Преглед на берзите: Пад на акциите пред резултатите на „Енвидија“, биткоинот се лизга надолу

Акциите паднаа во пресрет на резултатите на „Енвидија“ (Nvidia Corp.), кои се сметаат за клучен тест за стабилноста на пазарот, откако загриженоста околу високите вреднувања предизвика распродажба што избриша околу 1,6 билион долари од глобалните берзи.

Азиските индекси се намалија за 0,2 отсто, продолжувајќи го падот четврти ден по ред. Фјучерсите на S&P 500 и Nasdaq се спуштија во пресрет на резултатите на компанијата што е водечки показател за ВИ. Европските акции се очекува да отворат стабилно, откако индексот Bloomberg World Exchange Market Capitalization ја намали пазарната вредност на 144,7 билиони долари поради загубите во САД и Европа во вторникот.

Криптовалутите повторно ослабнаа, при што биткоинот накратко се спушти под 90.000 долари, за потоа да ги намали загубите и повторно да се врати над таа граница.

Глобалните акции се движат околу најниското ниво во последниот месец, додека Волстрит се прашува дали високите вреднувања се оправдани и дали милијардите потрошени за ВИ донесуваат значајни резултати. Очите сега се вперени во „Енвидија“, чиј извештај денеска ќе го тестира расположението во срцето на ВИ-бумот и може да ја одреди следната насока на пазарите по растот што трае од април.

„Инвеститорите сè уште се нервозни“, рече Веј-Серн Линг, управнички директор на „Јунион банкер“ (Union Bancaire Privee). „Вреднувањата се високи, пазарот на трудот во САД и каматите на Фед остануваат неизвесни, влегуваме во крајот на годината со добивки, па многумина сакаат да го намалат ризикот.“

Азиските акции во најдолга серија на пад од август

Bloomberg

Индексот S&P 500 е намален за повеќе од 3 отсто овој месец. Волатилноста повторно се засили. Индексот на страв на Волстрит, Cboe Volatility Index, скокна над 24, што е над клучното ниво од 20, па носи загриженост кај трговците, достигнувајќи го највисокото ниво во еден месец.

Превирањата на глобалните пазари во последниве денови личат на „здрава корекција“, додека инвеститорите се обидуваат да оценат како да го разберат технолошкиот пресврт, изјави Боб Дајмонд, поранешен извршен директор на „Барклис“ (Barclays Plc), кој сега ја води инвестициската фирма „Атлас“ (Atlas Merchant Capital).

„Ги видовме ризичните средства како се прекалкулираат“, рече тој. Ова „не е нешто што се претвора во мечкин пазар.“

И други инвеститори предупредија на можен пад кај најголемите ВИ-акции.

„Голема е веројатноста дека нè очекува значајна корекција“, изјави Давиде Сера, основач и извршен директор на „Алџебрис инвестментс“ (Algebris Investments), на форумот „Блумберг - нова економија“ (Bloomberg New Economy Forum) во Сингапур.

Претседателот на „Голдман Сакс“ (Goldman Sachs Group Inc.), Џон Волдрон, рече дека пазарите се подготвени за можни понатамошни падови, а инвеститорите внимателно ќе го следат претстојниот клучен извештај за резултатите на „Енвидија“.

„Мислам дека пазарот може да се повлече уште повеќе од ова ниво“, изјави Волдрон. „Техничките сигнали во моментов повеќе се наклонети кон заштита и кон понатамошен пад.“

Нерасположението што ги зафати глобалните финансиски пазари постепено се прелева и на кредитните пазари. Ризичните премии – од обврзници со инвестициски рејтинг до т.н. џанк-обврзници – се движат блиску до највисоките нивоа во последните недели.

Друг клучен фокус за инвеститорите е дали Федералните резерви ќе ги намалат каматните стапки следниот месец. Трговците сè помалку се уверени дека ќе има ново намалување на цената на задолжувањето, при што своп-пазарот сега имплицира помала од 50 отсто веројатност за потег во декември.

Неколку носители на политики во последно време предупредија против ново намалување, наведувајќи го ризикот од инфлација, иако гувернерот на Фед, Кристофер Велер, повторно го изнесе својот став во прилог на намалување на стапките.

Инвеститорите ги зголемуваат обложувањата на пазарот на опции дека Фед ќе ги намали референтните каматни стапки и на третата последователна седница следниот месец. Американските државни обврзници во средата бележеа мали промени, при што приносот на 10-годишната обврзница се задржа на 4,12 отсто, по падот од три базични поени во вторникот.

Во меѓувреме јапонските обврзници делумно ги намалија загубите, откако аукцијата на 20-годишни државни хартии покажа дека инвеститорите сè уште се претпазливи поради дополнителната понуда пред првиот економски пакет на премиерката Санае Такаичи.

Цената на нафтата падна откако извештајот за растечките американски резерви ја ублажи загриженоста за последиците од западните санкции врз Русија. Златото се стабилизира.

Индексот на „Блумберг“ за доларот во средата остана стабилен. Сомнежите околу позицијата на доларот како доминантна валута во глобалните финансии се претерани, изјавија Лим Чоу Кјат од Џи-ај-си (GIC Pte) и Џени Џонсон од „Франклин темплтон“ (Franklin Templeton).

Што се однесува на „Енвидија“, компанијата порасна до тој степен да биде поголема од секторите енергија, материјали и недвижности заедно, а во зависност од денот, дури ја надминува и нивната заедничка тежина плус секторот комунални услуги, посчува Рајан Грабински од „Стратагас“ (Strategas). Таа е поголема и од целиот индустриски сектор.

„Исходот најверојатно ќе испрати брановиден ефект низ американските и меѓународните пазари“, рече Грабински. „Иако очекувањата за ВИ пошироко се оладени во последните недели, овој извештај има потенцијал да го врати оптимизмот. Но, без дилема, летвичката сега е исклучително висока.“

Корпорациски вести:

„Мајкрософт“ (Microsoft Corp.) и „Енвидија“ (Nvidia) се обврзаа да инвестираат до вкупно 15 милијарди долари во „Антропик ПБЦ“ (Anthropic PBC), потег што го поврзува развивачот на ВИ уште поблиску со двата најголеми поддржувачи на неговиот ривал „Опен еј-ај“.

Акциите на „Шаоми“ (Xiaomi Corp.) паднаа на најниското ниво во последните шест месеци, откако компанијата предупреди дека растечките трошоци за чипови и намалените даночни олеснувања за електрични возила ќе ги намалат маржите следната година.

„Мета“ (Meta Platforms Inc.) доби клучна судска пресуда дека аквизициите на апликацијата Инстаграм (Instagram) и сервисот Ватсап (WhatsApp) не ги прекршуваат антимонополските правила во САД.

Главните движења на пазарите

Акции

• S&P 500 futures паднаа за 0,1 отсто до 6:50 часот по лондонско време
• Nasdaq 100 futures се намалија за 0,2 отсто
• MSCI Asia Pacific Index падна за 0,2 отсто
• Hang Seng во Хонгконг се спушти за 0,4 отсто
• Shanghai Composite порасна за 0,3 отсто
• Euro Stoxx 50 futures останаа речиси непроменети

 

Валути

• Bloomberg Dollar Spot Index беше речиси непроменет
• Еврото е речиси непроменето, на 1,1589 долари
• Јапонскиот јен е речиси непроменет, на 155,36 за долар
• Офшор-јуанот е речиси непроменет, на 7,1105 за долар
• Британската фунта е речиси непроменета, на 1,3148 долари

 

Криптовалути

• Биткоинот падна за 1,6 отсто, на  90.957,01 долари
• Етерот падна за 1,8 отсто, на 3.040,81 долари

 

Обврзници

• Приносот на 10-годишните американски обврзници беше речиси непроменет, на 4,12 отсто
• Приносот на 10-годишните јапонски обврзници се зголеми за два базични поена, на 1,765 отсто
• Приносот на 10-годишните австралиски обврзници се намали за два базични поена, на 4,42 отсто

 

Суровини

• Цената на златото порасна за 0,7 отсто, на 4.094,43 долари за унца
• Суровата нафта ВТИ падна за 0,3 отсто, на 60,56 долари за барел