Волстрит преминува од надеж во паника поради корекцијата на технолошкиот индекс

Пред само две недели мегатехнолошките акции и компаниите што произведуваат чипови го поттикнаа индексот Nasdaq 100 до уште еден рекорд. Тоа беше 53-то највисоко ниво на сите времиња за технолошки репер откако во март 2023 година ЧетГПТ (ChatGPT) ги лансира соништата за свет на вештачка интелигенција (ВИ). Растот што следуваше додаде 13 трилиони долари на вредноста на технолошкиот репер. А апетитот на инвеститорите се чинеше без дно.

Но изгледа празнувањето заврши, барем засега. Nasdaq 100 вчера падна за 2,8 проценти, намалувајќи се за 9,6 отсто откако го достигна рекордот на 19 февруари. Тоа е толку брзо повлекување што мора да се вратите на колапсот на пандемијата за да има со што да се спореди. Акциите на чиповите водат во распродажбата, со индексот Philadelphia Semiconductor, кој падна за 4,5 отсто.

Bloomberg

 

Во меѓувреме трговците се обложуваат на повеќе падови. А мечкиното расположение ги опфаќа и технолошки акции.

„Дојде до вистинско опуштање на тргувањето“, рече Џо Салуци, коменаџер за тргување во „Темис трејдинг“ (Themis Trading). „На удар се пред сѐ високотехнолошките акции. Секако, не е добро чувството, но ова е пазар воден од вестите и работите може да се променат во секој момент, како што се случи пред неколку дена. Но има толку голема неизвесност што има смисла да постои вистинска неподготвеност да се купат овие големи технолошки имиња“, вели тој.

По години на несмален ентузијазам што ги поттикна инвеститорите да одредат што треба да купат за нивните портфолија, дојде до пресврт во размислувањата. Распространетиот страв од трговска војна поттикната од воведувањето царини од страна на претседателот на САД, Доналд Трамп, лепливата инфлација и масовните отпуштања, кои предизвикуваат рецесија или уште полоша стагфлација, ги натера трговците да гледаат што треба да продаваат, а не што треба да купуваат. А најголемите победници во изминатите неколку години се технолошките акции, особено чиповите.

Повторно одредување на растот

„Инвеститорите повторно ги проценуваат изгледите за раст на овие акции на пазарот, кој ќе се води од вестите за царини и инфлација, а не од идниот потенцијал за раст од вештачката интелигенција“, рече Дејв Маца, главен извршен директор на „Рундхил инвестментс“ (Roundhill Investments). „Со други зборови, деновите на добри вибрации завршија“, додаде тој.

Акциите на полупроводничките компании се особено под притисок бидејќи кинеската способност за вештачка интелигенција ги нагласува прашањата за изгледите за побарувачката. „Енвидија“ (Nvidia Corp.) вчера беше најголемата кочница на индексот S&P 500, чии акции потонаа за 5,7 проценти, што придонесе двонеделниот пад да биде речиси 20 отсто. „Бродком“ (Broadcom Inc.), компанијата што ќе извести за своите деловни резултати по затворањето на пазарот, беше четвртиот најголем кочничар на S&P, со пад од 6,3 проценти.

„Ова покажува дека трговијата со вештачка интелигенција може да биде нарушена од Пекинг, што ја доведува во прашање основната слика“, рече Џејсон Бритон, главен инвестициски директор на „Рифлекшн асет менаџмент“ (Reflection Asset Management).

Но не предизвикуваат штета само акциите на чиповите. Индексот на „Блумберг“ за седумте величествени (Bloomberg Magnificent Seven) - составен од „Алфабет“ (Alphabet Inc.), „Амазон“ (Amazon.com Inc.), „Епл“ (Apple Inc.), „Мета платформс“ (Meta Platforms Inc.), „Мајкрософт“ (Microsoft Corp.), „Енвидија“ (Nvidia) и „Тесла“ (Tesla Inc.) - веќе е во корекција, со пад од 16 проценти од највисокото ниво достигнато на 17 декември.

Распродажбата беше уште поекстремна во шпекулативните делови на пазарот. Кошничката од непрофитабилни технолошки компании вчера падна за 4,2 проценти, а во текот на годинава загуби 11 отсто.

Иако неуспехот не значи дека понатамошна болка е нужно неизбежна, влошеното расположение на американскиот пазар на акции сигнализира остар пресврт по изборот на Трамп во ноември. Во месецот по денот на изборите, S&P 500 скокна за повеќе од пет проценти поради очекувањата дека новата администрација ќе ја зајакне економијата. Сега целата нејзина постизборна добивка ја нема.

„Држете се цврсто бидејќи ќе има многу турбуленции“, рече Ерик Дитон, претседател и управен директор на „Велт алајанс“ (Wealth Alliance). „Трговците се нервозни и загрижени за тоа како ќе влијаат царините на американските мултинационални компании, па технологијата е првата цел. Тоа ќе ги наруши главните индекси, со оглед на нивната голема тежина“, вели тој.

 

Во моментов нема коментари за веста. Биди прв да коментира...

Остави коментар