Наша анализа за феноменот „Енвидија“: Купи ја гласината, продај ја веста

Двоцифрениот пад на вредноста на акциите на „Енвидија“ (Nvidia) неодамна дојде како изненадување за светската инвеститорска јавност и отвори прашалници за многумина кои сакаа набрзина да заработат од подемот на оваа компанија базиран на технологијата за вештачка интелигенција. Слична приказна пред извесен период имаше и кај биткоинот кој достигна рекордни вредности за потоа да доживее вртоглав пад, што ги стави во недоумица инвеститорите околу иднината на најпознатата криптовалута. Од друга страна, се зголемува бројот на инвеститори кои своите средства ги пласираат во ЕТФ-ови базирани на акциите на „Енвидија“ и другите технолошки гиганти и на „биткоин“. Имено, според „Блумберг“ во фондовите со кои се тргува преку берза годинава се слеале 400 милијарди долари, најмногу во последните три години.

Движење на вредноста на „Енвидија“/извор: терминал на Блумберг

За ваквите трендови побаравме мислење од Данијел Делач, главен извршен директор во „ИнтерКапитал секјуритис“ (InterCapital Securities) и од Васко Богдановски, инвестициски портфолио-менаџер, кој е соосновач и извршен партнер во „Опфолио“ (Opfolio). Ги прашавме како го коментираат падот на вредноста на акциите на „Енвидија “ односно како го објаснуваат големиот прилив на средства во ЕТФ-ови базирани на биткоин и „Енвидија“.

„Вашето прашање веројатно ги интересира инвеститорите кои имаат пократок временски хоризонт и кои тргуваат поактивно, па затоа одговорот првенствено би го поврзал со психолошките аспекти на тргувањето на берзата“, вели Делач.

Тој смета дека тука станува збор за класичното „buy the rumor“(купи ја гласината) во очекување односно одбројување кога „Енвидија“ ќе стане најголема компанија на светот и „sell the news“(продај ја веста) кога веќе станала најголема.

„Во оваа фаза на пазарот на акции во САД, како и макроекономскиот и политичкиот циклус, потенцијално е мудро да се реализира дел од нереализираните добивки на акциите на „Енвидија“, а бидејќи акциите се околу највисокото ниво на сите времиња (all time high), има безброј акционери кои „седат“ на поголеми или помали нереализирани добивки“, вели Делач.

Данијел Делач/Лична архива

Според него, факт е дека „Енвидија“ има пазарен удел од над 90 проценти во својот сегмент и тоа е историско чудо, но во исто време, нејзиното вреднување е исклучително високо.

„Во моментов ми се чини дека порационалните купувачи донекаде ја „влечат рачната сопирачка“ (не купуваат агресивно акции од „Енвидија“ и/или продаваат барем дел од нивните позиции)“, вели Делач.

Тој додава дека станува збор за вообичаена практика на пазарите кога некоја акција достигнува највисоко ниво. Делач посочува дека треба да се има на ум дека во „Енвидија“ имаат инвестирано многу релативно неискусни таканаречени инвеститори на мало и дека каква било корекција може да создаде паника која лесно може да ја коригира цената за 20 до 30 проценти за краток временски период. Според него, некои инвеститори очигледно дејствувале пред тоа да се случи како мерка на претпазливост.

„Сè што коментирам се однесува на краткорочните изгледи за акциите на „Енвидија“. На долг рок, важни се фундаменталните показатели и очекувањата за идното работење на компанијата (кои во моментов се многу „нагласени“). Времето ќе покаже дали има причина за тоа или не“, вели Делач.

Тој додава дека технолошкиот развој и лесниот пристап до светските берзи преку паметен телефон донесе неверојатен број мали инвеститори на пазарите, за кои тргувањето во САД некогаш беше скапо и комплицирано.

„Ова веќе не е случај и можноста за изложеност на популарни акции како „Енвидија“ или на шпекулативни средства (BTC) кои ги интригираат инвеститорите, а сето тоа преку регулираната берза во САД, беше одлична мамка за огромен број инвеститори“, вели Делач.

Тој додава дека постои психолошка пристрасност да се купува она што постојано односно подолг период расте и она за што секојдневно се чита во медиумите (и „Енвидија“ и биткоин) што е таканаречен „страв од пропуштање“ (fear od missigng out).

„За повеќемина (засега) тоа испадна супер, но мора да се биде внимателен“, вели Делач.

Од друга страна, Богдановски неодамнешниот пад на акциите на „Енвидија“ го препишува на неколку фактори.

„Инвеститорите ги реализираа своите профити од впечатливите перформанси кои компанијата ги забележа на почетокот од годината.

И покрај огромните приходи што беа објавени, високите оценки предизвикаа претпазливост кај инвеститорите“, вели Богдановски.

Тој додава дека акциите на „Енвидија“ се карактеризираат со висока волатилност, со 11 значителни дневни промени повисоки од пет проценти во последната година.

„Иако последниот пад е значителен, тој не ја промени основната пазарна перцепција за вредноста на компанијата“, вели Богдановски.

Според него, вредноста на „Енвидија“ се базира на нејзиниот потенцијал за раст во областите на центрите за податоци и вештачката интелигенција.

Васко Богдановски/Лична архива

„‚Енвидија‘ моментално доминира во секторот за вештачка интелигенција, и нејзината профитабилност би можела да порасне ако успее да ја задржи оваа позиција во следната деценија. Сепак, развојот на успешни алтернативни технологии би можел значително да го ограничи нејзиниот потенцијал за раст“, смета Богдановски.

Тој објаснува дека многу технолошки гиганти се натпреваруваат за водечката позиција на „Енвидија“ во областа на вештачката интелигенција и дека се очекува големите технолошки компании како „Амазон“ (Amazon), „Мајкрософт“ (Microsoft), „Гугл“ (Google) и „Мета“ (Meta Platforms) да се стремат кон намалување на својата зависност од „Енвидија“ преку проширување на својот спектар на добавувачи на полупроводници и софтвер и развивање на сопствени решенија.

„ТПУ (TPU) на ‚Гугл‘, како и чиповите траиниум (Trainium) и инферентиа (Inferentia) на ‚Амазон‘ се специјализирани за задачи поврзани со вештачка интелигенција, додека „Мајкрософт“ и „Мета“ се фокусираат на дизајнирање на полупроводници. АМД (AMD) активно ги унапредува своите ГПУ (GPU) понуди за да ги задоволи потребите на овие технолошки гиганти, додека „Интел“ (Intel), со своите постоечки ВИ забрзувачки чипови, се очекува да продолжи да се фокусира на овој сегмент“, вели Богдановски.

Во однос на големиот прилив на средства во ЕТФ базирани на биткоин и на „Енвидија“ од почетокот на годинава, Богдановски вели тоа се должи на неколку фактори кои нудат низа предности.

„Биткоин ЕТФ-фондовите овозможуваат лесен пристап до инвестирање во биткоин, избегнувајќи ја потребата за отворање на посебна сметка за тргување со криптовалути. ЕТФ-овите ја отстрануваат потребата за управување со приватни клучеви и поврзаните ризици за безбедност при чувањето на биткоин. Управувачот на ЕТФ е одговорен за мерките на заштита и безбедност“, објаснува Богдановски.

Движење на вредност на биткоин индексот на Блумберг/извор: терминал на Блумберг

Тој додава дека со тргување на традиционалните берзи, ЕТФ-овите обезбедуваат висока ликвидност и едноставност за извршување на трансакции.

„Инвеститорите можат брзо да управуваат со своите инвестиции без ограничувања поврзани со директното поседување на криптовалутата. Наменети за инвеститори со долгорочен хоризонт, биткоин ЕТФ-овите нудат структуриран начин за искористување на потенцијалниот раст на вредноста на биткоинот, следејќи ја неговата позитивна траекторија во регулирана рамка“, вели Богдановски.