Стокхолм станува најатрактивен пазар за ИПО во Европа

Најпопуларно место за јавни понуди на компании во Европа годинава е неочекувано: Стокхолм.

Шведската престолнина има можност да собере 6,8 милијарди долари од првични понуди на акции годинава, повеќе од кое било место во Европа, и ќе биде домаќин на најголемото котирање во Европа од 2022 година, кога безбедносната компанија „Веришур“ (Verisure Plc) ќе излезе на пазарот следната недела. На глобално ниво, Стокхолм е на петтото место, по САД, Кина, Хонгконг и Индија, што е изненадувачки успех за пазар што е една третина од големината на лондонскиот.

Во време кога корпоративните гиганти од Лондон се подготвуваат за Њујорк, а технолошките јунци одлучуваат да останат приватни подолго време, Стокхолм врие од мали компании што сакаат да излезат на пазарот и локални инвестициони фондови што се подготвени да ги поддржат следните успешни приказни. Ова е доказ за економското закрепнување што започнува да се зацврстува и другите европски земји што се обидуваат да го поттикнат развојот на своите мали пазари шведскиот модел го гледаат како пример за следење.

„Ѕвездите се наместија годинава од макроперспектива, инвеститорски апетит и компании што се подготвени за ИПО“, изјави Хенрик Рот, партнер во правната фирма БМ (Baker McKenzie), специјализирана за ИПО. 

Шведска ги надмина другите европски берзи во однос на обемот на тргување Bloomberg

На врвот на локалната листа е „Веришур“, која планира да собере 3,1 милијарди евра (3,6 милијарди долари), што ќе ја означи најголемата европска ИПО откако „Порше“ (Porsche AG) излезе на берза. Тоа следува по финансиската услужна компанија „Ноба“ (Noba Bank Group AB), која собра 7,6 милијарди шведски круни (808 милиони долари) и скокна за 30 отсто во своето прво тргување на акции.

Иако има зголемувања на ИПО и во други делови на континентот, Шведска сè уште води со голема разлика. Вкупно девет компании излегоа на берзата годинава, што е најмногу од 2022 година, според податоците собрани од „Блумберг“.

Стокхолм го најде своето место кога станува збор за собирање капитал за мали компании насочени кон нордиските земји. Банкарите посочуваат на културната различност на Швеѓаните, кои се подготвени да преземат ризик со акции, спротивно на другите европски нации како Германија и Велика Британија, каде што е популарно да се чуваат пари на штедни сметки или да се вложува во недвижности.

Технолошки ориентираниот фокус на земјата и големиот број на активни фонд-менаџери, фамилијарни канцеларии и пензиски фондови значат дека има многу брзорастечки компании шѕо бараат капитал, а локалните фондови ги поддржуваат. Стабилноста на шведскиот берзански пазар исто така ги охрабрува повеќето трансакции, вели Ана Боквист, шефица на капитални пазари во ДНБ (DNB Carnegie Investment Bank AB).

„Ние имаме заедница на мали компании“, вели Кристијан Брунлид, фонд-менаџер во ХФ (Handelsbanken Fonder AB) и камен-темелник за ИПО на „Ноба“. „Кога компанијата е толку мала, претпочитаме да покажат органски раст и да функционираат на пазарот во Шведска, но исто така можат да се префрлат и на странски пазар.“

„Веришур“ ќе учествува со повеќе од половина од обемот на работење во Стокхолм Bloomberg

Купувањето иницијални јавни понуди од Шведска не е без ризици и некои инвеститори се изгореа. Постоеја некои успешни примери, како ЕХ (Enity Holding AB), инвестициска фирма што забележа раст на нејзините акции од 50 отсто откако стана јавна во јуни. Други компании, како што се креаторот на игри „Хаксоу“ (Hacksaw AB) и фирмата за приватен капитал „Роко“ (Roko AB), паднаа. Акциите на КХ (Qualisys Holding AB), која произведува камери од висока класа, паднаа за 25 отсто откако влегоа на пазарот.

Поддршка за ИПО-бумот даваат армија активни инвеститори од малите домаќинства. Шведските домаќинства инвестираат повеќе од половина од своите заштеди во акции, повеќе од двапати од просекот во еврозоната, според годинашниот извештај на Европскиот институт за заштеди.

Во 2012 година земјата го воведе системот ИСК (InvesteringsSparKonto / ISK), што го поедностави даночниот систем за капитални инвестиции, отстранувајќи ги бирократските бариери што претходно беа пречка. Тоа овозможи секој што има банкарска апликација лесно да купува и продава акции.

„Типично шведско домаќинство не прави разлика меѓу концептите за штедење и инвестирање“, изјави шведскиот министер за финансиски пазари Никлас Викман за „Блумберг“. „Тоа создаде култура во која домаќинствата учествуваат на финансиските пазари.“

Околу 69 отсто од средствата на шведските фондови се состојат од фондови за акции, највисок процент во Европа, според податоците собрани од Шведската инвестициска фонд-асоцијација. Истовремено, речиси една четвртина од Швеѓаните директно поседуваат акции на јавни компании, со просечен удел од околу 540.000 круни, покажуваат податоците од ЕС (Euroclear Sweden).

Стокхолм е домаќин на половина од десетте најголеми иницијални јавни понуди во Европа Bloomberg

За Никлас Андерсон, економист за заштеди на онлајн платформата за трговија „Монтрос“ (Montrose), успехот на неколку големи американски технолошки ИПО годинава, како што се „Фигма“ (Figma Inc.) и „Булиш“, создава основа за повеќе шведски понуди.

„Очекуваме активен есенски период за листирање, кој може да понуди вистински ефект на достигнување“, изјави тој. „Апетитот за ризик се врати на голема врата.“