Берзански преглед: Најдолга победничка серија на Волстрит во последните две децении

Празничната недела предизвика берзанска еуфорија преку Атлантикот, каде што индексот S&P 500 ја забележа најдолгата победничка низа во последните две децении, при што лузните од априлскиот царински шок речиси целосно закрепнаа поради новите знаци на дипломатија меѓу САД и Кина.

Ајде да ги разгледаме бројките. Индексите S&P 500 и индустрискиот Dow Jones минатата недела завршија со раст од 2,85 проценти, додека технолошкиот Nasdaq доби 3,37 проценти. Индексите S&P 500 и Nasdaq 100 пораснаа за повеќе од еден процент во петокот, што значи вторa последователна недела на раст.

Да погледнеме и во Европа. Германскиот индекс DAX минатата недела забележа раст од 3,94 проценти, францускиот CAC 40 порасна за 2,71 проценти, лондонскиот FTSE 100 за 2,15 проценти, а паневропските индекси Eurostoxx 50 и Eurostoxx 600 пораснаа за 3,20 проценти односно 3,27 проценти.

Индексот на доларот малку се намали. По царинскиот шок од априлскиот „ден на ослободување“, вредноста на доларот во однос на еврото значително падна, но се стабилизира околу курсот од 1,13 долар за евро. Американските државни обврзници паднаа, при што двегодишниот принос – чувствителен на монетарната политика – скокна за повеќе од 10 базични поени, на 3,83 проценти. Златото забележа вторa недела на загуби по ред, пренесува „Блумберг“.

Bloomberg Adria

 

Нафтата поевтинува, ОПЕК+ го зголемува производството

Минатата сабота осум држави членки на нафтениот картел ОПЕК+ одлучија повторно да го зголемат производството на сурова нафта во јуни, кога тоа ќе изнесува 411 илјади барели дневно. Следната средба е закажана за 1 јуни 2025 година, кога ќе го определат обемот на производството за јули.

Цената на нафтата паѓа. Цената на барел нафта брент од Северно Море во моментот на пишување на текстот се движеше околу 61,29 долари, додека цената на еден барел нафта ВТИ од Западен Тексас беше 58,29 долари.

Светските цени на суровата нафта во последните неколку недели паднаа на најниско ниво во последните четири години. Главните причини за падот се трговската војна меѓу САД и Кина и неочекуваната одлука на ОПЕК+ да го зголеми производството за 411 илјади барели дневно во мај – тројно повеќе од првичните планови на групата.

Bloomberg Adria

 

Дали Фед повторно ќе му се спротивстави на Трамп?

Во САД изненадија податоците за новите работни места. Извештајот објавен минатата недела покажа дека пазарот на труд во САД полека се лади, но и понатаму е стабилен. Тоа ги смири стравувањата за влијанието што би можел да го има претседателот Доналд Трамп врз економијата. Последните случувања исто така покажуваат дека трговските тензии меѓу Кина и САД се намалуваат, иако без значајни пробиви.

Bloomberg

Функционерите на американската централна банка (Фед), кои ќе се сретнат во вторник и в среда во Вашингтон, веројатно ќе ги задржат каматните стапки непроменети поради инфлацијата. Но стравувањата од економско забавување растат, додека Трамп и некои негови заменици продолжуваат да го повикуваат Фед да ги намали каматните стапки.

Претседателот на Федералните резерви, Џером Пауел, кој се наоѓа во тешка позиција, можеби беше утешен од петочните владини податоци што покажаа дека бројот на вработувања во април пораснал за 177 илјади. Сѐ додека пазарот на труд остане стабилен, Фед полесно ќе може да ја оправда својата одлука.

Во меѓувреме популарниот индикатор за инфлација што го користи Фед покажува дека ценовните притисоци и понатаму полека се намалуваат. Пауел и неговиот тим обично би го поздравиле ова, но зголемените американски царини на увозот можат да го поништат постигнатиот напредок во борбата против инфлацијата.

Сега неизвесноста е доминантен фактор за сите главни централни банки во светот. Белата куќа се обидува да постигне договори за царините, кои повторно би можеле да ги променат условите – вистински кошмар за сите што се обидуваат да предвидат идни економски случувања.

„Можеби достигнавме врв на неизвесноста околу политиката“, изјави за „Блумберг“ Кевин Тозе, член на инвестицискиот одбор на Кармињак (Carmignac) во Париз. „Разговорите се во тек и изгледа дека Трамп ублажи некои од своите политики. Ако на тоа се додаде дека сезоната на добивки беше доста позитивна, тогаш општата слика не изгледа толку лошо“.

Легендарниот Ворен Бафет најави повлекување од врвот на „Беркшир Хатавеј“

Ворен Бафет, кој од „Беркшир Хатавеј“ (Berkshire Hathaway) направи компанија вредна повеќе од 1,16 трилион долари, а себеси се претвори во славен милијардер познат по инвестициска мудрост и духовитост, ќе се повлече од врвот на конгломератот по шест децении – на крајот од годината.

По одобрување од управниот одбор, управувањето со конгломератот треба да го преземе Грег Абејл, потпретседателот за нефинансиски операции, соопшти 94-годишниот Бафет во саботата на годишното собрание на акционери во Омаха, Небраска. 

Bloomberg

Објавата ги изненади и одборот и самиот Абејл, кој иако долго време важеше за наследник на Бафет, не бил информиран дека оваа вест ќе биде објавена токму тогаш. „Ова е главната вест на денот“, изјави Бафет. „Благодарам што дојдовте“.

Имате акции од „Енвидија“? Оптимизмот кај аналитичарите опаѓа

Компанијата „Енвидија“ (Nvidia) во средата доби ретка препорака од аналитичарите – „продај“. СГС (Seaport Global Securities) предупреди дека добивките од вештачката интелигенција (ВИ) „веќе се пресметани во цената на акцијата“.

Најголемите клиенти на производителот на чипови сакаат да развијат сопствени чипови, а буџетите за вештачка интелигенција во 2026 година најверојатно ќе се намалат, напиша аналитичарот Џеј Голдберг во белешката.

Оценката „продај“ е исклучок во рамките на исклучително позитивниот консензус за акцијата на „Енвидија“ – компанија што во последните неколку години стана синоним за ВИ. Околу 88 отсто од аналитичарите што ги следи „Блумберг“ препорачуваат „купи“, додека 11 отсто препорачуваат „задржи“. Само СГС има оценка „продај“.

Сезона на објавување деловни резултати

„Мета“ (Meta) ги смири финансиските пазари со своите резултати, откако за првото тримесечје пријави приходи над очекувањата. Компанијата, која стои зад социјалните мрежи како Фејсбук (Facebook) и Инстаграм (Instagram), пријави 42,3 милијарди долари продажба, пренесува „Блумберг“. Тоа ги надмина процените на аналитичарите, кои очекуваа 41,4 милијарда долари. „Мета“ остварува 98 проценти од приходите преку реклами.

Резултатите на уште еден член на „величествената седумка“ – „Мајкрософт“ (Microsoft) – исто така беа дочекани со ентузијазам. Вкупните приходи за третото фискално тримесечје пораснаа за 13 отсто, на 70,1 милијарди долари, а приспособената добивка изнесуваше 3,46 долари по акција. Аналитичарите очекуваа во просек 68,5 милијарди долари приходи и 3,21 долари добивка по акција, пренесе „Блумберг“.

Компанијата „Амазон“ (Amazon.com) соопшти дека во наредните месеци очекува предизвикувачка бизнис-клима, што ја одразува загриженоста на многу компании околу влијанието на царините и економските потреси врз потрошувачката. Резултатите за првото тримесечје беа солидни, но компанијата предупреди дека добивката од работењето во тековниот квартал ќе биде под очекувањата на Волстрит. „Амазон“ прогнозира добивка од 13 до 17,5 милијарди долари, додека аналитичарите очекуваа во просек 17,8 милијарди. Продажбата во кварталот што завршува во јуни се очекува да биде меѓу 159 и 164 милијарди долари, во однос на очекуваните 161,4 милијарда.

Акциите на „Епл“ (Apple) во четвртокот по затворањето на берзата паднаа за 4,2 проценти, поради слаба продажба во Кина, која беше под очекувањата. Компанијата што стои зад популарниот ајфон исто така предупреди дека царините ќе ги зголемат трошоците во овој квартал, што укажува дека геополитичките тензии сѐ повеќе влијаат врз највредната компанија во светот.

Што следиме неделава?

Понеделник, 5 мај

- Берзите во Јапонија, Кореја и во Кина ќе бидат затворени.

- „Евростат“ ќе ги објави податоците за довербата на инвеститорите и индустриското производство.

- Финансиски резултати ќе објават компаниите „Беркшир Хатавеј“, „Палантир“ и „Форд моторс“.

Вторник, 6 мај

- Во САД ќе бидат објавени податоци за трговскиот биланс.

- Во Франција ќе се објават податоци за индустриското производство.

- Резултати ќе објави компанијата АМД.

- Се очекува германскиот парламент да ја потврди новата влада.

Среда, 7 мај

- Во Германија ќе се објават податоци за фабричките нарачки.

- „Евростат“ ќе објави податоци за малопродажбата.

- Американската централна банка (Фед) ќе одлучува за каматните стапки.

- Резултати ќе објават „Ново Нордиск“ и „Волт Дизни“.

- Ќе започне конклавата за избор на нов папа.

Четврток, 8 мај

- Во Германија ќе се објават податоци за трговскиот биланс и индустриското производство.

- Банката на Англија ќе одлучува за каматните стапки.

- Резултати ќе објави „Тојота“.

Петок, 9 мај

- Во Кина ќе се објават податоци за трговскиот биланс.

- Финансиски резултати ќе објави „Комерцбанк“.