.webp){kind=icon}
Македонскиот берзански индекс МБИ 10 се најде меѓу првите топ пет берзански индекси во регионот ЕМЕА (Европа, Блискиот Исток, Африка) по остварениот принос од почетокот на годинава заклучно со 19 јули, според рангирањето на терминалот на „Блумберг“. Со остварен принос од 36,42 проценти МБИ10 го зазеде четвртото место. На првите три места на листата на „Блумберг“ доминираат берзанските индекси кои вклучуваат компании од Турција односно од истанбулската берза. На првото место е Dow Jones Turkey Titans 20 со остварен принос од 56,97 проценти, на второто место е BIST 30 Index со принос од 51,18 проценти, а на третото место е BIST 100 Index со остварен принос од 48,76 проценти.
Листата на индекси рангирани по принос од почетокот на годината/извор: терминал на Блумберг
Од земјите од регионот Адрија, на оваа листа се најдоа словенечкиот SBITOP (Slovenian blue chip index), кој со остварен принос од 33,53 проценти се најде на седмото место, а подолу на листата се и српскиот BELEX 15, кој со принос од 15,39 проценти го зазеде 19.место и хрватскиот CROBEX, кој со принос од 14,91 проценти се најде на 20.место.
Регионот ЕМЕА вклучува повеќе од 100 земји, чии граѓани колективно зборуваат повеќе од две илјади јазици. Вкупниопт број на населението во регионот ЕМЕА изнесува помеѓу 2,1 и 2,2 милијарди луѓе.
Земји од регионот ЕМЕА/извор: World population review
Значителен раст на прометот на Македонската берза
„Блумберг Адрија“ веќе пишуваше дека вкупниот промет на Македонската берза во првата половина од 2024 изнесувал 3,8 милијарди денари (63,1 милиони евра), што е зголемување за 46,2 проценти во однос на истиот период минатата година кога вкупниот промет изнесувал 2,6 милијарди денари (43,1 милиони евра). Ваквиот раст главно се должи на зголемувањето кај класичното тргување со акции каде што има зголемување на прометот од 94,34 проценти.
Во првото полугодие од 2024 година најтргувани се акциите на „Комерцијална банка“, „Алкалоид“ и „НЛБ Банка“. Најголем раст на вредноста имаат акциите на „Адинг“, а најголемо опаѓање акциите на „Либерти“.
Банките го туркаат нагоре МБИ10
Аналитичкиот тим на „Блумберг Адрија“ во регионалната анализа на пазарот на капитал во мај годинава посочи дека од почетокот на годината до денес МБИ (MBI) и СБИТОП (SBITOP) имаат најдобри перформанси, а следени се од БЕЛЕКС (BELEX15) и КРО10 (CRO10).
„Растот на МБИ е поттикнат од банкарскиот сектор, кој сочинува 43 проценти од вкупниот индекс. Во првиот квартал од 2024 година, трите најголеми банки во Македонија забележаа просечен раст од 24 проценти на годишно ниво кај нето-приходите од камати“, укажаа од нашиот аналитички тим.
Оттаму додадоа дека перформансите на СБИТОП во голема мера ѝ се припишуваат на НЛБ, која е на пат да го удвои својот бизнис до 2030 година и сè уште одржува поволно вреднување.
„БЕЛЕКС15 беше под влијание на стекнувањето малцински акции од страна на „Месер“, која сочинува 20 проценти од индексот. Силните перформанси на КРО10 може да му се припишат на робусното враќање на ’Кончар’ (+39 проценти), поради историски високите финансиски резултати и новите нарачки“, велат аналитичарите.
