Продолжува растот на корејските акции по најдобриот месец од 2001 година

Јужнокорејскиот референтен индекс на акции го продолжува својот најсилен месечен раст во повеќе од две децении, нагласувајќи ја растечката важност на пазарот во глобалната трка со вештачката интелигенција (ВИ) по неодамнешните договори на „Енвидија“ (Nvidia Corp.) со локалните фирми.

По скокот од 20 проценти во октомври, што е негов најдобар месечен раст од 2001 година, индексот Kospi го започна ноември со брз почеток, искачувајќи се дури за 2,7 отсто, на рекордно високо ниво. Зголемен за 76 проценти од почетокот на годината, Kospi останува водечкиот берзански индекс во светот.

Денешниот раст, кој инаку е во согласност со неодамнешните сесии, беше поттикнат од растечката доверба во корејските технолошки компании како „Самсунг“ (Samsung Electronics Co.) и „СК Хајникс“ (SK Hynix Inc.), за кои се очекува да помогнат во обликувањето на иновациите во вештачката интелигенција. Олеснувањето на трговските тензии со САД, по значајниот договор финализиран минатата недела за време на посетата на Доналд Трамп, дополнително го поттикна пазарот, кој се мачеше во поголемиот дел од минатата година.

„Денешното зголемување е ефект на Џенсен Хуанг“, рече Ан Хјунѓин, главен извршен директор на „Билионфонд асет менаџмент“ (Billionfold Asset Management Inc), осврнувајќи се на извршниот директор на „Енвидија“ (Nvidia), кој го посети Сеул минатата недела за да објави зделки. Влијанието на неговите состаноци со претседателот на „Самсунг“, Џеј Ј. Ли, и други, додаде Ан, „се засилува на пазарот“.

Bloomberg

 

Акциите на „СК Хајникс“ денеска скокнаа дури за 11 отсто бидејќи извршниот директор на „Амазон“ (Amazon.com Inc.), Енди Џаси, рече дека двете компании планираат заеднички да истражуваат нови технологии како што е агентската вештачка интелигенција. Акциите на корејскиот производител на чипови беа поттикнати и од аналитичарот на „СК Секјуритис“ (SK Securities), кој ја зголеми својата целна цена од 480.000 вони (околу 336 американски долари), или повеќе од двојно по рекордниот квартален извештај за профит.

Аналитичарот Хан Донг-Хи од „СК Секјуритис“ ги повика инвеститорите да се откажат од долгогодишната метрика за вреднување што обично се користи за циклични акции како мемориски чипови. „Со нова парадигма ни треба нов мултипликатор“, напиша тој во белешката, зголемувајќи ја својата цел за „СК Хајникс“ на еден милион вони (околу 700 американски долари). Брокерската куќа не е поврзана со „СК Хајникс“.

Bloomberg

 

Акциите на „Самсунг електроникс“ скокнаа дури за 3,5 отсто откако и Хан ја зголеми својата ценовна цел за компанијата. Индексот Kospi доби поттик и од други фирми - вклучувајќи ги „Хјундаи“ (Hyundai Motor Co.) и „Навер“ (Naver Corp.) - кои потпишаа договори со „Енвидија“ за време на посетата на Хуанг на Кореја за самитот на извршни директори на Азиско-пацифичката економска соработка (АПЕК). Неговото патување предизвика значителна возбуда низ целата земја, нагласена со вирално излегување во ресторан за пржено пилешко со Ли од „Самсунг“ и извршниот претседател на „Хјундаи“, Чунг Еуисун.

Обложувањата за улогата на Кореја во ВИ се проширија и на помошни играчи, зголемувајќи ги акциите на компании како што е производителот на енергетска опрема „ХД Хјундаи електрик“ (HD Hyundai Electric Co.), за кои се очекува да играат клучна улога во воведувањето на технологијата. Пораснаа и компаниите за роботика и самостојно управување, кои исто така се сметаат за профитери од напредокот на ВИ.

Денешниот раст е одраз и на ширината на корејскиот пазар, со добивки што се протегаат надвор од технологијата. Акциите од одбраната, како што се тие на компанијата „Ханва еероспејс“ (Hanwha Aerospace Co.) и „Ханва оушн“ (Hanwha Ocean Co.), скокнаа поради подобрените изгледи по договорот со САД за изградба на подморница на нуклеарен погон во американското бродоградилиште.

Проектот беше една од неколкуте најави поврзани со трговијата направени за време на посетата на Трамп на Кореја за самитот на АПЕК. Договорот за намалување на американските царини за корејскиот увоз, со што се намалуваат давачките за автомобили и други стоки на 15 од 25 отсто, дополнително го зголеми расположението.

Глобалните инвеститори, исто така охрабрени од поддржувачките политики на претседателот Ли Џе Мјунг, вложија 12,8 милијарди долари во корејски акции од почетокот на јули.