Скромни добивки на акциите во Европа по извештајот за инфлацијата

Акциите на европските берзи се тргуваа со мали добивки во текот на вчерашниот ден, откако агенцијата Еуростат го објави конечниот извештај за инфлацијата, која во јули во Еврозоната достигна 8,9 проценти.

Исто темпо на раст на цените е наведено и во прелиминарните проценки на агенцијата, објавени на крајот од јули. Во цела Европска Унија стапката на инфлација беше уште повисока и достигна 9,8 проценти.

Од друга страна, во споредба со претходниот месец, инфлацијата остана иста во три членки на ЕУ, а забавување на растот на цените е регистриран во шест држави, се наведува во извештајот.

По извештајот на Американската управа за енергетски информации (ЕИА), во кој се наведува дека резервите на суровата нафта во САД минатата недела се намалени за повеќе од 7 милиони барели, цената на фјучерсите за овој енергенс пораснаа за повеќе од 2 отсто во текот на тргувањето на европските берзи.

Така, цената на фјучерсите Вест Тексас Интермедиејт (West Texas Intermediate) за септември пред затворање на тргувањето во Европа пораснаа за 2,33 проценти, на 90,16 долари за барел, а цената на Брент (Brent) фјучерсите за октомври се зголеми за 2,66 отсто, на 96,14 долари за барел.

Кога станува збор за енергенсите, од Германија објавија дека ќе го намалат данокот на додадена вредност (ДДВ) за природниот гас од 19 на 7 проценти, со цел да се заштитат потрошувачите.

Германскиот индекс DAX на крајот од тргувањето напредуваше и го заврши денот со позитива од 0,51 отсто, додека вредноста на францускиот индекс CAC 40 се зголеми за 0,4 проценти. Британскиот берзански индекс FTSE 100 забележа раст од 0,32 отсто. 

Вредноста на фунтата и еврото падна во однос на доларот, па на затворањето на евроскиот берзански ден вредноста на фунатата беше за 0,4 отсто пониска, додека еврото забележа пад од 0,48 отсто.

Во моментов нема коментари за веста. Биди прв да коментира...

Остави коментар