Глобалните акции ќе ги надминат американските во следните пет години, покажува најновата анкета на управувачи со фондови на Банката на Америка (Bank of America / BofA), што потврдува дека инвеститорите сè повеќе веруваат дека доминацијата на американскиот пазар завршува.
Околу 54 отсто од управувачите со средства очекуваат дека глобалните акции ќе бидат најдобрата класа на инвестиции, додека само 23 отсто се обложуваат на американските акции.
Само 13 отсто сметаат дека златото ќе донесе највисоки приноси, а 5 отсто се обложуваат на обврзници.
Ова е првпат Банката на Америка да ги праша инвеститорите која класа на средства според нив ќе биде најуспешна во петгодишен период. Одговорите го одразуваат растечкиот тренд на стратегијата „продај американско“, кој се засили кога претседателот Доналд Трамп ги зголеми царините и туркаше законодавство што би го зголемило буџетскиот дефицит за проценети 2,4 трилиони долари во следните десет години.
Ако прогнозите на управувачите со фондови се остварат, тоа ќе биде пресврт во досега најсигурната стратегија за остварување добивка: американските акции ги надминаа меѓународните во 13 од последните 15 календарски години.
Но тоа почнува да се менува. Во 2025 година индексот S&P 500 е на пат да заостане зад светските акции најмногу од 2009 година.
Други клучни наоди од анкетата:
На прашањето за влијанието на пакетот трошоци на Трамп, 59 отсто од инвеститорите предвидуваат дека во следните шест месеци тој нема да ја поттикне економската активност во САД.
Околу 21 отсто од анкетираните очекуваат повисоки приноси од обврзници во следната година - најмногу од август 2022 година.
Поголем интерес има за еврозоната, пазарите во развој и банките; американските акции, доларот и енергетскиот сектор не се популарни.
Околу 31 отсто од инвеститорите пријавиле дека ја намалиле изложеноста кон американскиот долар - најнегативен став во последните 20 години; 36 отсто ја намалиле изложеноста кон американските акции.
Банката на Америка ја спроведе анкетата меѓу 6 и 12 јуни, со учество на 190 инвестициски професионалци што заедно управуваат со средства во вредност од 523 милијарди долари.
.webp){kind=icon}
Во моментов нема коментари за веста. Биди прв да коментира...