Македонците повеќе тргуваат на странските берзи во 2025

Македонските граѓани направиле поголем промет на странските берзи во првиот квартал годинава во однос на истиот период лани, покажуваат податоците на Комисијата за хартии од вредност. Во првите три месеци физичките лица и компаниите од земјава истргувале  акции, обврзници и други инструменти во вредност од 1,85 милијарди денари или нешто над 30 милиони евра, што е за околу 15 отсто повеќе. Колку за споредба, на домашната берза за целото полугодие прометот со акции во класично тргување е околу 50 милиони евра, додека за првиот квартал изнесува 28,5 милиони евра. Ова значи дека во првите три месеци прометот во класично тргување на Македонска берза (без блоковите) е помал одошто прометот што го направиле македонските резиденти на странските берзи.

Во месец февруари е евидентиран најголем промет на странските пазари, односно 46,2 отсто од вкупниот промет во првиот квартал. „Шпаркасе банка“ го задржува приматот за тргување на странски пазари, со 15,9 милиони евра или речиси 53 отсто од вкупниот промет на странските берзи. „Комерцијална банка“ е втора, со 17,4 отсто од прометот и „НЛБ Банка“ на трето место, со 16,2 отсто. Уште две овластени брокерски куќи за тргување на странски пазари, „Стопанска банка – Скопје“ и „Инвестброкер“, учествуваат со 9,6 и 4 отсто во вкупниот промет на странски пазари во првиот квартал.

Доколку, пак, се анализира прометот на учесниците кои тргуваат на странски пазари, спрема прометот на домашниот пазар, може да се заклучи дека дел од нив речиси сосема се фокусирани кон тргување на странските пазари, како што е „Шпаркасе банка“ , која преку 96 отсто од прометот го реализира на странски пазари. И „НЛБ Банка“ годинава во најголем дел реализирала трансакции на странски пазари, односно 66 отсто.

„Комерцијална банка“ и „Алкалоид“ најтргувани акции повторно

За Македонска берза, пак, имаме податоци за прометот и другите битни показатели за првите шест месеци, каде што вкупниот промет е за речиси 13 отсто поголем во однос на истиот период лани, и изнесува 4,4 милијарди денари (71,2 милиони евра). Според берзанскиот полугодишен билтен, прометот со акции и обврзници во класично тргување е поголем за речиси 10 отсто, додека кај блок трансакциите има значителен пад од 27,2 отсто. Затоа пак, годинава има јавна понуда на хартии од вредност во износ од 526 милиони денари (8,6 милиони евра), за разлика од лани кога немало вакво движење на пазарот.

 

 

Пазарната капитализација на акции на крајот од месец јуни изнесувала 359,1 милијарди денари (5,8 милијарди евра) и е за 28 отсто поголема во однос на истиот датум лани. Пазарната капитализација порасна за преку 50 отсто лани, поради растот на речиси сите акции што котираат на Официјалниот пазар, а особено на оние од индексот МБИ10. 

 

 

Најтргувани акции на Берзата и ова  полугодие се на „Комерцијална банка“ и на „Алкалоид“, со 17,9 и 15,5 милиони евра, со што двете акции сочинуваат речиси 68 отсто од целиот промет со акции. Меѓу најпродаваните хартии од вредност се и на „Макпетрол“ со 4,1 милиони евра промет, „Стопанска банка – Скопје“ со 3,7 милиони евра, итн.

 

 

МБИ10 со скромен перформанс во 2025

Берзанскиот индекс МБИ10 на крајот од првото полугодие имал вредност од 10.565 поени, што е за 37,1 отсто повеќе во однос на лани. Да потсетиме дека 2024 година беше една од најуспешните за домашната берза досега, кога индексот порасна за дури 67 отсто, а прометот со акции за 158 отсто. Годинава со оглед на целата констелација на геополитичката неизвесност и бранувањата на светските пазари што ги предизвикуваат царините на американскиот претседател Доналд Трамп, конфликтот на Блискиот исток, фискалните дефицити на развиените западни економии и други фактори, тешко дека ќе се повтори успехот од лани. Индексот МБИ-10 од почетокот на 2025 заклучно со 30 јуни има скромен раст од само 3,6 отсто, како резултат на прилично осцилирачка траекторија во првите шест месеци, додека во 2024 во истиот период индексот имаше веќе пораснато за речиси 35 отсто.

Од акциите што го сочинуваат МБИ10, најголем пораст во првото полугодие од 2025  имаат на „Макпетрол“, од 28 отсто, пред „Македонијатурист“ со 18,3 отсто, и „Македонски Телеком“ со 10 отсто. Најтргуваните акции, на „Комерцијална банка“, во првите шест месеци практично немаат промена на вредноста, односно пад од 0,04 отсто, додека на “Алкалоид“ имаат пад од 1,84 отсто. Најголем пад на вредноста од домашните „блу чипови“ имаат акциите на „Реплек“, од 9,06 отсто.

Од акциите на Официјалниот пазар како целина, најголем пораст за шест месеци имаат на компанијата „Фустеларко Борец“ од Битола, од 52,4 отсто, пред „Макпетрол“ со 28 отсто, „Адинг“ со 27,3 отсто, „Македонија осигурување Скопје“ со 27 отсто,  и Македонијатурист со 18,3 отсто. Најголем пад на вредноста, пак, имаат акциите на „ФЗЦ 11 Октомври“ -Куманово, од речиси 50 отсто, „Либерти“ – Скопје од 37,5 отсто, „ОКТА“ од 10,6 отсто, „Реплек“ од 8,4 отсто и „Тетекс – Тетово“ од 8,4 отсто.

Во моментов нема коментари за веста. Биди прв да коментира...

Остави коментар