Индексот S&P 500 избриша еден отсто од добивката во пресрет на царините

Растот на акциите нагло опадна во пресрет на воведувањето царини од страна на американскиот претседател Доналд Трамп, а Белата куќа побара од производителите на лекови да ги намалат цените во САД. Обврзниците беа нестабилни, но со благи подеми и падови во пресрет на податоците за работните места. Доларот го забележа својот најдобар месец во 2025 година.

Индексот S&P 500 за првпат од април изгуби еден отсто добивка. Трамп испрати писма до 17 од најголемите фармацевтски компании. Индексот за седумте величествени акции достигна рекорден максимум бидејќи „Мајкрософт“ накратко надмина четири трилиони долари пазарна капитализаци, додека „Мета платформс“ скокна за 11 проценти. Во доцните часови „Епл“ објави продажба што ги надмина очекувањата. Прогнозите на „Амазон“ ги разочараа трговците.

Кога станува збор за другите индекси, Nasdaq 100 падна за 0,5 отсто, Dow Jones Industrial Average за 0,7 отсто, индексот MSCI World загуби 0,5 отсто од вредноста, додека индексот Russell 2000 падна за 0,9 отсто.

„Иако очекуваме акциите да напредуваат во текот на следните 12 месеци, инвеститорите треба да бидат внимателни на потенцијалните осцилации на пазарот во наредните недели“, рече Марк Хефеле од „УБС глобал велт менаџмент“.

Трамп ќе потпише извршна наредба со која ќе се воведат нови царински стапки за трговските партнери, кои ќе стапат во сила од денеска. Тој склучи договори со Европската Унија, Велика Британија, Јапонија и Јужна Кореја и еднострано постави стапки за Индија и Бразил. САД ги продолжија сегашните царински стапки на Мексико за 90 дена за да се овозможи повеќе време за преговори.

Освен тоа, Трамп ги пречекува банкарските лидери да се сретнат со него еден по еден во Белата куќа. Тој ги прашува извршните директори за нивните предлози за монетизација на хипотекарните гиганти „Фани Меј“ (Fannie Mae) и „Фреди Мек“ (Freddie Mac), вклучувајќи и голема јавна понуда на акции, според луѓе запознаени со ова прашање.

Приносот на 10-годишните државни обврзници само малку се промени - на 4,36 проценти. Доларот порасна шести ден по ред. Јенот се лизна откако коментарите од гувернерот на Банката на Јапонија, Казуо Уеда, се сметаа за помалку агресивни од очекуваното.

Bloomberg Mercury

 

Во периодот пред објавувањето на податоците за работните места, преферираната мерка на Фед за основната инфлација во јуни се забрза на едно од највисоките темпа годинава, додека потрошувачката едвај се зголеми, нагласувајќи ги спротивставените сили што ги делат креаторите на политиките во врска со патот на каматните стапки.

Индексот на основни трошоци за лична потрошувачка се зголеми за 0,3 проценти во однос на мај. На годишно ниво (во однос на јуни 2024 година) порасна за 2,8 отсто, што го нагласува ограничениот напредок во скротувањето на инфлацијата во изминатата година. Податоците исто така покажаа дека минатиот месец потрошувачката приспособена на инфлацијата се зголеми.

„Инфлацијата останува леплива и ја оправдува одлуката на Фед да ги задржи стапките непроменети на состанокот што се одржа во средата“, рече Кларк Белин од „Белведер велт“ (Bellwether Wealth). „На берзата не ѝ се потребни намалувања на стапките за да се движи повисоко и веќе забележа силни добивки досега годинава без никакви намалувања на стапките“.

Како и со многу работи во економијата, ситуацијата е многу променлива и сè уште не сме го виделе целосното влијание на царините врз инфлацијата, смета Крис Закарели од „Нортлајт асет менаџмент“ (Northlight Asset Management).

„Како се вели: цената ни е совршена, а тоа е ризик, но веројатно пазарот ќе го игнорира тој ризик сè додека корпоративните профити сè уште растат“, рече тој.

Bloomberg Mercury

 

Одделни податоци од САД вчера покажаа дека првичните апликации за осигурување за невработеност малку се променија минатата недела. Друг извештај покажа дека растот на трошоците за труд се зголемил за 3,6 проценти на годишно ниво, што е најниско од 2021 година, уверувајќи ги претставниците на Федералните резерви дека пазарот на трудот не е извор на инфлаторен притисок.

Вниманието на пазарот наскоро ќе се сврти кон извештајот за работни места за јули, кој треба да се објави денеска попладне, а за кој се предвидува дека компаниите стануваат попромислени при вработувањето. Вработеноста веројатно се ублажи по зголемувањето во јуни, додека стапката на невработеност се очекува да достигне 4,2 проценти.

Претседателот Трамп ги продолжи своите критики кон претседателот на Федералните резерви, Џером Пауел, откако централната банка одби да ги намали каматните стапки.

Коментарите на Трамп дојдоа откако претставниците на Фед во средата ги оставија каматните стапки непроменети, но ја намалија својата прогноза за американската економија, сигнализирајќи дека креаторите на политиките би можеле да се приближуваат кон намалување на трошоците за позајмување.