Волстрит ги намали прогнозите за S&P500, но сѐ уште очекува раст

Три од најсигурните прогнозери на Волстрит признаа дека биле премногу оптимисти во своите процени за движењето на индексот S&P 500 годинава – но, сепак, сѐ уште веруваат дека акциите ќе имаат солиден раст во преостанатите три квартали од 2025 година.

Стратезите на „Голдман Сакс“ (Goldman Sachs Group Inc.), „Сосиете женерал“ (Societe Generale) и „Јардени рисрч“ (Yardeni Research) на почетокот од вториот квартал ги намалија проекциите за до крајот на годината за овој референтен индекс, забележувајќи дека неизвесноста му донесе пад од 4,6 проценти во првиот квартал. За „Голдман“ и „Јардени“ ова беше второ намалување на проекциите за помалку од еден месец, пишува „Блумберг“.

Меѓутоа, сите три инвестициски банки очекуваат S&P 500 да ја заврши годината на повисоко ниво одошто заврши тргувањето во понеделникот, со тоа што „Сосиете“ предвидува пораст од 14 проценти, на 6.400 поени, што е 9 проценти скок за цела година. Со други зборови, иако овие пазарни предвидувања се своевидно предупредување за економско забавување – истакнувајќи ги ризиците што за економскиот раст и потрошувачкиот сентимент ги носат политиките на Доналд Трамп – тие сѐ уште не ги подготвуваат инвеститорите за евентуално фијаско. Напротив, секој побитен стратегиски аналитичар што „Блумберг“ го следи сѐ уште очекува раст на S&P 500 отсега па до крајот на годината.

Ед Јардени, основач на „Јардени рисрч“, на пример, очекува индексот да достигне 6.000 поени до крајот на 2025 година, што е пониско од претходната проекција за 6.400. Истовремено, Дејвид Костин од „Голдман Сакс“ очекува индексот да ја заврши годината на 5.700 поени наспроти претходната прогноза од 6.200. Стратезите на „Сосиете женерал“ се најоптимистични, тие прогнозираат цел од 6.400 поени, наместо првичните 6.750.

Ревидирањето на процените доаѓа непосредно пред нетрпеливо очекуваниот рок за царините, на 2 април, кога се очекува претседателот Доналд Трамп да објави реципрочни царини за сите трговски партнери. Заканите од високите давачки веќе ги поттикнаа економистите да се откажат од нивните очекувања за растот на БДП на САД. „Блумберг економикс“ соопшти дека во екстремно сценарио, зголемувањето на просечната американска царинска стапка за 28 процентни поени може да му нанесе удар од 4 отсто на БДП и да ги зголеми цените за речиси 2,5 отсто.

Но многу прогнозери од Волстрит сè уште очекуваат дека тарифите на крајот ќе бидат само краткотраен удар за берзата.

„Очекуваме да се врати довербата до крајот на годината“, велат од „Сосиете женерал“. „За вториот квартал очекуваме S&P 500 да биде позитивен, доколку тарифите ‘мило за драго’ од 2018 година се некаков водич, и покрај негативната недела околу ‘Денот на ослободувањето’“.