Берзански преглед: Продолжува царинската нишалка

Најважната берзанска вест од минатата недела не дојде од Волстрит, туку од зграда оддалечена само 1,2 километри од фамозната финансиска улица. Ако преку царините животот на инвеститорите и бизнисмените не го комплицира Доналд Трамп, тогаш тоа наместо него го прават американските судови. Откако во средата Судот за меѓународна трговија ја поништи Трамповата царинска политика, ден потоа на помош му притрча апелациониот суд.

Федералниот апелационен суд привремено ја суспендираше примената на одлуката на трговскиот суд, кој ги прогласи реципрочните царини на американскиот претседател за незаконски. Белата куќа успеа да го убеди судот со аргументот дека укинувањето на царините ѝ нанесува непоправлива штета на надворешната политика на САД. Но, судиите не одлучуваа врз основа на законитоста, туку само дозволија царините да останат во сила додека не се донесе конечна пресуда. Тоа значи дека со конечната одлука сè уште може да се урнат темелите на економската агенда на Трамп.

Одлуката на американскиот трговски суд го означи најновото поглавје за пазарите, кои диво осцилираа откако Трамп на почетокот на април со обемен извршен указ ги најави таканаречените реципрочни царини. Од тогаш, во налет на доцнења, политички пресврти и променливи сигнали за можни трговски договори, се изгубија и повторно се добија трилиони долари пазарна вредност.

„Ако одлуката на судот остане и царините бидат блокирани, подгответе се за глобален раст на ризикот во главните индекси, американскиот долар и суровините поради подобри очекувања за светскиот раст“, рече Ипек Озкардескаја, аналитичар во Swissquote Bank.

Главните американски индекси минатата недела завршија во зелено: S&P 500 порасна за 2,24 отсто, Nasdaq за 2,64 отсто, а Dow Jones за 1,79 отсто. Во Европа, германскиот DAX остана непроменет, францускиот CAC 40 падна за нешто повеќе од еден процент, додека лондонскиот FTSE 100 порасна за 0,38 отсто. Паневропските Eurostoxx 600 и Eurostoxx 50 пораснаа за 0,26 и 0,03 отсто.

Тргување TACO или облог за повлекување на Трамп 

Трамп минатата недела ги отфрли навестувањата дека Волстрит смета оти на крајот нема да ги спроведе екстремните царински закани, велејќи дека неговите постојани повлекувања се дел од стратегијата за постигнување трговски договори. „Тоа се вика преговарање,“ рече Трамп во средата, додавајќи дека намерно поставува смешно високи барања, а потоа малку попушта во текот на разговорите.

Трамп беше замолен да се осврне на извештаите за т.н. „тргување TACO“, каде инвеститорите профитираат од падовите на пазарот кога претседателот се заканува со царини, очекувајќи дека на крајот ќе попушти и акциите повторно ќе пораснат.

Кратенката TACO (Trump Always Chickens Out – Трамп секогаш се повлекува) ја измисли колумнист на британскиот ФТ (Financial Times), а ја прифатија трговците кои се обидуваат да се снајдат во динамичната царинска политика.

Bloomberg

 

Како да се излезе од американските пазари

Терминална луцидност е израз што го опишува краткиот период пред смртта кога тешко болен човек изгледа како да се подобрува. Пречесто тоа буди неоснована надеж кај оние што наскоро ќе жалат.

Според стратегот Бил Блејн, токму тоа се случи на американскиот берзански пазар минатата недела. По неколку месеци турбуленции, индексот S&P 500 годинава е речиси на нула, што ги натера многу инвеститори да помислат дека можеби сè ќе биде во ред.

Но, сметката доаѓа порано или подоцна. Вистината е дека царинскиот хаос, трајната напнатост на пазарот на обврзници, опасноста од стагфлација и сè уште екстремно високите вреднувања значат дека – ако сè уште не сте ги диверзифицирале инвестициите надвор од американскиот пазар – сега е крајно време да го направите тоа. (Се разбира, не се согласуваат сите со оваа анализа.)

Скокот на доларот е привремен, предупредуваат стратези

Долгорочното „мечкино“ (песимистичко) сценарио за доларот останува непроменето, откако трговскиот суд одлучи дека поголемиот дел од глобалните царини се незаконски. Индексот на доларот првично се искачи на повеќе од еднонеделно ниво, но тешко го задржа добитокот и до пладне се тргуваше без промена.

„Не гледам ништо друго освен дека доларот за една година ќе продолжи да слабее, бидејќи е силно преценет,“ изјави Џим О’Нил, поранешен претседател на Goldman Sachs Asset Management, за Bloomberg. Иако валутата можеби привремено ќе се стабилизира поради можноста за пониски царини, тој очекува понатамошни одливи кон други берзански пазари, што ќе го повлече доларот надолу.

Bloomberg

 

„Енвидија“ по објавата на резултатите: оптимизам на пазарите и покрај предизвиците во Кина

Во средата, „Енвидија“ ги објави долгоочекуваните резултати. Компанијата во првото тримесечје од фискалната 2025 година оствари приходи од 44,1 милијарди долари, што е раст од 69 отсто во споредба со истиот период минатата година и над очекувањата на аналитичарите, според Bloomberg. Приходите од сегментот на дата-центри беа малку под очекувањата – 39,1 милијарди долари наспроти очекуваните 39,2 милијарди, но сепак значително повеќе од 22,5 милијарди долари лани.

 

 

Компанијата предупреди и на пад од 8 милијарди долари во второто тримесечје, поради американските извозни ограничувања кон Кина. Извршниот директор Џенсен Хуанг изјави дека поради тие ограничувања, „Енвидија“ досега изгубила вкупно 15 милијарди долари приходи.

„Тесла“ по заминувањето на Маск

Минатата недела одекна и веста дека Илон Маск, најбогатиот човек на светот и советник на американскиот претседател, се повлекува од администрацијата. Акциите на „Тесла“ пораснаа, откако Маск најави дека ќе троши помалку на избори – и пари и време. „Мислам дека направив доволно,“ рече тој. На прашањето дали тоа е поради нападите врз „Тесла“, одговори: „Ако во иднина видам причина, ќе се вратам. Засега не ја гледам.“

 

 

Во четвртокот објави дека неговото време како официјален советник завршува, што отвора прашања за иднината на иницијативата за владина ефикасност (DOGE), која ја водеше. „Бидејќи моето време како специјален владин службеник завршува, сакам да му се заблагодарам на претседателот @realDonaldTrump за можноста да ја намалам расипничката потрошувачка,“ напиша Маск на платформата X.

Angel Garcia/Bloomberg

 

Златото се оддалечува од рекордните вредности

Цената на златото паѓа поради јакнењето на американскиот долар и намалената побарувачка за безбедни инвестиции. Инвеститорите истовремено ги проценуваат шансите за подобрување на трговските односи меѓу САД и ЕУ.

Цената на златото се намали за 1,5 отсто, откако се појавија знаци дека Јапонија можеби ќе ја прилагоди емисијата на државен долг, што ги зголеми приносите на глобалните обврзници и го зајакна доларот – што го прави златото поскапо за купувачи со други валути. Истовремено, пониските приноси ја намалуваат атрактивноста на златото, кое не носи камата.

Побарувачката за злато дополнително опадна поради знаци дека Белата куќа напредува во преговорите со некои трговски партнери. Златните ETF фондови бележат пет последователни недели на одливи, откако во април достигнаа највисоко ниво во повеќе од една година.

Регионални берзи: Што нè очекува во турбулентната 2025?

Аналитичарите на Bloomberg Adria направија преглед на берзите во регионот. Во услови на зголемена нестабилност, берзите во регионот покажаа мешани резултати од почетокот на годината. Словенија води со раст на индексот SBITOP од речиси 30 отсто, благодарение на добрите резултати на сите компании во индексот.

Хрватска, Северна Македонија и Сараево бележат умерен раст. Србија и Бања Лука заостануваат, поради слаби резултати во енергетскиот сектор и политичка неизвесност. И покрај последните добивки, акциите во регионот остануваат структурно потценети.

 

Што следиме оваа недела?

Понеделник, 2 јуни

- Кинеските берзи се затворени поради празник.
- PMI податоци за производство во еврозоната, Велика Британија и САД.
- Резултати од претседателските избори во Полска.
- Говор на Џером Пауел на конференција по повод 75 години од меѓународниот финансиски оддел на ФЕД.

Вторник, 3 јуни

- Eurostat објавува податоци за инфлација и невработеност.
- САД објавуваат JOLTS податоци за нови работни места.
- Претседателски избори во Јужна Кореја.

Среда, 4 јуни

- PMI податоци за услуги во еврозоната, Велика Британија и САД.
- Централната банка на Канада одлучува за каматни стапки.

Четврток, 5 јуни

- Податоци за фабрички нарачки во Германија.
- Одлука на ЕЦБ за каматни стапки.
- Податоци за трговскиот биланс на САД за април.

Петок, 6 јуни

- Германија објавува трговски биланс и индустриско производство.
- Податоци за невработеност во САД.
- Централната банка на Русија одлучува за каматни стапки.

Во моментов нема коментари за веста. Биди прв да коментира...

Остави коментар