Светските индекси на најниско ниво месецов

Глобалните акции вчера паднаа на најниско ниво во овој месец, а државните обврзници беа со загуби поради загриженоста во врска со затегнувањето на монетарната политика на Федералните резерви (ФЕД).

ФЕД ја стисна кочницата за да интервенира во движењата на американската економија, а со цел да обезбеди забавување на инфлацијата. Целото внимание на инвеститорите и на стручната јавност е насочено кон симпозиумот на банкарите од американските централни банки, што треба да се одржи неделава, на кој што ќе се одлучува за следниот чекор на ФЕД и висината на зголемувањето на основната каматна стапка.

Азиско-пацифичкиот индекс на акции падна за 1 отсто, додека S&P 500, Nasdaq 100 и европските фјучерси се повлекоа. Поконкретно, индексот S&P 500 падна за 2,1 отсто, а Nasdaq 100 за 2,7 проценти.

Акциите на енергетските компании беа меѓу ретките кои од тргувањето во текот на вчерашниот ден остварија добивка, а тоа е благодарение на можноста за зголемување на производството и испорака на сурова нафта од страна на ОПЕК.

Јапонскиот индекс Topix, јужнокорејскиот Kospi и индексот на Хонг Конг Hang Seng паднаа за 1 отсто.

Австралиските и обврзниците од Нов Зеланд паднаа. Австралискиот индекс S&P/ASX 200 загуби 1,2 отсто од својата вредност.

Доларот остана на својата висока вредност, додека еврото беше близу до најниското ниво во последните две децении.