Време ли е за продажба на акции и има ли побезбедни инвестиции?

Политичката ситуација можеби е хаотична, но финансиските советници велат дека сè уште не е време за продажба на вложените пари.

Секако, ризиците за растот во САД се зголемуваат, особено по случувањата што следуваа откако Доналд Трамп беше инаугуриран за претседател, а новата администрација повлече низа мерки што имаат силно влијание. Трговската војна на претседателот може да ги зголеми цените за веќе затегнатите потрошувачи. И покрај песимизмот, индексот S&P 500 падна до вторникот за околу 5,7 проценти во текот на изминатите две недели.

Но, како што акциите пораснаа во средата, експертите што знаат како се прави богатство имаат добар совет за плашливите инвеститори: Не паничете и немојте да ги повлекувате инвестираните пари.

„Моја претпоставка е дека најверојатно цените ќе одат нагоре и надолу додека не добиеме поголема сигурност за тарифите“, вели Сара Мејтре, основачка на „Кемриел адвајзорс“ (Camriel Advisors) од Калифорнија. „Но многу е тешко да се одреди кога да се вратите со инвестиции во акции и дали може да изгубите повеќе“.

Наместо тоа, советниците со кои разговараше „Блумберг“ велат дека инвеститорите треба да ги преиспитаат своите позиции и да бараат можности што може да ги понуди распродажбата на акции. Еве повеќе за тоа што им препорачуваат на клиентите:

1. Повеќе пари во орочени депозити

За инвеститорите што поседуваат готовина, некои сертификати за депозит (терминот важи за САД и доаѓа од англискиот: Certificates of deposit), сè уште нудат атрактивни приноси, а тие стапки најверојатно ќе се намалат во наредните месеци доколку Федералните резерви на САД продолжи да ги намалува стапките. На пример, „Маркус“, банката за потрошувачи на „Голдман Сакс“, нуди принос од 4,5 проценти за оние што сакаат да ја орочат својата готовина на 14 месеци, додека „Баркли“ (Barclays) има 12-месечни депозити, со принос од 4 проценти.

2. Ловете добри цени во висококотираните технолошки компании

Во споредба со пред две недели, акциите на компаниите што влегуваат во величенствените седум се намалени, а тие се впрочем акциите што го поттикнаа S&P 500 на повисоко во последните две години. На пример, акцијата на „Тесла“ падна за повеќе од 20 отсто, додека на „Амазон“ вреди за 10 отсто помалку. Ова може да биде можност да се додаде изложеност со релативен попуст, вели Дилан Бел, главен инвестициски директор на „Калбеј инвестментс“ (CalBay Investments) од Денвил, Калифорнија. Тој ја гледа 2025 година како година на раст на пазарите на капитал и покрај неодамнешниот пад.

„Конкретно, големите технолошки акции постојано ја намалуваат заработката во последните неколку години. И мислам дека тоа е она што ни влева самодоверба понатаму“, рече Бел. Некои инвеститори побегнаа од големите технолошки компании по појавата на „Дипсик“ (DeepSeek) како закана за доминацијата на САД во вештачката интелигенција. Но Бел гледа дека големите фирми се добро позиционирани да преживеат каква било консолидација со оглед на нивните силни финансиски позиции.

3. Проверете ја вашата географска изложеност

За некои инвеститори со портфолија што се значајно насочени кон САД, неодамнешните турбуленции на пазарот беа повик за будење. Бидејќи наративот за „американската исклучителност“ е доведен во прашање, сега би можело да биде добро време за насочување кон другите региони, вели Сузана Стритер, шефица на пари и пазари во „Харгривс Лансдоун“ (Hargreaves Lansdown) во Бристол, Англија.

Таа забележува дека додека FTSE и другите европски индекси растат, па дури и достигнуваат рекорди во последно време, тие сè уште се потценети во однос на САД. Уште повеќе, тие не се толку многу изложени на големите технолошки компании односно на индексот S&P 500 или Nasdaq 100, што би можело да се покаже корисно, ако има голема ротација подалеку од секторот. Инвеститорите би можеле да остварат профит од американските индекси - и S&P 500 и Nasdaq се зголемени за приближно 15 проценти од пред една година - и да се диверзифицираат во Европа.

„Она што го нуди индексот на Обединетото Кралство е повеќе со одбранбени квалитети, односно е мешавина од фармацевтски производи, финансии, комунални услуги, таму се и акциите на големите потрошувачки гиганти, а исто така и многу акции што исплаќаат дивиденда“, рече таа. „Тоа може да биде навистина интересно за оние луѓе што се фокусирани на приходите, а не на некој вид големи придобивки од растот на кои можеби се навикнале“.

4. Бидете мирни за криптото

Падот на биткоинот за околу 18 отсто од највисокото ниво во јануари е драматичен. Ниту еден конвенционален советник не би им рекол на поединци да влезат во криптоинвестиции. Но, експертите велат дека е важно да го имате предвид вашиот временски хоризонт за време на периоди на нестабилност доколку сте инвестирале.„Гледаме дека сега има простор за биткоин само поради новата администрација на САД“, вели Лале Аконер, аналитичар на глобален пазар во „еТоро“ (eToro).

Претседателот вети дека ќе создаде стратегиска резерва на биткоин, што беше едно од многуте ветувања поврзани со криптото, а порастот на цените до инаугурацијата на Трамп зацврсти нова инвестициска база.

„Штом ќе се намали малку оваа краткорочна нестабилност, ќе видиме и поопипливи комуникации и акции што всушност доаѓаат од администрацијата на Трамп“, рече Аконер. „Мислам дека тоа ќе биде од поголема помош за понатаму“.

Во моментов нема коментари за веста. Биди прв да коментира...

Остави коментар