Купувајте акции на „Виза“ и на „Мастеркард“, препорачуваат од Волстрит

Наодите за тоа дека големи мултинационални трговци разгледуваат начини како да ги заобиколат традиционалните провизии за кредитни картички, според аналитичари од Волстрит, претставуваат можност за инвеститорите да купат акции на „Мастеркард“ (Mastercard Inc.) и на „Виза“ (Visa Inc).

Акциите на „Мастеркард“  во петокот паднаа за 6,2 отсто, додека „Виза“ загуби повеќе од 7,1 отсто - најлош пад за еден ден за двата гиганта во последниве два месеца. Акциите на други компании за плаќања, како што се „Американ експрес“ (American Express Co.), „Пејпал“ (PayPal Holdings Inc.) и „Капитал уан“ (Capital One Financial Corp.) исто така се лизнаа во текот на тргувањето.

Секторот се соочува со притисок по извештај на „Волстрит журнал“ (Wall Street Journal), кој повикувајќи се на неидентификувани извори наведува дека „Волмарт“ (Walmart Inc.) и „Амазон“ (Amazon.com Inc.) се меѓу компаниите што неодамна разговарале за издавање сопствени т.н. стабилни монети (англ. stablecoins) во САД. Освен големите трговци, и други мултинационални корпорации како авиокомпании и „Експедија“ (Expedia Group, Inc.) размислуваат да издадат свои криптотокени за да ги заобиколат издавачите на картички како „Виза“ и „Мастеркард“. Стабилните монети  обично се врзани за валута како американскиот долар, за да можат да се користат за плаќања.

Иако оваа вест избриша повеќе од 60 милијарди долари пазарна вредност од „Виза“ и „Мастеркард“ заедно, аналитичарите велат дека сега е добар момент за купување акции по намалена цена.

Bloomberg Mercury

 

„Ги охрабруваме инвеститорите да купуваат акции на ‘Виза’ и на ‘Мастеркард’ додека цените се ниски“, напиша Ендру Џефри од „Вилијам Блер“ (William Blair) во белешка, повторувајќи ги оцените за надминување на резултатите и за двете компании.

Џефри истакнува дека стабилните монети сè уште не се соодветни за трговија меѓу бизнис и потрошувач, „иако трговците ги гледаат како потенцијален начин за намалување на трошоците за прифаќање картички“.

Потрошувачите се навикнати да користат кредитни и дебитни картички - навика што нема да се смени наскоро, додаде тој, нагласувајќи дека и недостигот од стандарди за стабилни монети може да ја ограничи нивната употреба.

Дикша Гера од „Блумберг интелиџенс“ смета дека падот на акциите во петокот ги одразува стравувањата дека стабилните монети можат да ги намалат пазарната застапеност и маржата на овие компании, но дека тие стравувања се прерани.

„’Виза’ и ’Мастеркард’ веќе проактивно интегрирале можности за работа со стабилни монети, додека недовербата и регулаторните пречки, заедно со бавната адаптација кај потрошувачите, веројатно ќе го забават масовното прифаќање“, напиша Гера во белешка.

Аналитичарот Руфус Хоун од „БМО Капитал маркетс“ (BMO Capital Markets) се согласува дека масовна употреба на стабилни монети во потрошувачките плаќања е малку веројатна, но вели дека дури и ако се прифатат, „Виза“ и „Мастеркард“ ќе имаат корист.

„Тие не седат мирни чекајќи да бидат извадени од колосек - и двете компании веќе имаат капацитети за процесирање и порамнување на плаќањата преку мрежи на стабилни монети и сметаме дека се добро позиционирани за да ги впаричат трансакциите во таква средина“, напиша Хоун, задржувајќи ги позитивните прогнози за двете компании.

 

-Со помош на Џорџи Мекеј и Метју Грифин

Во моментов нема коментари за веста. Биди прв да коментира...

Остави коментар