Глобален удар врз пазарот на чипови – избришани 500 милијарди долари

Глобалната продажба на акции на производителите на полупроводници се засили поради загриженост околу преголемите вреднувања на некои од најголемите добитници од подемот на вештачката интелигенција.

Производителите на мемориски чипови „Самсунг електроникс“ (Samsung Electronics Co.) и „СК Хиникс“ (SK Hynix Inc.) го повлекоа јужнокорејскиот индекс Kospi надолу за најмногу 6,2 отсто во средата, пред да се ублажи падот. Јапонската „Адвантест“ (Advantest Corp.) изгуби до 10 отсто, а најголемиот азиски производител „Тајван семикондактор“ (Taiwan Semiconductor Manufacturing Co.) падна за повеќе од 3 отсто. Сите се добавувачи на „Енвидија“ (Nvidia Corp.).

Движењата избришаа околу 500 милијарди долари од вкупната пазарна капитализација на Philadelphia Semiconductor Index во вторникот и на индексот на „Блумберг“ што ги следи азиските производители на чипови.

Продажниот бран нагласува колку е пренапумпан растот на акциите на производителите на чипови поттикнат од вештачката интелигенција, по достигнувањето рекордни нивоа. Компаниите од овој сектор додадоа билиони долари пазарна вредност од април наваму, бидејќи инвеститорите се обложија на растечката побарувачка за ВИ-компјутерска моќ. Повлекувањето сигнализира сè поголема загриженост околу потенцијалот за заработка и високите вреднувања, особено ако каматните стапки останат високи подолг период.

Bloomberg

„Не би рекол дека сега е време да се купува поевтино – голем дел од растот не беше заснован на фундаментални показатели, па нема логика сега да се зборува за поволна зделка,“ рече Чауеј Јак, извршна директорка на мултистратешкиот хеџ-фонд „ГАО капитал“ (GAO Capital) во Сингапур.

„Но ако некои од големите технолошки компании паднат за 15 или 20 отсто, тогаш можеби ќе има простор за размислување.“

Предупредувањата на водечките луѓе од Волстрит дека е неизбежна задоцнета корекција овојпат притиснаа врз секторот, заедно со намалените очекувања за намалување на каматните стапки од Федералните резерви и продолженото затворање на американската влада. Управителот на хеџ-фонд Мајкл Бари дополнително придонесе за распродажбата со откривањето дека се обложил на пад на акциите на „Палантир“ (Palantir Technologies Inc.) и „Енвидија“ (Nvidia).

„Палантир“ го поттикна падот на Волстрит со прогноза што не ги воодушеви инвеститорите. Слична реакција на резултатите и прогнозата на „АМД“ (Advanced Micro Devices Inc.) го засили влијанието врз азиското тргување во средата.

„Сè е црвено низ пошироките пазари и тоа дава темна слика за ризикот,“ рече Крис Вестон, раководител на истражување во „Пеперстоун“ (Pepperstone Group). „Треба да останеме отворени за можноста ова уште да се продлабочи. Поедноставено, нема многу причини сега да се купува.“

Загриженоста расте дека акциите се преценети. Индексот Philadelphia SOX моментално се тргува на околу 28 пати проценетата идна заработка, во споредба со петгодишниот просек под 22 пати.

Некои го гледаат падот како нешто добро, затоа што го намалува притисокот од растот што излезе од контрола и ги прави акциите малку поевтини. Со оглед дека глобалните технолошки компании како „Амазон“ (Amazon.com Inc.) и „Мета“ (Meta Platforms Inc.) вложуваат сè повеќе пари во ВИ, се очекува производителите на чипови и другите технолошки компании да имаат понатамошна корист во резултатите и цените на акциите.

Засега и институционалните и индивидуалните трговци мора да се справуваат со секојдневната волатилност. Индексот Goldman Sachs Retail Favorites падна за 3,6 отсто во вторникот — речиси тројно повеќе од падот на S&P 500 Index.

Викас Першад, менаџер на портфолио на азиски акции во „М&Г“ (M&G Investments), рече дека бил речиси цела ноќ буден во Сингапур следејќи го пазарниот хаос.

„Следев додека не легнав, кога САД затворија во 4 часот наутро, потоа малку дремнав и се подготвив за азиската сесија,“ рече тој. „Отидовме предалеку, пребрзо – инвеститорите не треба да бидат изненадени ако ова продолжи и утре, и задутре,“ рече, додавајќи дека сега е добро време да се внимава на можности за купување.