Производителите на чипови го разнишаа Волстрит среде тензијата САД-Иран

Нов бран на распродажби ги зафати глобалните берзи, бидејќи ескалацијата на Блискиот Исток се судри со растечката вознемиреност околу технолошките акции, ги потресе инвеститорите и го попречи закрепнувањето кон рекордни максимуми.

Производителите на чипови, кои го поттикнаа закрепнувањето од најниските нивоа предизвикани од војната, силно се занишаа и паднаа за пет отсто. Nasdaq 100 изгуби 2,5 отсто. Додека повеќето акции во S&P 500 пораснаа, слабоста во технологијата го испрати индексот надолу за над еден отсто. Нафтата го намали падот откако претседателот Доналд Трамп рече дека САД мора да одговорат на нападот на Иран врз американскиот хеликоптер, намалувајќи ги надежите за брзо решавање на нивниот конфликт.

Обновената нестабилност кај гигантите за чипови доаѓа по скокот што ја стави групата на добар пат кон нејзината најдобра година од 1999 наваму. Додека долгорочните перспективи на индустријата остануваат поврзани со наплив од трошење за вештачка интелигенција, инвеститорите сè повеќе се прашуваат дали проценките можат да го одржат темпото по еден од најмоќните скокови на пазарот.

„Колку и да сакаме да го видиме лидерството на технологијата, би било конструктивно да се види ова зголемување раширено и на другите сектори“, рече Брет Кенвел од eToro. „Кога лидерството е концентрирано во еден агол од технологијата, темелите на пазарот стануваат малку потресени.“

Неодамнешното раздвижување кај технолошките гиганти им дава претстава на инвеститорите колку брзо може да се сврти плимата за најголемите победници доколку се промени расположението. Иако е тешко да се утврди причината за нестабилноста, тоа се случува кај технолошките акции со висока вредност пред масовното издавање нови акции, вклучувајќи ја и очекуваната ИПО цена на „Спејс екс“ оваа недела.

Поплава од акции од компании кои бараат капитал за финансирање на амбициите за вештачка интелигенција покренува прашања за тоа дали побарувачката ќе биде доволна за да ја апсорбира емисијата и какви ќе бидат импликациите за пошироките проценки.

  Кој високо лета, ниско паѓа...како чиповите денеска. 

Bloomberg

 

Дел од перспективата на „Спејс екс“ може да биде оптимистичка на долг рок ако одразува длабока побарувачка за иновации и нови можности на јавниот пазар, според Ентони Саглимбене од „Америпрајс“ (Ameriprise). Сепак, на краток рок, големите понуди, исто така, покренуваат основно прашање околу финансирањето, забележа тој.

„Од каде доаѓаат парите?“ прашува Саглимбене. „Некоја побарувачка може да дојде од готовина. Некоја може да дојде од ново учество во малопродажбата. Но, институционалното учество во зделка од ваков обем може да бара и поткастрување на постојните добитници, особено во областите каде што инвеститорите веќе имаат големи добивки.“

Претстојните мега ИПО-а се адреналин за биковски пазар кој го достигнува својот врв, но тие сè уште не сигнализираат еуфорија, според Роберт Едвардс од „Едвардс Асет Менаџмент“ (Edwards Asset Management).

„Ние сме на почетокот на френетичен куповен бран на кој вреди да се вози“, рече тој. „Вистинската еуфорија удира кога сите го бараат следното ‘чудо од дете’ на ИПО-ата, а банкарите брзаат со сомнителни зделки пред да се објават приходите,  коишто цицаат готовина. Сè уште сме во шпекулативна фаза, а трчањето кон еуфорија е нешто што не сакате да го пропуштите.“

Едвардс, исто така, забележува дека остриот пад на берзата е исполнет со агресивно купување бидејќи инвеститорите, и покрај бучавата, знаат дека силните фундаменти, вклучително и силниот раст на приходите и заработката, остануваат на место.

  Најважни корпоративни случувања: 

-Првичната јавна понуда на „Спејс екс“ привлече побарувачка од институционални инвеститори неколкукратно повеќе од достапната количина, според луѓе запознаени со ова прашање, бидејќи се приближува дебито на компанијата за ракети, сателити и вештачка интелигенција предводена од Илон Маск.

-„Антропик“ објавува верзија на „Митос“ (Mythos) за поширока употреба на која ќе ѝ биде блокирана можноста за  извршувањето задачи од сајбер безбедноста, неколку месеци откако предупреди дека моќниот модел на вештачка интелигенција може да открие и искористи ранливости во критичен софтвер.

-Трговскиот оддел на „Банката на Америка“ (Bank of America Corp.) има замав, при што приходите се повисоки од зголемувањето од 15-те отсто што банката го прогнозираше минатиот месец, според ко-претседателот Џим Демар.

-Производителот на желе и кафе „ЏМ Смакер“ (JM Smucker Co.) објави профит во четвртиот квартал што ги надмина очекувањата на Волстрит, бидејќи повисоките цени помогнаа во зајакнувањето на компанијата за пакувана храна.

„ГСК“ (GSK Plc) се согласи да го купи „Нувалент“ (Nuvalent Inc.) за 10,6 милијарди долари, обезбедувајќи американската биотехнолошка фирма која развива третмани за рак на белите дробови да биде  дел од напорите на британската фармацевтска компанија да ја обнови својата франшиза за онкологија.

  Некои од главните движења на пазарите денеска:

Акции

-S&P 500 падна за 1,2 отсто до 13:24 часот по њујоршко време

-Nasdaq  100 падна за 2,5 отсто

-Dow Jones Industrial Average падна за 0,5 отсто

-MSCI World Index падна за еден отсто

Валути

-Bloomberg Dollar Spot индексот падна за 0,1 отсто

-Еврото се зголеми за 0,2 отсто на 1,1552 долари

-Британската фунта се зголеми за 0,4 отсто на 1,3387 долари

-Јапонскиот јен малку се промени на 160,29 за долар

Криптовалути

-Биткоинот падна за 2,7 отсто на 61.737,5 долари

-Етерот падна за 2,6 отсто на 1.645,26 долари

Обврзници

-Приносот на 10-годишните американски државни обврзници се намали за три базични поени на 4,53 отсто

-Приносот на 10-годишните германски обврзници се намали за два базични поени на 3,04 отсто

-Приносот на 10-годишните британски обврзници се намали за четири базични поени на 4,90 отсто

Суровини

-West Texas Intermediate суровата нафта  падна за 4,5 отсто на 87,21 долари за барел

-Цената на златото падна за 1,5 отсто на 4.265,83 долари за унца