ доби судска покана поради сомнежи за монопол

Министерството за правда на САД испрати судски покани до „Енвидија“ (Nvidia Corp.) и други компании, барајќи докази дека овој производител на чипови ги прекршил антимонополските закони. Според „Блумберг“ (Bloomberg), последниот потег на властите е ескалација во истрагата на министерството за доминантниот снабдувач на процесори за вештачка интелигенција (ВИ).

Министерството, кое претходно испраќаше прашања до компаниите, сега испраќа законски обврзувачки барања што ги обврзуваат примателите да ги дадат бараните информации, велат упатените во истрагата. Тоа ја носи американската влада еден чекор поблиску до поднесување формална жалба.

Антимонополските власти се загрижени дека „Енвидија“ го отежнува префрлањето на други доставувачи и ги казнува клиентите што не ги користат исклучиво нејзините чипови за вештачка интелигенција, посочуваат изворите, кои побараа да останат анонимни.

Акциите на „Енвидија“, кои загубија рекордни 279 милијарди долари во вторникот, дополнително паднаа во тргувањето по работното време, откако „Блумберг“ објави за поканите. Сепак, пошироко, цената на акцијата се зголеми повеќе од двојно годинава - поттикната од експлозивниот раст на продажбата на производителот на чипови со седиште во Санта Клара, Калифорнија.

Како дел од истрагата, за која „Блумберг“ објави во јуни, иследниците контактирале и со други технолошки компании за да соберат информации. Канцеларијата на Министерството за правда во Сан Франциско сега го презема водството во истрагата, посочуваат изворите. Претставник на министерството одби да коментира.

Како одговор на прашањата за истрагата, „Енвидија“ рече дека нејзината доминација на пазарот произлегува од квалитетот на нејзините производи, кои обезбедуваат побрзи перформанси.

„'Енвидија' победува по заслуга, што се гледа од нашите резултати и вредност за клиентите, кои можат да изберат кое решение е најдобро за нив“, се наведува во соопштението на компанијата испратено по електронска пошта.

Bloomberg

„Енвидија“ се најде под регулаторна контрола откако стана највредниот производител на чипови во светот и лидер меѓу фирмите што го искористија бумот со вештачката интелигенција. Нејзината продажба се зголемува повеќе од двојно од квартал во квартал, надминувајќи ги поранешните лидери во сферата на чиповите како што е корпорацијата „Интел“ (Intel).

Во истрагата на министерството, регулаторите го анализираа купувањето на „Ран еј-ај“ (RunAI) од „Енвидија“ - договор објавен во април. Таа фирма произведува софтвер за управување со вештачка интелигенција и постои загриженост дека спојувањето меѓу двете компании ќе им отежне на клиентите да се префрлат од чипови на „Енвидија“ на чипови од друг производител. Регулаторите исто така разгледуваат дали „Енвидија“ обезбедува повластени зделки и цени за клиентите што ја користат само нејзината технологија односно купуваат комплетни системи, велат изворите.

„Енвидија“, основана во 1993 година, се стекна со репутација за продажба на графички картички во секторот за игри. Но нејзиниот пристап за правење чипови на крајот се покажа корисен за конструкција на модели со вештачка интелигенција, процес што вклучува „бомбардирање“ со податоци. Компанијата исто така брзо ја прошири својата понуда со низа на софтвер, сервери, мрежи и услуги - сите насочени, како што тврдат од „Енвидија“, да ја забрзаат примената на вештачката интелигенција.

Извршниот директор на „Енвидија“, Џенсен Хуанг, рече дека им дава приоритет на клиентите што можат да ги користат нивните производи во своите центри за податоци што се подготвени за употреба веднаш штом ќе ги испорачаат, политика што е дизајнирана за да се спречи складирање резерви и да ја забрза пошироката употреба на вештачката интелигенција.

Успехот на производите на компанијата - заедно со борбата против ривалите и различните чипови - ја направи „Енвидија“ клучна алка во синџирот на снабдување за некои од најголемите светски фирми. „Мајкрософт“ и „Мета“, на пример, трошат повеќе од 40 отсто од буџетите за хардверски компоненти на опрема од производителот на чипови. За време на врвот на недостигот на H100 од „Енвидија“, поединечни компоненти се продаваа по 90.000 долари.

Аналитичарите прогнозираат дека „Енвидија“ ќе собере 120,8 милијарди долари приход во 2024 година, во споредба со 16 милијарди долари во 2020 година, а најголемиот дел од тие пари ќе доаѓа од нејзиниот оддел за центри за податоци. Уште повеќе, „Енвидија“ ќе оствари поголем профит годинава од вкупната продажба на нејзиниот најблизок ривал АМД (Advanced Micro Devices Inc).

Има и пошироки регулаторни прашања за практиките на „Енвидија“. Пристапот до способностите на вештачката интелигенција стана клучен фокус за владите низ светот, а технологијата станува сè поважна за економската сила и националната безбедност.

 

(Текстот e дополнет со одговорот oд „Енвидија“)

Во моментов нема коментари за веста. Биди прв да коментира...

Остави коментар