Акциите на пат да ја забележат најлошата недела во последните седум месеци

Акциите се на пат да ја забележат најлошата недела во последните седум месеци, бидејќи загриженоста поради високите процени и прашањата дали огромните инвестиции во вештачката интелигенција (ВИ) ќе донесат профит, ги натераа инвеститорите да се повлечат од ризичните имоти.

MSCI All Country World Index неделава падна за три отсто, што го води кон најостар пад од 4. април, кога царините на Трамп го потресоа пазарот. Азиските акции паднаа за 1,7 отсто – исто така на пат кон најголемиот неделен пад од април – откако индексите на Волстрит паднаа во четвртокот. Дополнително, криптовалутите паднаа, при што биткоин се тргуваше под 86.000 долари.

Расположението за американски средства се стабилизираше, со фјучерс договори што укажуваат на скромен раст на индексот S&P 500, откако падна на најслабото ниво од септември. Американските државни обврзници исто така делумно ги изгубија добивките, со принос на десетгодишните обврзници што се зголеми за еден базичен поен на 4,09 отсто. Европските акции беа насочени кон пад.

Акциите беа под притисок бидејќи загриженоста за преценетите процени и големите инвестиции во технологијата го ограничуваат растот што го поттикна оптимистичката прогноза на „Енвидија“ (Nvidia), чии акции паднаа за 3,2 отсто. Дополнителна несигурност создаде постојаната неизвесност за способноста на Фед да ги намали каматните стапки следниот месец, бидејќи неодамнешните изјави на функционери укажуваат на внимателност кога станува збор за претерано попуштање.

„Пазарот беше под притисок оваа недела затоа што расположението на инвеститорите ослабе поради растечките прашања за одржливоста на бумот на вештачката интелигенција (ВИ)“, напиша Шарлот Доутри, директорка за инвестиции во акции во ФХ (Federated Hermes Ltd.) „Иако волатилноста порасна, повеќето аналитичари повлекувањето го гледаат како корективно, а не како почеток на долг пад“, додаде таа.

Во четврток, S&P 500 забележа најголем пресврт за еден ден – 3,6 отсто – од врвот на кризата со царините во април, според податоците собрани од „Блумберг“ (Bloomberg). Индексот сега е паднат за пет отсто од својот последен врв.

Партнерот во „Голфдман Сакс“ (Goldman Sachs Group Inc.). Џон Флуд изјави дека од 1957 година имало осум случаи, вклучувајќи го овој во четврток, кога S&P 500 најпрво пораснал за повеќе од еден отсто, а потоа го завршил денот во минус. Среќа, просечниот перформанс по овие епизоди бил позитивен, со раст од најмалку 2,3 отсто наредниот ден и недела, и напредок од 4,7 отсто во наредниот месец.

Cboe Volatility Index порасна на 26,42, највисокото ниво од април. Индексот не се затвори на врв во сесијата, што сугерира дека „стравот од волатилност е зголемен, но не екстремен“, рече Крис Мурфи, еден од раководителите во СИГ (Susquehanna International Group).

Засилени осцилации беа забележани непосредно пред истекот на проценетите опции во номинална вредност од 3,1 билон долари, закажан за петок. Во Азија, фокусот беше на Јапонија, каде кабинетот на премиерката Санае Такаичи одобри најголем пакет дополнителни расходи од пандемијата. Планот вклучува 17,7 билони јени (112 милијарди долари) во општи расходи. Ова следеше откако Јапонија издаде најсилно предупредување до сега поради движењата на јенот, при што министерката за финансии посебно ја спомена интервенцијата како опција, во обид да се спречи падот на валутата.

 

Четвртокот во САД донесе и објава на долго одлаганиот извештај за вработувањата во владата, кој покажа дека растот на вработеноста се забрзал во септември, додека стапката на невработеност благо пораснала. Податоците сугерираат дека пазарот на труд покажал знаци на стабилизација пред затворањето на владата. Бројките дојдоа ден по деталните записници од последниот состанок на Фед, кои покажаа поделба на комитетот околу понатамошните намалувања на каматните стапки. Гувернерот на Фед, Мајкл Бар, посочи дека американската централна банка мора да биде внимателна при разгледувањето на дополнителни намалувања на каматите бидејќи инфлацијата сè уште го надминува таргетот.

Претседателката на огранокот на Фед во Кливленд, Бет Хамак, рече дека намалувањето на каматите за поддршка на пазарот на труд може да го продолжи периодот на инфлација над цлта и да ги зголеми ризиците за финансиска стабилност. Нејзиниот колега од Чикаго, Астан Гулсби, нагласи дека сè уште е внимателен за дополнително намалување на каматите на декемврискиот состанок на централната банка.

„Загриженоста на инвеститорите за процените, во комбинација со мешаните извештаи за вработувањето, доминираа со расположението за време на сесијата“, рече Ник Твидел, главен пазарен аналитичар во АТ (AT Global Markets) во Сиднеј. „Сега изгледа дека сме во средина на 'растечка продажба' и дека врвот е достигнат до крајот на годината.“

Кај суровините, нафтата е на пат да забележи неделна загуба поголема од два отсто, со брент под 63 долари зо барел. Падот на цената на сурова нафта следеше откако украинскиот претседател Володимир Зеленски се согласи да работи на план за мир, додека се очекуваат ефктите од американските санкции против два руски нафтени гиганти. Златото остана на траекторија за неделен пад.